КРИМИНАЛДЫК ХРОНИКА ЖАНА ОКУЯЛАР

Кечээ, 20-августта болжол менен саат 12-30да Бишкек шаардык ИИББ нөөмөт кызматына белгисиз адам телефон чалып, “Айчүрөк” соода борборунда жарылуучу зат коюлгандыгы тууралуу маалымат берген. Бул тууралу МУККнын басма сөз кызматы билдирет.

Имаратты текшерүүнүн жыйынтыгында кандайдыр бир жарылуучу зат табылган жок.

Ыкчам-издөө иш чараларынын алкагында жалган телефон чалууну ишке ашырган 1990-жылы туулган, КР жараны “С.Т.” аныкталды.

Учурда материалдар аталган адамга карата кылмыш ишин козгоо үчүн МУКК башкы тергөо башкармалыгына өткөзүлүп берилди.

Бүгүн, 21-августта Праганын белгилүү гезиттеринин бири  “Лидове Новины” Чехиянын атайын коопсуздук кызматы КР президентинин аппарат башчысы Сапар Исаковдун үстүнөн тергөө-иликтөө иштерин башташканын билдирди.

Сапар Исаковдун азыр Чехияда текшерүүгө алынган шектүү “Лигласс  трейдинг” компаниясынын афераларына, арам акчаларды адалдоого жана башка транзакцияларга  катыштыгы, ошондой эле Чехияда жана Европанын башка өлкөлөрүндө кыймылсыз мүлктөрдү сатып алууга тиешеси текшерилүүдө.

Эсиңиздерге сала кетсек, буга чейин Сапар Исаков Чехиянын банкрот болгон “Лигласс  трейдинг” компаниясын Кыргызстанда Жогорку-Нарын ГЭС каскаддарынын Ак-Булуң ГЭСин жана Нарын 1 ГЭСин, 14 чакан ГЭСти, ошондой эле Камбар-Ата – 1 ГЭСин курат деп алып келип, тендерде жеңүүчү болуп чыгышына шектүү катары Кыргызстанда жана Чехияда чуу жараткан.

Анткени Чехияда банкрот болуп, акчасы жок эсептелген “Лигласс  трейдинг” компаниясы Кыргызстанда 1 миллиард долларга ГЭСтерди курам, Кыргызстандын Россияга болгон 37 миллион доллар карызын төлөп берем деп күпүлдөп чыккан.

Эксперттердин айтымында “Лигласс  трейдинг” компаниясынын капчыгында чын эле мындай акча жок. Акча Кытайдан келет. Анткени Кытай көп жылдан бери Нарындагы Жетим-Тоо темир кенин иштетүү укугун Кыргызстандан алалбай жүрөт. Алтургай кыргыз-кытай чек арасына жакын Артуш шаарына темир иштетүүчү ири заводду да куруп коюшкан. Кыргыз коомчулугу көп жылдардан бери Жетим-Тоо темир кенин кытайлар иштетүүсүнө каршы чыгып келүүдө жана ал жерге лицензия алып иштетүүгө көчүп келишкен кытайларды 2009-жылы Жетим-Тоодон кууп чыгышкан. Эми азыр кытайлар ГЭС курат, Жетим-Тоону иштетет десе элдин баары чалкасынан кетет.

Ошондуктан Европалык “Лигласс  трейдинг” банкрот компаниясын табышкан. Ал компания Кыргызстандагы жогоруда аталган ГЭСтерди куруп, Кыргызстандын Россияга болгон 37 миллион долларын төлөп берип, эң башкы жашыруун максаты – миллиарддаган долларды чапчыган Жетим-Тоо темир кенин алат. Жетим-Тоо кени өзүнүн запасы боюнча дүйнөдө 3-орунда турган эң ири темир кендеринин бири. Бирок мунун артында шектүү Кытай компаниялары турат. Акчаларды ошолор төлөйт жана пайданы да ошолор табат. Долбоордо “Лигласс  трейдинг” компаниясынын аты гана болот. Бул кыргыз коомчулугун Жетим-Тоо темир кенин иштетүү укугу Кытайга эмес, Кыргызстанда ГЭСтерди курган Европалык компанияга берилди деп жооткотуу үчүн гана ойлоп табылган.

Мына ошондуктан Чехияда банкрот болгон “Лигласс  трейдинг” компаниясынын мындай чоң долбоорлорго аралашышы шек жаратып, Чехиялык атайын кызматтар “Лигласс  трейдинг” компаниясын арам акчаларды адалдоого шектенип, текшерип жатат.

Булак: Кyrgyztoday.kg

Оштун Өзгөн районунун Салам-Алик айыл өкмөтүндөгү Кош-Этер айылында жашаган Баатырбек Төрөгелдиев аттуу жаран кызынын өлүмүн күйөө баласынан көрүүдө. Анын маалыматында 21 жаштагы кызы Мээримгүл Ноорузбек аттуу балага турмушка чыкканына 49 күн өткөндөн кийин кызынын муунуп көз жумганын уккан. Бирок кызынын денесинде көгала тактары болгондуктан, ал муунбай эле ур-тепкиге алынып көз жумган деп эсептейт. Күйөө баласы болсо муунуп өлгөнүн айтат. Сот болсо ишти бир беткей кароодо деп кыздын атасы райондук сотко нааразы.

Булак: “Фабула”

Милиция кызматкерлери тарабынан оор кылмыштын бети ачылды. Бул туурасында ИИМдин басма сөз кызматы билдирет.

2017-жылдын 17-август күнү “102” кызматына шаар тургуну Гоголь-Жумабеков көчөлөрүнүн кесилишинде канжалаган жигиттин жатканын кабарлаган.

Окуя болгон жерге милиция кызматкерлеринин ыкчам-иликтөө тобу барганда, жигиттин жанында канга боёлгон таш жана колу кан болгон кыз турган. Андан соң жаш жигит жолдон ооруканага жетпей каза тапкан. Жогорудагы факты боюнча Свердлов райондук ИИБдин тергөө бөлүмү тарабынан Кыргыз Республикасынын кылмыш-жаза кодексинин 104-беренесинин 4-бөлүмү (ден соолукка атайын оор залал келтирүү) боюнча кылмыш иши козголгон. Аталган кылмышка шектүү делип 22 жаштагы А.А. аттуу кармалып, Бишкек ШИИБдин убактылуу кармоочу жайына камалган. Учурда иликтөө иштери уланууда.

Бүгүн, эртең мененки саат 6:30 дарда борбор калааны Горький жана Айтматов (мурунку Тынчтык проспекти) көчолөрүнүн кесилишинде унаа кырсыгы катталды. Анда беш автоунаа кагылышкан.

Тез жардам кызматы келгичекти эки адам ошол жерден жан берген. Тез жардам кызматкерлеринин берген маалыматына караганда жаракаттар өтө оор болгон.

“Бир адам мас абалында экен, аны милиция алып кетти. Калган жүргүнчүлөр жардамдан баш тартышты. Алардын жеңил гана жараттары болгондуктан биринчи медициналык жардам көрсөтүлдү” – деп билдиришкен алар.

Бишкек шаардык ИИБси берген маалыматка ылайык, «Тойота Виндом» автоунасынын айдоочусу 1989-жылы туулган К. Н., светофордун кызыл жарыгында токтоп турган «Мазданы» артынан келип сүзгөн. Сүзүлгөн унаа алдыда турган бир нече машиналарды да илип кеткен. “Мазданын” ичиндеги эки адам, айдоочусу жана жүргүнчүсү дароо каза болушкан.

«Тойота Виндом» машинасынын айдоочусу Ленин райондук милициянын кызматкери экендиги жана мас абалында болгондугу такталды.

https://www.facebook.com/100001003433927/videos/1488775784499188/