КРИМИНАЛДЫК ХРОНИКА ЖАНА ОКУЯЛАР

2017-жылдын 14-сенябрында болжол менен саат 10:30да Ленин райондук ИИБине чалуу келип түшкөн. Анда таштанды салынган челектен жаңы төрөлгөн баланын жансыз денеси табылгандыгы, анын зордук менен өлтүрүлгөнү айтылган. Бул туурасында ИИМдин басма сөз кызматы билдирет.

Милиция кызматкерлеринин ыкчам-иликтөө иштеринин натыйжасында Нарын облусунун 30 жаштагы М.М. аттуу тургуну кармалган.

Аталган факты боюнча Ленин райондук ИИБ тарабынан 100-статья (эне тарабынан жаңы төрөлгөн наристени өлтүрүү) боюнча кылмыш иши козголуп, тергөө жүрүүдө.

Свердлов райондук ички иштер бөлүмүнүн кызматкерлерине Бишкек шаарынын жашоочусу арыз менен кайрылган. Себеби, ушул жылдын 20-сентябрында болжол менен саат 10:00 чамасында соода-борборлордун биринен белгисиз жарандар арыздануучунун чөнтөгүнөн баасы 11 000 миң сомдук “Самсунг” үлгүсүндөгү уюлдук телефонун уурдап кеткен. Бул туурасында Бишкек ШИИББнин Басма сөз кызматы билдирет.

Милиция кызматкерлери тарабынан кылмыштын изин суутпай, кылмышка шектүү катары Чүй облусунун 29 жаштагы жашоочусу кармалган. Кылмышка шектүү тергөө бөлүмүнө өткөрүлүп берилип, иликтөө иштери башталды.

Ошондой эле, милицияга жаран кайрылып, белгисиз адамдарга карата чара көрүп берүүлөрүн суранган. Себеби, ушул жылдын 20-сентябрь күнү болжол менен таңкы саат 05:30 чамасында Жибек-Жолу көчөсүндө токтоп турган “Ауди” үлгүсүндөгү автоунаасынан “LG” үлгүсүндөгү уюлдук телефонун уурдап кетишкен. Жабырлануучуга келтирилген жалпы чыгымдын суммасы 9 000 миң сомду түзгөн.

Милиция кызматкерлери тарабынан көрүлгөн ыкчам-иликтөө иш-чараларынын натыйжасында кылмышка шектүү катары Бишкек шаарынын 19 жаштагы С.А., 23 жаштагы Ж.П. жана Чүй облусунун 19 жаштагы С.А. аттуу тургундары кармалган.

Кармалган жарандар тергөө бөлүмүнө өткөрүлүп, тергөө амалдары жүрүүдө.

Баткен облусунун Кадамжай районуна караштуу Жаңы-Коргон айылында 500гө жакын жергиликтүү тургундар менен милиция кызматкерлери турак үйлөргө кирип жүргөн белгисиз адамды издеп чыгышкан. Бул тууралуу Жаңы-Коргон айылынын тургундары билдиришти. Алардын айтымында, издөөгө чыккандар айылды тинтип жатышат. Изделип жаткан киши узун бойлуу, сакалы өскөн. Дайыма башын ороп-чулгап, бетин көргөзбөй жашырып жүрөт. Элеттиктер аны аз күн мурун айылдан көрүшкөн. Көп өтпөй эле Баткен облусттук милициясы айылда изделип жаткан белгисиз киши Баткен районунун Таян айылынын 1972-жылы туулган тургуну С.Абдумалик экендигин кабарлаган. Маалыматка караганда, ал 9-сентябрь күнү саат 22:15 чамасында Бирлик айыл аймагынын Кичи-Айдаркен айылында 32 жаштагы А.Г. аттуу аялды эч бир себепсиз уруп качып кеткен. С.Абдумаликтин туугандары анын психикалык жактан жабыркап жүргөндүгүн билдиришкен.

Булак: “Фабула”

Ош шаарынын милициялары карактоого шектелген эки жигитти кармашты. Милициялар билдиргендей, ушул жылдын 14-майында Ош шаарында 2003-жылы туулган кыз үйүнө кирип бара жатканда белгисиз бирөөлөр мойнуна бычак такап токтоткон. Кыз үйүндө жалгыз экенин билген кылмышкерлер акча салынган сейфтин ачкычын талап кылган. Алардан корккон кыз эс-үчүн жоготуп жыгылган. Ал эми кол салгандар сейфтен 13 миң доллар акча, 160 миң сомдук билерик, аялдар тагынуучу 56 миң жана 89 миң сомдук чынжырчаларды алып, куйрук түйүшкөн. Учурда кыздын абалы жакшы. Окуя тууралуу милиция кызматкерлерине окуучу кыздын апасы билдирип, ошондон тарта ыкчам иликтөө иштери башталган. 4 айга созулган издөө иштеринин жыйынтыгында шектүүлөр — Кара-Кулжанын 2000-жылы туулган туругуну менен Жалал-Абад облусунун 1998-жылы туулган тургуну 16-сентябрда кармалышкан. Учурда кармалгандар камакка алынып, тергөө иштери улантылып жатканы маалым болду.

Булак: “Фабула”

Талас шаарында 1953-жылы туулган жаранды 1981-жылы туулган неме сабап өлтүргөн. Окуя 17-сентябрда болгон. Маалым болгондой, экөө арак достордон болгон. Ичип отурушуп уруша кетип, жаштыкка салып улуусун бөтөлкө менен чаап, сабап жатып өлтүрүп алган. Азыркы учурда чоң муштум камакка алынган.

Булак: “Фабула”

Бишкекте эки айдоочу жол талашып бири экинчисине ок чыгарды. Бул туурасында Бишкек шаардык ИИББнын басма сөз кызматы билдирет.

Маалыматка ылайык, окуя 21-сентябрдын кечинде Ахунбаев жана Жукеев-Пудовкин көчөлөрүнүн кесилишинде болгон.

“Хонда фит” жана “Мерседес” унааларынын айдоочулары жол талашып урушушкан. Биринчи унаанын айдоочусу пневматикалык тапанча алып чыгып оппонентин аткан.

Жыйынтыгында экинчи айдоочу ийининен жаракат алган.

Окуя болгон жерге келген патрулдук милиция кызматкерлери эки айдоочуну тең кармап кетишкен, учурда алар азыр тергөө астында.

Россиядагы кыргыз мигрантарынын саны быйыл 27 пайызга көбөйдү. 2017-жылдын сегиз айында 365 миң кыргыз жараны Россияга кеткен. Бул тууралуу Кыргызстандын миграция кызматы жаңыдан маалымдады. Жыл башынан бери мигранттар тарабынан 1 миң 419 кылмыш жасалган. Анын 246сы оор, 374у талап-тоноо, 85и экономикалык кылмыш, 55и маңзатты сатуу аракетине жана 11 террордук акты боюнча иш козголгон. Кыргызстандыктарга 1638 жолу 66,8 миллион рубль айыппул салынган. Жыл башынан бери 27 кыргызстандык Россиядан чыгартылган.

Булак: “Азия Ньюс”

Бул туурасынада аталган ОИИБнин Басма сөз кызматы билдирет.

Маалыматка ылайык, Баткен шаардык ички иштер бөлүмүнө 45 жаштагы О. А. аттуу тургун арыз менен кайрылган. Себеби 2017-жылдын 19-сентябрь күнү болжол менен саат 22:30 чамасында үйүнүн алдында токтоп турган “Хондай-Портер” үлгүсүндөгү автоунаасын белгисиз адамдар уурдап кеткен.

Баткен ОИИБнин жана ШИИБнин кызматкерлери тарабынан жүргүзүлгөн ыкчам иш- аракеттердин натыйжасында кылмыш изи сууй электе Баткен районунун Самаркандек айылынын 33 жаштагы Н.М. аттуу тургуну кармалган.

Жогорудагы факт боюнча Кыргыз Республикасынын кылмыш-жаза кодексинин 172- беренесинин (Автомобилди же башка автомототранспорт каражатын укукка жат түрдө ээлеп алуу) негизинде кылмыш иши козголуп, кылмышка шектүү убактылуу кармоочу жайга киргизилген. Учурда тергөө амалдары жүрүп жатат.