КРИМИНАЛДЫК ХРОНИКА ЖАНА ОКУЯЛАР

Ош шаардык ички иштер башкармалыгынын кылмыш иликтөө бөлүмүнүн кызматкерлери “Наби барыга” лакап аты менен белгилүү болгон кылмыштуу уюшкан топтун мүчөсүнүн аялы героин баңгизатын мыйзамсыз сактоо фактысы боюнча кармалды. Бул туурасында ОШ ШИИБнын Басма сөз кызматы маалымдайт.

Маалыматка ылайык, соттун чечими менен Ош шаарындагы Р. Абдыкадыров көчөсүндөгү үйлөрдүн бирин текшерүү маалында 1972-жылы туулган Г.Х. аттуу үй кожейкесинин бөлмөсүнөн 1,5 грамм салмактагы героин баңгизаты табылган. Милиция кызматкерлерине ушул үйдө баңгизатын жасоо менен алектенет деген үч жарандан маалымат келип түшкөндөн кийин текшерүүнү чечишкен.
Жогорудагы факты боюнча Кыргыз Республикасынын кылмыш-жаза кодексинин 247-беренесинин (баңгикаражаттарын, эс тутумга таасир берүүчү заттрады жана перекурсорлорду мыйзамсыз даярдоо, сактоо, берүү, алуу, сатуу) негизинде кылмыш иши козголгон.

Андан сырткары, кармалган жаран мурда эки жолу Кыргыз Республикасынын кылмыш-жаза кодексинин 247-беренеси жана 246-беренелери (башкага берүү максатын көздөбөстөн баңги каражаттарын же психотроптук заттарды мыйзамсыз даярдоо, сатып алуу, сактоо, ташуу же жөнөтүү) менен соттолгон. Сот кармалган жаран Г.Х.ны 2 айга убактылуу кармоочу жайга камакка алуу чечимин чыгарды. Учурда иликтөө иштери жүрүп жатат.

Бишкек шаарынын жашоочусу милицияга арыз менен кайрылып, 25-июлдан 26- июлуна карай түнү бейтаныш адамдар үйүнүн кооросунда токтоп турган “Мерседес-Бенц” үлгүсүндөгү автоуунасынын тетиктерин уурдап, изин жашырып качып кетишкен. Свердлов райондук ички иштер башкармалыгынын милиция кызматкерлеринин ыкчам-иликтөө иш-чарасынын натыйжасында кылмышка шектүү катары 22 жаштагы Ыссык-Ата районунун Д.Т. аттуу тургуну кармалып, Бишкек шаарындагы тергөө бөлүмүнө өткөрүлүп берилген. Учурда тергөө амалдары уланууда. Бул туурасында Бишкек ШИИББнын Басма сөз кызматы билдирет.

Ошондой эле, Ленин районунун ички иштер башкармалыгына Бишкек шаарынын жашоочусу кайрылып, арызында 2017-жылдын 1-июль күнү шаардын дүкөндөрүнүн биринен бейтаныш адамдар арыз ээсинин “Самсунг-Гелекси” үлгүсүндөгү уюлдук телефонун уурдап, изин жашырып качып кетишкендигин билдирген. Ыкчам-иликтөө иш-чарасынын натыйжасында милиция кызматкерлери тарабынан кылмышка шектүү катары 17 жаштагы Бишкек шаарынын Ж.А. аттуу тургуну кармалып, убактылу кармоо жайына киргизилди. Жогорудагы факты боюнча Ленин РИИБнин тергөө бөлүмү тарабынан Кыргыз Республикасынын кылмыш-жаза кодексинин 164-беренесине (уурдо) ылайык кылмыш иши козголгон. Учурда тергөө амалдары уланууда.

Сокулук районунун тургуну милицияга арыз менен кайрылган, анда 2017-жылдын 17-июль күнү Совет жана Жумабек көчөлөрүнүн кесилишинен “Нургуль” аттуу аял, арыз ээсинин ишеничине кирип, Корея мамлекетине виза жасап берем деп, 3000 АКШ доллар акчасын алдап алып кеткен. Бул туурасында Бишкек ШИИББнин Басма сөз кызматы маалымдайт.

Маалыматка ылайык, Бишкек шаарынын Свердлов РИИБнын кылмыш иликтөө бөлүмүнүн ыкчам кызматкерлери тарабынан жүргүзүлгөн иликтөө иштеринин натыйжасында  Бишкек шаарынын тургуну 41 жаштагы М.Н. аттуу аял кармалып, тергөө бөлүмүнө өткөрүлдү. Бүгүнкү күндө тергөө амалдары жүрүп жатат.

Кара-Көл шаарчасында эркек киши 7 жаштагы кызды зордуктагысы келген деп айыпталууда.

Бизге жеткен маалыматтарга ылайык, Кара-Көл шаардык прокуратурасына шаар тургуну 1959-жылы туулган К.У. атту аялдан арыз келип түшкөн. Ал 21-июль күнү кечки саат 7де шаардын тургуну эркек киши анын 2010-жылы туулган К.С. аттуу кичинекей кызын курулуп жаткан үйдүн подвалына алып кирип уят нерселерге үйрөткөн.

Бул кылмыш ишине шектүү катары 1973-жылы туулган К.Ж. аттуу жаран кармалып, ал эркек киши кызга акча берем деп алдап, жаңы салынып жаткан үйдүн подвалына алып барып сексуалдык иштерди жасаганы белгилүү болгон.

Жабырлануучу кыздын айтымында эркек киши аны полго жаткызып, үстүнө чыгып, жылаңач чечинип алып жыныс мүчөсүн кыздын денесине тийгизгилеген.

Кыздын апасы зордуктоого аракет кылгандыгы тууралуу айтып арызданган, бирок кылмыш иши 133-берененин 3-бөлүгү боюнча (бузукулук иштер) козголду.

36 жаштагы кыргызстандык Лачын Хакимов Сириядагы согушка азгырган деген айып менен алты жылга кесилди. Бул тууралуу орусиялык маалымат каражаттары жазып чыкты. Ал 2015-жылы Астраханда иштеп жүрүп, ал жактагы мусулмандарды жихадга үндөгөнү үчүн кармалган.

Июнь айынын башында Самара облустук соту дагы бир кыргызстандык жаранды ушундай эле айып менен сегиз жылга соттогон. 23 жаштагы кыргызстандык Рахмонберди Рашидов Сириядагы согушкерлер менен байланышта болуп, телефон аркылуу сүйлөшүүлөрүндө согушка барууга даяр экенин билдиргенден кийин кармалганы кабарланган. Кыргызстандын Орусиядагы элчилиги, ИИМдин өкүлчүлүгү бул маалыматтар боюнча бул өлкөнүн тиешелүү кызматтарына суроо жиберилгенин маалымдашты. Өткөн жылы Санкт-Петербург метросундагы жардырууга шектелип, теги кыргызстандык Акрам жана Аброр Азимов аттуу бир туугандар кармалган.

Булак: “Азия Ньюс”

24-июлда Чолпон-Ата шаарындагы мамлекеттик резиденцияда президент Алмазбек Атамбаевдин маалымат жыйыны болуп өттү.

SUPER.KG порталынын журналисти Автандил Добулбеков өлкө жетекчисине “2012-жылдын 7-апрелинде Бишкекте Аксы жана Апрель окуяларында каза тапкандарга арналып эстелик ачылган. Ошол иш-чарада сиз “Кыргызстандын бийлиги элдин ишенимине таянганда гана күчтүү болорун унутпасын” дегенсиз. Бирок акыркы күндөрү элге карата көбүрөөк нааразычылык, сын айтып, башка мамлекеттерге, сырттагы лидерлерге көбүрөөк ыраазычылык билдирчү болдуңуз…”, – деп суроонун аягына чыга электе президент аны токтотту.

Алмазбек Атамбаев “мен элге качан нааразычылык билдирдим, дароо мисал келтирсең” деди.

Журналист “Казакстандагы ЭКСПО тууралуу айтып жатып, “мен Казакстан ЭКСПОго жумшагандай акча жумшасам, мени тытып жеп коюшмак дегенсиз” деп улантты.

Мындан кийин президент: “Токтой туруңуз, мен анда элди эмес, айрым саясатчыларды айткам. Көзүмө карап туруп, калп айтып жатасыз. Эгерде ошончо каражат жумшасам, айрым саясатчылар жана ЖМКлар митинг кылышпайт беле? Мен сөздөрүмдү бурмалашканын, жалган сөздү жактырбайм. Эч качан калп айткан эмесмин дебейм. Дайыма бир принципти карманып, жубайыма айтып келгем “адам, өзгөчө эркек, аялына гана жалган айта алат” деп. Бул жерде Атамбаев өз эли тууралуу жаман сөз айтып, башка өлкө жетекчилерин мактады деди. Жаш жигит экенсиз, уят эмеспи. Кемчилик кимде болот эле, элде эмес, бийликте болот”, – деди.

Журналист “суроомду аягына чейин берип алсам…” деди эле президент “сөзүмдү бурмалап жатасың, эл ойлоп калат Атамбаев элди жамандап жатыптыр деп” деген жооп кайтарды.

Андан ары журналист суроосунун аяк жагын узатты: “Ошондо кемчилик кимде болуп жатат? Бийликтеби? Же элдеби?”. “Кемчилик кимде болот эле, элде эмес, бийликте болот. Билип жүр!” – деди Алмазбек Атамбаев.

Булак: Супер