КРИМИНАЛДЫК ХРОНИКА ЖАНА ОКУЯЛАР

Октябрь райондук ички иштер башкармалыгына Бишкек шаарынын жашоочусу арыз менен кайрылып, ушул жылдын 22-июль күнү кичи райондордун биринен “Мерседес-Бенс” үлгүсүндөгү автоунаасы уурдалгандыгын билдирген. Бул туурасында Бишкек ШИИББнин Басма сөз кызматы билдирет.

Бишкек ШИИББдин кызматкерлеринин ыкчам иликтөө иш-чарасынын жүрүшүндө кылмышка шектүү делип Ысык-Көл облусунун 1995-жылы туулган К.Т. жана М. Б. аттуу жашоочулары кармалган.

Жогорудагы факты боюнча Октябрь РИИБнин тергөө бөлүмү тарабынан Кыргыз Республикасынын кылмыш-жаза кодексинин 172-беренеси (Автоунааны же башка автомототранспорт каражатын укукка жат түрдө ээлеп алуу) боюнча кылмыш иши козголгон. Кармалган жарандар убактылуу кармоочу жайына камалышып, тергөө иштери жүрүүдө.

2017-жылдын 11-августунда Ноокат районунун Ак-Терек айылындагы Кескен-Бел аймагында саат 22:30 чамасында киши колдуу болуп өлгөн болжол менен 25-30 жаштагы жарандын жансыз денеси табылып, өздүгүн тактоо максатында соттук-медициналык экспертиза жүргүзүү үчүн Ош облусунун моргуна жөнөтүлгөн. Бул туурасында ИИМдин Басма сөз кызматы билдирет.

Жогорудагы факты боюнча Кыргыз Республикасынын кылмыш-жаза кодексинин 97-беренесине (адам өлтүрүү) ылайык кылмыш иши козголгон.

Ош облусунун ички иштер башкармалыгынын жана Ноокат районунун ички иштер бөлүмүнүн ыкчам-иликтөө кызматкерлери өлгөн жарандын өздүгүн тактоо жана кылмыш ишинин бетин ачуу максатында иликтөө иш-чарасын уюштурушкан.

Милиция кызматкерлеринин ыкчам-иликтөө ишинин натыйжасында мурда дайынсыз жоголуп, издөөдө жүргөн Ош шаарынын 25 жаштагы Т.А. аттуу жараны экендиги аныкталган.
Ошондой эле, Свердлов райондук ички иштер бөлүмүнүн кызматкерлери тарабынан жүргүзүлгөн иликтөө иш-чарасынын негизинде Бишкек шаарынын аймагында жайгашкан Тери заводдун жанынан Т.Ага таандык «Лексус IS 200» үлгүсүндөгү автоунаасы табышып, айып пул төлөөчү жайга жеткирилген.

Ыкчам-иликтөө иш-чарасынын жүрүшүндө жогорудагы кылмыш ишине тиешеси бар Балыкчы шаарынын 22 жаштагы А.Р. менен Талас районунун 21 жаштагы К.Т. аттуу жашоочулары кармалган. Тергөө учурунда А.Р. аттуу жаран өзүнүн көрсөтмөсүндө 29-июль күнү Балыкчы шаарынан Ош шаарына армияда чогуу кызмат өтөгөн досторуна жолукканы келишкенин билдирген. Акча жаатында А.Р. аттуу жаранда көйгөй жаралып, акча маселесин чечүү максатында досуна жолугат. Жолугушууда экөө автоунааны уурдап келип, сатып жиберүү тууралуу сүйлөшүшөт. 5-август күнү болжол менен саат 20:30 чамасында А.Р. менен К.Т. аттуу шектүүлөр Анар районуна келишип, «Лексус IS 200» үлгүсүндөгү автоунаанын токтоп турганын көрүшөт.

Автоунаанын ичинде отурган жаранга Араван районунун Гүлбар айылына жеткирип коюну суранышкан. Араван районуна жакындап калганда токтотуп коюну айтышып, токтоткондон кийин А.Р. жана К.Т. аттуулар айдоочуну муунта баштайт. Айдоочу эсин жоготуп койгондон кийин, автоунаанын артына салып, кийин айдоочунун жансыз денесин таштап кетишип, автоунааны айдап Бишкек шаарына сапар алышат. Келгенден кийин аталаш бир тууганын сатып берүүсүн суранат, бирок оң жооп албагандан кийин шаардын четине алып барып таштап кетишкен. Шектелүүлөр кайра 12- август күнү Ош шаарына келишкен. Тергөө амалдары жүрүп жатат.

Кыргыз Республикасынын ИИМдин кызматкерлери Ысык-Көл облусунун аймагында опийим өсүмдүгүн өстүрүп жүргөн 49 жаштагы Жети-Өгүз районунун жашоочусун кармашкан. Бул туурасында ИИМдин Басма сөз кызматы маалымдайт.

Шектүүнү текшерүү учурунда опийимди өзүнүн керектөөсүнө колдонуу үчүн өстүргөнүн билдирген.

Милиция кызматкерлери 42 түп опийим өсүмдүгүн экспертизага жөнөтүшүп, жалпы салмагы 3 килограммдан ашык “опийим” баңгизаты экендиги аныкталган.

Жогорудагы факты боюнча Кыргыз Республикасынын кылмыш-жаза кодексинин 250-беренесинин (баңгизаттарын камтыган өсүмдүктөрдү айдоо жана өстүрүү) негизинде кылмыш иши козголгон. Кармалган жаран убактылуу кармоочу жайга киргизилип, тергөө амалдары жүрүп жатат.

Кадамжай шаарында 23 жаштагы айдоочу унаасы менен сүзгөн 11 жаштагы кыз ооруканадан көз жумду. Маалым болгондой, 11-августта саат 19:15 чамасында Кадамжай шаарындагы Пүлгөн айылынын 23 жаштагы тургуну башкарган машине борбордук А.Орозбеков көчөсүндө бара жатканда башкаруусун жоготуп, 11 жаштагы кызды сүзүп токтогон. Жабырлануучу оор абалда Кадамжай аймактык ооруканасына жеткирилип, бирок дарыгерлердин аракетине карабастан көз жумган. Бул кырсык боюнча тиешелүү органдардын өкүлдөрү иштеп жатат.

Булак: “Фабула”