КРИМИНАЛДЫК ХРОНИКА ЖАНА ОКУЯЛАР

Орзубек Назаровдун кызы Бишкек шаарынан жол кырсыгына кабылып, учурда оор абалда жатат. Негизги күнөөкөр мотоцикл айдаган айдоочу. Бирок, бул кырсыктын болушуна себепкер «102» кайгуул милициясынын машинеси болгонун Бишкек шаардык патрулдук милиция башчысы Талантбек Барпиев жашырып жатканы кандай? Бизге жеткен маалыматтарга караганда Улан аттуу жигит башкарган МВД-300 унаасы мотоцикл унаасын кууп келе жатканда каршысындагы машинени сүзүп кырсыкка кабылган. Анын кесепетинен Орзубек Назаровдун кызы оор жаракат алган. Негизинен «102» кызматтык унаасы машинелерди кууганга укугу да, акысы да жок экен. Бул деген чыныгы «беспредел» болуп саналат. Көпкөндүктүн да, наглыйлыктын да чеги болуш керек. Кан коё бербейт…

Булак: “Ачык саясат”

«Мыйзамдагы ууру» Камчы Көлбаевдин уюшкан кылмыштуу тобунда абал жакшы эмес дешет. Жакында эле разборка болуп, Чолпон-Атаны кармаган таасирдүү жигити өз билгенин кылып аша чаап кеткендиктен, салыктарды каалагандай калчап, чектен чыккандыгынын айынан аны Камчы Көлбаев өз колу менен жанчып, чалажан кылып салганын жергиликтүү тургундар айтышты. Демек, акыйкат иштебеген, «общактын» акчасына кол салган тентек балдарын Камчы тазалай баштаганы бир топ нерседен кабар берет…

Булак: “Ачык саясат”

2017-жылдын 19-август күнү болжол менен саат 20:30 чамасында Панфилов районунун ички иштер бөлүмүнүн нөөмөт бөлүмүнө Панфилов районунун Чолок-Арык айылындагы үйлөрдүн биринде азиат улутундагы эркек кишинин жансыз денеси табылгандыгы тууралуу маалымат келип түшкөн. Бул туурасында Чүй ОИИББнин Басма сөз кызматы билдирет.

Аталган окуя боюнча Панфилов районунун ИИБнин ыкчам-тергөө тобу көрсөтүлгөн дарекке чыгышып, жансыз денеге кароо жүргүзүү учурунда анын данесинде бир нече жаракаттар табылып киши колдуу болуп өлтүрүлгөндүгү аныкталаган. Анын өздүгүн тактоо учурунда ал 77 жаштагы А.М. аттуу жергиликтүү тургун экендиги такталып, чогултулган материалдардын негизинде Панфилов райондук ИИБнин тергөө кызматы тарабынан Кыргыз Республикасынын кылмыш-жаза кодексинин 97-беренеси (адам өлтүрүү) боюнча кылмыш иши козголуп, жансыз денеге соттук медициналык, соттук биологиялык жана соттук дактилоскопиялык экспертизалар дайындалган.

Териштирүү учурунда каза болгон А.М. үйүндө жалгыз жашагандыгы аныкталып, анын 70 миң сом акчасы, паспорту, пенсиондук күбөлүгү жана кийимдери жоголгондугу маалым болгон. Панфилов райондук ИИБнин кызматкерлери тарабынан жүргүзүлгөн ыкчам иш-аракеттердин натыйжасында жогорудагы кылмышка шектүү делип, мурда соттолгон Жайыл районунун 48 жаштагы жашоочусу Б.И. кармалган.

Тергөө учурунда ал күнөөсүн моюнуна алып, бул кылмышты жасаганда жанында Акжол аттуу жаран болгондугун билдирип, алар уурулукка киришип, аларды көрүп калгандыктан үйдүн ээсин өлтүрүшкөнүн айткан. Кармалган жарандын үйүн текшерүү учурунда, уурдалган акча каражаты, андан сырткары 50 грамм салмактагы өзгөчө жыты бар баңги заты сыяктуу зат табылган.

23-август күнү Панфилов райондук ИИБнин кызматкерлери тарабынан жогорудагы кылмыш ишине шектүү делип 33 жаштагы А.А. аттуу экинчи жаран кармалган. Кармалган жарандар Панфилов райондук ИИБнин убактылуу кармоочу жайына камакка алынган. Учурда тергөө иштери жүргүзүлүүдө.

Талас райондук ишки иштер башкармалыгынын тергөө бөлүмү тарабынан катталган Талды-Булак айылынын жанындагы сарайлардын биринде адам өлтүрүү фактысы боюнча ыкчам-иликтөө иштери жүргүзүлгөн. Бул туурасында ИИМдин Басма сөз кызматы билдирет.

22-август күнү болжол менен саат 23:00 чамасында Талас районунда жайгашкан сарайлардын биринде ичимдик ичип алган жаран мас абалында өзүнүн жубайын сабап, жубайы алган жаракатынан улам каза болгон.

Окуя болгон жерге Талас райондук ишки иштер башкармалыгынын ыкчам-тергөө тобу келген. Милиция кызматкерлери тарабынан көрүлгөн чаралардын натыйжасында малчы болуп иштеген 1979-жылы туулган Токтогул районунун жашоочусу кармалган. Маалымат боюнча жолдошу үйүнө мас абалында келип, жубайын эч себепсиз ур-токмокко алган. Мурда да сабап жүргөндүгү белгилүү болду.

Жогорудагы факты боюнча Кыргыз Республикасынын кылмыш-жаза кодексинин 97-беренеси (адам өлтүрүү) боюнча кылмыш иши козголуп, кармалган жаран убактылуу кармоочу жайга жеткирилген.

Тергөө учурунда шектүү жарандын мурдагы аялына кол көтөрүп жүргөндүгү жана өлгөн аял экинчи жубайы экендиги аныкталган. Алдын ала маалымат боюнча мурда Токтогул районунда жашап жүргөн маалында биринчи аялына дагы кол көтөрүп, натыйжада ал алган жаракаттардан каза болгон. Кыргыз Республикасынын кылмыш-жаза кодексинин 104-беренеси ( ден соолукка атайылап оор залал келтирүү) боюнча эркинен ажыратылган. Анадан кийин жарандык никеде жашаган аялын уруп сабап, кийин 105-берене (ден соолукка атайылап анча оор эмес залал келтирүү) менен эркинен ажыратылган. Абактан чыккандан кийин, жабырлануучуга үйлөнүп, көнүмүш адатын кайра баштаган. Бул никеде ортосунда балдары бар болгон. Учурда оор кылмыш иши бонча тергөө амалдары жүрүп жатат.