КРИМИНАЛДЫК ХРОНИКА ЖАНА ОКУЯЛАР

Уюшкан кылмыштуулукка каршы күрөшүү башкы башкармалыгын башчысы Дамирбек Давльянов УКМКнын АКС кызматы тарабынан 400 доллар пара алып жаткан жеринен колго түшүрүлдү. Аны менен кошо дагы төрт ыкчам кызматкерлери да камалышты. Албетте бул чоң резонанс жарата турчу окуя. Бакандай болгон башкармалыктын башчысы пара менен кармалып жатканы төбө чачты тик тургузган маалымат. Мындай киттер оңой менен колго түшчү эмес эле, сыягы кимдир бирөө менен бөлүшө албай калган го деп турубуз. Кандай болсо дагы “подстава” болбосо эле болду. Бакандай болгон полковниктин мээси жайында эле болсо керек, ал төрт жүз долларды өз колу менен алышы күмөн жаратууда. Бул жерде бир сыр бар. Гезитибиздин (ред. Ачык саясат) келерки санында кененирээк маалымат беребиз.

Булак: “Ачык саясат”

2017-жылдын 19-октябрь күнү Чүй облусунун ички иштер башкы башкармалыгынын жана Аламүдүн районунун ички иштер бөлүмүнүн кызматкерлери биргеликте ыкчам-издөө иш-аракеттерин жүргүзүшүп, натыйжасында Аламүдүн районунун аймагындагы жаза-өтөө мекемесинин жанынан 18 жаштагы Щ.Д. кармалып, ага өздүк кароо жүргүзүү учурунда анын жанынан 3 килограммга жакын баңгизаты табылган. Бул туурасында Чүй ОИИБнин Басма сөз кызматы билдирет.

Бул окуя боюнча Аламүдүн районунун ИИБнин тергөө кызматы тарабынан Кыргыз Республикасынын кылмыш-жаза кодексинин 247-беренеси (Баңги каражаттарын, психотроптук заттарды, алардын окшошторун же прекурсорлорду башкага берүү максатында мыйзамсыз даярдоо, сатып алуу, сактоо, ташуу, жөнөтүү, ага тете эле мыйзамсыз өндүрүү же берүү) боюнча кылмыш иши козголуп, тергөө иштери жүргүзүлүүдө.

Ошондой эле, милиция кызматкерлери тарабынан Москва районунун аймагынан шектүү “Мерседес-Бенц” үлгүсүндөгү автоунаа токтотулуп, унаага кароо жүргүзүү маалында кочкул-жашыл түстөгү кара-куурай жыттанган жалпы салмагы 480 граммды түзгөн зат табылган. Бул окуя боюнча аталган автоунаанын айдоочусу Бишкек шаарынын 23 жаштагы Д.А. аттуу жашоочусунун үстүнөн Кыргыз Республикасынын кылмыш-жаза кодексинин 246-беренеси (Башкага берүү максатын көздөбөстөн баңги каражаттарын же психотроптук заттарды мыйзамсыз даярдоо, сатып алуу, сактоо, ташуу же жөнөтүү) боюнча кылмыш иши козголгон. Кармалган жаран жергиликтүү райондук ички иштер бөлүмүнө жеткирилген. Учурда тергөө иштери жүргүзүлүүдө.

Кыргыз Республикасынын ИИМдин Ички иликтөө кызматы МУККтун Коррупцияга каршы күрөшүү кызматы менен биргеликте опузалап акча талап кылганга шектүүлөрдү кармоо үчүн ыкчам-тергөө иш-чараларын уюштурушкан. Бул туурасында ИИМдин Басма сөз кызматы билдирет.

2017-жылдын 18-октябрь күнү Кыргыз Республикасынын кылмыш-жаза кодексинин 304 жана 313-беренелеринин негизинде козголгон кылмыш ишине байланыштуу ИИМдин Ички иликтөө кызматы менен МУККтун Коррупцияга каршы кызматынын өкүлдөрү ИИМдин КМК кызматынын 3-башкармалыгынын эки кызматкерин кармашкан.

Жакында эле укук коргоо органдарына милиция кызматкерлери тарабынан опузалап акча талап кылды деген арыз келип түшкөн. Кыргыз Республикасынын Башкы прокуратурасы топтолгон материалдардын негизинде Кыргыз Республикасынын кылмыш-жаза кодексинин 304-берене (Кызматтык абалынан кыянаттык менен пайдалануу) жана 313-беренеси (Опузалап акча талап кылуу) менен кылмыш ишин козгогон.

Азыркы учурда Мамлекеттик улуттук коопсуздук комитетинин (МУКК) тергөө башкармалыгы иликтөө иштерин улантып жатат. Жогоруда кармалган кызматкерлер МУККтун тергөө абагына киргизилди.

Кыргыз Республикасынын Ички иштер министрлигине Пакистан Ислам Республикасынын жараны арыз менен кайрылып, алдоо жолу менен ири суммадагы чыгым келтирген жаранга карата чараларды көрүп берүүлөрүн суранган. Бул туурасында ИИМдин Басма сөз кызматы билдирет.

Келип түшкөн арыздын негизинде Кыргыз Республикасынын ИИМдин кызматкерлери ыкчам-иликтөө иш-чараларын жүргүзүшүп, натыйжасында А.Т. аттуу Пакистан Ислам Республикасынын жаранын кармашкан. Ал Канадага жумушка орноштурууга виза жасап берем деп мыйзамсыз миграцияны уюштуруп, өзүнүн мекендештерин алдоо жолу менен ири суммадагы акча каражатын алып, изин жашырып качып жүргөн. Жабырлануучулардан алган акча каражатынын жалпы суммасы 70 000 миң АКШ долларын түзгөн.

Жогорудагы факты боюнча Кыргыз Республикасынын кылмыш-жаза кодексинин 166-беренесинин (алдамчылык) негизинде кылмыш иши козголгон.

Кыргыз Республикасынын ИИМдин кызматкерлери тарабынан көрүлгөн ыкчам-издөө иш-чараларынын натыйжасында, Бишкек шаарында убактылуу жашаган 1994-жылы туулган А.Т. аттуу Пакистан Ислам Республикасынын жараны кармалган. Маалымат боюнча кармалган жаран мурда Кыргыз Республикасынын кылмыш-жаза кодексинин 166-беренеси боюнча кылмыш жоопкерчилигине тартылган. Азыркы учурда иликтөө иштери жүрүп жатат.

Ички иштер органдары тарабынан жарандардын мүлкүн өрттөөгө шектүү жарандын өздүгүн тактоо жана кармоо максатында ыкчам-издөө иш-чаралары жүргүзүлүп жатат. Бул туурасында ИИМдин Басма сөз кызматы билдирет.

2017-жылдын 17-октябрында Аламүдүн РИИБнин кызматкерлери окуя болгон жерге келишип, «Фиат» үлгүсүндөгү автоунаа толугу менен күйгөнүн, ал эми «Тойота Калдина» жана “Субару” үлгүсүндөгү автоунаалардын дөңгөлөктөрүн күйгүзүүгө аракет жасагандарын аныкташкан. Андан сырткары, тергөө учурунда  Маевка айылындагы үйлөрдүн бирин өрттөөгө аракет кылганы маалым болгон. Жогорудагы кылмыш ишине тиешеси бар адамды жергиликтүү тургундар көргөнүн айтып беришкен. Жарандардын мүлкүн өрттөөгө азият улутундагы 30-35 жаштагы жаран шектелүүдө.

Аталган факты боюнча Кыргыз Республикасынын кылмыш-жаза кодексинин 174-беренесинин (Мүлктү атайылап жок кылуу же зыянга учуратуу) негизинде кылмыш иши козголду. Азыркы учурда милиция кызматкерлери шектүүнүн өздүгүн тактоо жана кармоо үчүн ыкчам-издөө иш-чараларын жүргүзүп жатышат. Кылмышка шектүү психикалык оорулуу болушу мүмкүн деген божомолдор бар.