КРИМИНАЛДЫК ХРОНИКА ЖАНА ОКУЯЛАР

2017-жылдын 28-июль күнү “Кара-куурай” аталышындагы рейд иш-чарасы учурунда Кыргыз Республикасынын ички иштер министрлигинин баңгизаттарды мыйзамсыз жүгүртүүгө каршы күрөшүү кызматы менен Чүй облусунун ИИББнын жана Жайыл районунун ИИБнүн баңгизаттарды мыйзамсыз жүргүртүүгө каршы күрөшүү кызматынын кызматкерлери менен биргеликте Жайыл районунун Сосновка айылындагы стационардык тосмодон ыкчам иш-аракеттерди жүргүзүү учурунда “Фольксваген-Пассат” үлгүсүндөгү автоунаа текшерүүгө токтотулган. Бул туурасында ИИМдин Басма сөз кызматы маалымдады.

Унаанын айдоочусу 24 жаштагы А.Н. жана эки жүргүнчү болгон. “Алиша” жана “Нани” аттуу иттердин жардамы менен жогорудагы автоунаага тинтүү жүргүзүү маалында капоттун алдынан сумка табылып ичинен 12 даана пакетке салынган өңү жашыл -күрөң түстөгү жапайы кара-куурай жыттанган заттар табылып, жалпы салмагы 7 килограмм 482 граммды түзгөн. Жогорудагы факты боюнча Кыргыз Республикасынын кылмыш жаза кодексинин 246-беренеси “Башкага берүү максатын көздөбөстөн баңги каражаттарын же психотроптук заттарды мыйзамсыз даярдоо, сатып алуу, сактоо, ташуу же жөнөтүү” боюнча кылмыш иши козголуп жогорудагы кылмышка шектүү делип, Ош облусунун 40 жаштагы Ш.Р. жана 32 жаштагы Б.Т. аттуу тургундары кармалган. Кармалган жарандар Жайыл районунун ИИБнүн убактылуу кармоочу жайына камакка алынып, учурда тергөө иштери жүргүзүлүүдө.

Президентти кайтарган УКМКнын 9-башкармалыгынын 2011-2015-жылдардагы начальниги Замир Сабаев менен анын орун басары Зоотбай Добаевге КР Кылмыш-жаза кодексинин “Алдамчылык” (Мошенничество) беренеси менен кылмыш иши козголгонун  “Заноза” сайты жазып чыкты.

2011-жылы жаңы бийлик мурунку Бакиевдердин учурундагы  Мамлекеттик кайтаруу кызматын жоюп, анын ордуна КР УКМКнын алдында өлкөнүн 1-кишилерин кайтаруучу 9-башкармалыкты түзүшүп, ага Замир Сабаев менен Зоотбай Добаевди жетекчиликке дайындашат.

Ошол эле, 2011-жылы Замир Сабаевге генерал-майор деген наам беришет.

Ошол эле, 2011-жылы жаңы бийлик “Тунгуч” кичирайонунда жаңы курулган үйдөн УКМКнын 9-башкармалыгынын кызматкерлерине бир нече кызматтык квартира бөлүп берет. Учурдан пайдаланып башкармалыктын жетекчилери Замир Сабаев менен Зоотбай Добаев өздөрүнүн квартиралары бар экенине карабай документтерди жашырышып, бурмалашып дагы бирден квартира бөлдүрүп алышат. Буга албетте такыр эле квартирасы жок кызматкерлер нааразы болуп калган.

2012-жылы 3-октябрда депутаттар Камчыбек Ташиев менен Талант Мамытов Ак үйдүн тосмосунан секирип ашып өтүшкөндө аларды  стратегиялык объектини кайтарган жигиттери менен Замир Сабаев  тосуп алып, Камчыбек Ташиевге каршы күч колдонот.  Бирок спорт менен достошкон депутат Талант Мамытов Сабаевди жаткыра чабып, басып кетет.

Бул окуяны уккан Ички иштер министринин орун басары, генерал Мелис Турганбаев: “…. менин братымды сабаган Мамытовду талкалап келгиле”  деп Сабаевге атайын бөлүмдүн (спецназ)  5 кызматкерин кошуп жөнөтөт. Жарым түндө депутаттык үйгө келишкен Сабаев менен 5 кызматкер жалгыз Талант Мамытовду баса калышып сабап кетишет. Сабоого күбө болгон кошуна депутат Надира Нарматова бул окуяны парламенттен да жарыя кылып айтып бергени бар. Баса, Замир Сабаев кыргыздын калмак уруусунун төбөсү көрүнгөн мыкты жигиттеринин бири деген маалымат бар.

2013-жылы Замир Сабаев мамлекеттик кызматкер катары декларация толтурганда үй мүлкү көрсөтүлбөгөн.

2014-жылкы декларацияда 4 жер тилкеси, 1 жеке менчик квартира, 1 кызматтык квартира катталган.

2017-жылы 7-июнда КР Аскердик прокурорунун орун басары Белек Маматбаевдин макулдугу менен Замир Сабаев жана Зоотбай Добаевге каршы УКМКнын 9-башкармалыгынын кызматкерлери жазган арыздын негизинде КР Кылмыш-жаза кодексинин “Алдамчылык” (Мошенничество) беренеси менен кылмыш иши ачылып, тергөө башталды.

Булак: Кyrgyztoday.kg

Үч күн мурун Бишкектеги Асанбай кичи районунда болгон авто кырсыкка өз көзүбүз менен күбө болдук. Анда 1987- жылы Ысык-Көл облусунда туулган Бурул аттуу кызды машине уруп көз жумду. Машиненин айдоочусу жашы отуздан ооп калган орус улутундагы жигит экен. Айдаган машинеси “Форд Транзит” деген машине экен. Ал түштүк магистраль трассасы аркылуу тоо тараптан шаарды көздөй түшүп келе жатып жөө киши өтүүчү жол үстүндөгү сызыктан алдындагы токтогон машинеден буйтайм деп, катуу келе жатканына байланыштуу тормоз тепкенге үлгүрбөй, жол эрежесин так сактап, өз жолунда келе жаткан кызды келип сүзгөн. Кыз сүзгөн жерден беш- алты метрдей алыстыкка учуп барып кара кушу менен асфальт жолго кулаган. Ошончо метр жерге учуп барып кулаганды элестетиңиз, кыз көп өтпөй эле тез жардам унаасы келгенче жан берди. Тез жардам чакыргандан кийин жарым саатка жакын убакытта келди. Экспертизанын тактоосуна караганда айдоочу ичимдик ичкени аныкталган. Эми жазасын алсын.

Булак: “Фабула”

Кыргыз Республикасынын ИИМдин Уюшкан кылмыштуулук менен күрөшүү башкы башкармалыгынын ыкчам кызматкерлери тарабынан кыздардын жеке мүнөздөгү сүрөттөрүн интернетке жарыялайм деп коркутуп, ири өлчөмдө акча талап кылган жаран кармалган. Бул туурасында ИИМдин Басма сөз кызматы билдирет.

Кылмышка шектүү өткөн жылдын ноябрь айынан баштап Бишкек шаарынын 20 жаштагы жашоочусун интимдик мүнөздөгү сүрөттөрүн социалдык тармактарга жарыялайм деп коркутуп, ай сайын 100 АКШ долларын талап кылган. Жабырлануучудан алган акча каражатынын жалпы суммасы 500 АКШ долларын түзгөн. Ал эми ушундай окуяга 20 жаштагы Бишкек шаарынын жашоочусу кабылып, ай сайын 100 АКШ долларын төлөп турганын айткан.

Ошондой эле, 20 жаштагы кыз 2016-жылдын октябрь айында 30-35 жаштагы азиат түспөлүндөгү белигисиз адам социалдык тармактарга өздүк сүрөттөрүн жарыялайм деген коркутуу менен көп суммадагы акча каражаттарын талап кылып, жыйынтыгында 15 000 сом алганын айтып милицияга кайрылган.

Ушул сыяктуу дагы 2 жабырлануучу арызданган.

Жогорудагы фактылар боюнча ИИМдин Уюшкан кылмыштуулук менен күрөшүү башкы башкармалыгынын ыкчам кызматкерлери бир нече ай иликтөө иштерин жүргүзүшкөн. Ыкчам иликтөө иш аракеттеринин негизинде 37 жаштагы Нарын облусунун тургуну, убактылуу Чүй облусунун Ысык-Ата районунда жашаган С.У. аттуу жаран кармалган. Кылмышка шектүү алдамчылык иш-аракеттери үчүн сот жообуна тартылып, уюшкан кылмыштуу топтун мүчөсү катары ИИМдин атайын каттоосунда турган. Жабырлануучулардан акча каражаттарын электрондук капчыкка которуу жана такси кызматтары аркылуу алып жүргөн. Бишкек шаарынын Биринчи май РИИБнын тергөө бөлүмү тарабынан Кыргыз Республикасын кылмыш-жаза кодексинин 170-беренеси (опузалап акча талап кылуу) менен кылмыш иши козголгон. Сот кармалган жаранга карата камакка алуу чечимин чыгарган. 2017-жылдын июнь айынын аягында тергөө иши жыйынтыкталып, С.У. аттуу жаранга опузалап акча талап кылуу күнөөсү коюлган. Биринчи май райондук ички иштер башкармалыгы кылмыш ишин сотко өткөрүп берди.

Республика аймагында жүрүп жаткан «Кара-Куурай» аталыштагы операциясынын жүрүшүндө 27-июль күнү саат болжол менен 11:30 чамасында Жумгал районунун Куйручук айылындагы «Сапаралы» мал базарынын тушунан Жумгал РИИБнин Кызарт милициясынын аймактык бөлүмчөсүнүн кызматкерлери күн батыштан күн чыгышты карай келе жаткан Ысык-Көл облусунун Балыкчы шаарынын тургуну 32 жаштагы А.Б.нын башкаруусундагы ВАЗ-21063 үлгүсүндөгү автоунаасы токтотушкан. Бул туурасында ИИМдин Басма сөз кызматы билдирет.

Автоунааны кароо жүргүзгөндө күбөөлөрдүн катышуусунда автоунаанын салонунан жашыл-сары түстөгү полиэтилен пакетке салынган, өңү кочкул-жашыл түстөгү өзгөчө жыты бар зат табылган. Электрондук таразага тарткан учурда салмагы 1 килограмм 335 граммды түзгөн. Ошол замат унаанын айдоочусун жанындагы жүргүнчүсү менен шектүү катары кармалышып, Жумгал РИИБне жеткирилип, тергөө бөлүмүнө өткөрүлүп берилген. Аталган иш боюнча экспертиза дайындалып, текшерүү иштери жүргүзүлүүдө.

Үстүбүздөгү жылдын 26-июлунда мас абалында бычактан жаракат алган жаран борбордук ооруканага түштү делген маалымат Москва РИИБдин нөөмөт бөлүмүнө келип түшкөн. Жогорудагы кылмыш ишине милиция кызматкерлери ыкчам иликтөө иш-чарасын жүргүзүп, жабырлануучу 30 жаштагы Сокулук районунун Т.Э. аттуу жашоочусу экени аныкталган. Бул туурасында Чүй ОИИББнын Басма сөз кызматы билдирет.

Ыкчам иликтөө иш-чарасынын негизинде окуя болгон жер такталган. 26-июль күнү Москва районунун айылдарынын биринен мас абалында 48 жаштагы К.К. аттуу жаран мурдагы аялынын үйүнө келген жана анын жакын тааныш адамы менен уруша кетип, бычак менен жабырлануучуну жаракаттандырган.

Москва РИИБдин тергөө бөлүмү тарабынан Кыргыз Республикасынын кылмыш-жаза кодексинин 28-берене жана 97- беренелери ( адам өлтүрүүгө аракет кылуу) боюнча кылмыш иши козголду. Кылмыш ишине шектүү делип 48 жаштагы К.К. аттуу жаран кармалып, Москва РИИБдин убактылуу кармоочу жайына киргизилди. Соттук-медициналык экспертиза жүргүзүлүп, тергөө амалдары уланууда.