КРИМИНАЛДЫК ХРОНИКА ЖАНА ОКУЯЛАР

Өткөн сутка ичинде куткаруучулар “Шахта-Жыргалан” шактасындагы газ топтолгон жерге эки жолу парустук тосмо орнотуп беришкен, деп билдирди КР ӨКМнин басма сөз кызматы.

Ысык –Көл облусунун Ак-Суу районунда 2017-жылдын 23-октябры күнү саат 08:45де КР ӨКМнин №7 өзүнчө мобилдик тоо-кен кырсыктарынан куткаруу взводунун куткаруучулары Жыргалаң айылындагы “Шахта-Жыргалаң” ААКсынын шахтасына барышып, газ топтолгон жерге парустук тосмону орнотуп беришкен.

Ошондой эле, саат 22:05де куткаруучулар “Шахта-Жыргалаң” ААК шахтасына кайрадан барышып, газ топтолгон жерге парустук тосмону орнотуп беришкен.

2017-жылдын 28-август күнү Чүй облусунун Кемин РИИБнин нөөмөт бөлүмүнө “Бишкек-Торугарт” автожолунун 78-чакырымында жол-транспорттук кырсык болгондугу тууралуу маалымат келип түшкөн. Бул туурасында Чүй ОИИББнин ПМБнын Басма сөз кызматы билдирет.

Окуя болгон жерге Чүй ОИИББнин Патрулдук милиция башкармалыгынын жана тез жардам кызматынын кызматкерлери келишкен. Белгисиз айдоочу автоунаасы менен чыгыштан батышка карай сапар алып жатып, жөө жүргүнчүнү сүзүп, жардам көрсөтпөстөн, изин жашырып качып кеткен. Жол кырсыгынын кесепетинен 60 жаштагы жаран алган жаракатынан окуя болгон жерден каза болгон.

Чүй ОИИББнин Патрулдук милиция башкармалыгынын кызматкерлери тарабынан көрүлгөн ыкчам-издөө иш-чараларынын натыйжасында айдоочунун өздүгү менен автоунаасы такталган. Ал 28 жаштагы Чүй облусунун Ысык-Ата районуна караштуу Ивановка айылынын тургуну болуп чыккан. Шектүүнү кармоо учурунда күнөөсүн толугу менен мойнуна алган. «Мерседес-Бенц-Спринтер» үлгүсүндөгү автоунаасы айып пул төлөөчү жайга жеткирилген. Жогорудагы факты боюнча Кыргыз Республикасынын кылмыш-жаза кодексинин 281-беренесинин 2-бөлүмүнүн (Транспорт каражаттарынын кыймылынын жана аларды пайдалануунун коопсуздук эрежелерин бузуу) негизинде кылмыш иши козголгон. Айдоочу убактылуу кармоочу жайга киргизилип, тергөө иштери жүрүп жатат.

Ош шаарында ИИМдин кызматкерлери опузалоо менен тоноого шектелип, мурда соттолгон жаранды кармашты. Бул туурасында ИИМдин Басма сөз кызматы билдирет.

Ички иштер органдарынын кызматкерлерине 9-октябрь күнү кечинде 30 жаштагы Ош шаарынын жашоочусун сабап, тоноп кетти деген маалымат келип түшкөн. Жогорудагы маалыматты текшерүү учурунда кордук көрсөтүү менен опузалоо фактылары аныкталган.

Маалымат боюнча бейтааныш адамдар жабырлануучуну конокко чакырышкан. Андан кийин, ур-токмокко алышып, коркутушуп, опузалоо менен жабырлануучуга таандык “Мерседес-Бенц” үлгүсүндөгү автоунаасын документтери менен алып коюшкан.

Жогорудагы факты боюнча Кыргыз Республикасынын кылмыш-жаза кодексинин 167-беренеси (тоноо) менен 170-беренелерине (опузалоо) ылайык кылмыш иши козголгон. Аталган кылмыш ишине шектелген жаранды издөөгө ИИМдин кызматкерлери дагы киришип, тергөө учурунда мурда соттолгон, уюшкан кылмыштуу топтун мүчөсү катары ИИМдин атайын каттоосунда турган Ош облусунун тургуну экендигин аныкташкан.

Милиция кызматкерлери тарабынан жүргүзүлгөн ыкчам-иликтөө иш-чараларынын натыйжасында Кара-Суу районунун 1991-жылы туулган М.Н. аттуу жашоочусу кармалган. Ал мурда опузалоо, адамдын ден соолугуна атайылап оор залал келтирүү фактылары боюнча соттолгону анык болгон. Жабырлануучунун автоунаасы кармалган жарандан алынган. Кылмышка шектүү абыктылуу кармоочу жайга киргизилген. Азыркы учурда иликтөө иштери жүрүп жатат.

2017-жылдын 23-октябрь күнү ИИМдин кызматкерлери тарабынан жүргүзүлгөн ыкчам-иликтөө иш-чараларынын негизинде Лев Толстой жана Термечиков көчөлөрүнүн кесилишинен 31 жаштагы С.М. аттуу жергиликтүү тургун кармалган. Бул туурасында ИИМдин Басма сөз кызматы билдирет.

Текшерүү учурунда баштыктан 100 даана ширенкенин кутуларына салынган, өзгөчө жыты бар, күрөң-жашыл түстөгү “гашиш” баңгизаты табылган. Алынган заттын жалпы салмагы 1 килограмм 118 граммды түзгөн.
Жогорудагы факты боюнча иликтөө иштери жүрүп жатат. Кармалган жаран убактылуу кармоочу жайга киргизилген.

Журналист Алишер Саиповду Ош шаарында белгисиз кишилер атып кеткенине 10 жыл толду. Бул үрөй учурган кылмышты ким жасаганы ушул күнгө чейин белгисиз.

https://www.youtube.com/watch?v=Mi6nrjAJoRw&feature=youtu.be

Булак: “Борбор Азия жаңылыктар кызматы”

Жогорку Сот кримтөбөл атыккан Кадыр Досоновду (каймана аты – Жеңго) толугу менен актаган өкүмүн угузду. Бул туурасында анын актоочусу Назгүл Сүйүнбаева билдирди.

Баса, алгачкы өкүмдү эки ай мурда Кара-Суу райондук соту чыгарып, Кадыр Досоновду биротоло актаган. Ал эми 3-августта Ош облустук соту бул актоо өкүмдү толук бойдон күчүндө калтырган. Криминалдык чөйрөдө “Жеңго” деген каймана ат менен таанымал кримтөбөл Кадыр Досонов Ички иштер министрлигинин уюшкан кылмыштуулук менен күрөшүү башкармалыгынын түштүк бөлүмүнүн башчысы, милициянын полковниги Толкунбек Шоноевди өлтүрүүгө буйрук кылган деп күмөндөлүп жаткан эле.

– Дээрлик үч жылга созулган соттук териштирүүлөрдүн жүрүшүндө Кадыр Досоновдун бул кылмышка түздөн-түз тиешеси бар экендигине бир дагы далил келтирилген жок! – деди Кадыр Досоновдун жактоочусу Назгүл Сүйүнбаева. -Ошондуктан, өлкөбүздөгү бардык соттук инстанциялар олуттуу жүйөө таппагандыктан, аны актаганга аргасыз болушту.

Баса, 2013-жылдын 11-январында ИИМдин уюшкан кылмыштуулук менен күрөшүү башкармалыгынын түштүк бөлүмүнүн башчысы, милициянын полковниги Толкунбек Шоноевди Ош шаарындагы өз үйүнүн жанында атып кетишкен эле. Полковник 35 жашта болчу. Артында төрт баласы жетим калды. Бул окуя боюнча кылмышка катыштыгы барлар дээрлик бардыгы жазасын алышты. А Кадырбек Досонов гана качып жүргөндүктөн, ага карата кылмыш иши өзүнчө өндүрүшкө бөлүнгөн эле. “Жеңгону” күч түзүмдөрү 2015-жылдын 6-февралында гана эптеп колго түшүрүшкөн.

Булак: “Майдан.kg”

2017-жылдын 24-октябрында Ысык-Ата районунун ички иштер бөлүмүнө 64 жаштагы Карагай-Булак айылынын тургуну арыз менен кайрылып, 24-октябрь күнү кечинде арыздануучунун сарайынан ири мүйүздүү малын уурдап кеткен белгисиз жаранга карата тиешелүү чараларды көрүп берүүлөрүн суранган. Бул туурасында ИИМдин Басма сөз кызматы билдирет.

Ысык-Ата РИИБнин кызматкерлери тарабынан көрүлгөн ыкчам-иликтөө иш-чараларынын натыйжасында, кылмыштын изин суутпай, жогорудагы кылмыш ишине шектүү катары Гидростроитель айылынын 34 жаштагы Ж.Ч. аттуу жашоочусу кармалган.

Аталган факты боюнча Кыргыз Республикасынын кылмыш-жаза кодексинин 165-беренесинин (мал уурдоо) негизинде кылмыш иши козголгон.

Кармалган жаран соттун чечими менен сыртка чыкпоо боюнча тил каттын негизинде үй камагына алынды. Учурда иликтөө иштери жүрүп жатат.