ЭКОНОМИКА

Улуттук банктын маалыматына караганда, быйыл майда Кыргызстанга тыштан акча которуулардын көлөмү 17 миллион долларга төмөндөп, 138,6 миллион долларды түздү. Апрелде өлкөгө 170,7 миллион доллар, мартта 191 миллион доллар которулган. Жыл башынан бери мигранттар жиберген акча 615 миллион доллардан ашкан. Ал эми Кыргызстандан башка өлкөлөргө которулган каражат быйыл 119,5 миллион доллар болду. Кыргызстанга тыштан которулган акчанын 90 пайыздайы Орусиядан келет.

Булак: “Фабула”

Транспорт жана коммуникация министрлиги Кара-Балта – Бишкек жолунун 52,2 км. чакырымын оңдоо үчүн 120 миллион 800 миң доллар жумшалаарын билдирди.

Жол куруу иштерине байланыштуу үч миңден ашык дарак кыйылып, 4 300 көчөт отургузулат. Ошондой эле жол жээгиндеги 200дөн ашык кафе, үй, дүкөн сүрдүрүлөт.

Алардын ээлерине компенсация төлөөгө 2 миллион доллар сарпталат. Ошондо бул жол эң кымбат турган жол болот. Бир километр жолго 2 миллион доллардан ашык каражат жумшалат. Бул оңбогондой чоң каражат. Адистер бир километр жол кыйын болсо 500-700 миң доллар болмоктугун айтып келишет. Демек алкы бузуктар такыр эле кулкундарын тыя албай калышкан. Министр Жамшидбек Калилов күптүү болбогон неме көрүнөт. Мамлекет жол салууга ири көлөмдө карыз алып жатса, анын теңинен көбү «кузгундардын» кулкунуна кирип кетип жатса жакшы эмес го. Тиешелүү органдар жол тармагындагы коррупцияны аныктап, кустурчуларын кустуруп камабаса, эл ырыскысына кол салгандардын ыйбаа кыла турган түрлөрү жок.

Булак: “Фабула”

Казак мажилиси Кыргызстанга бериле турган 100 миллион доллар боюнча келишимди колдоду. Бул тууралуу «Уласть» порталы маалымдайт. Эскерте кетсек, бул акчаны Казакстан Кыргызстанга Евразия экономикалык биримдигине кошулгандыгы үчүн техникалык жардам катары берет. Казакстандын финансы министри Бахыт Султановдун айтымында, жардам акчалай, жабдуу, товар жана кызмат түрүндө болот.

Акчанын ар бир бөлүгүн которууда, өзүнчө келишим түзүлөт. Каражат ЕАЭБдин жол картасын ишке ашыруу жаатындагы чараларга гана жумшалышы керек. “Бербестин ашы бышпас” болуп, эки жылдан бери берилбей создугуп келе жаткан каражат кеч болсо да бериле турган болду. Мунусуна да шүгүр дейли.

Булак: “Фабула”

Жогорку Кеӊеште Кыргыз Республикасынын Эсептөө палатасынын 2016-жылдагы иши жөнүндө Кыргыз Республикасынын Эсептөө палатасынын төрагасынын отчёту угулууда. Бул туурасында Жогорку Кеӊештин Басма сөз кызматы маалымдайт.

Эсептөө палатасынын Улукбек Мариповдун айтымында, 2016-жылы Эсептөө палатасын тарабынан 3051 аудиттик объектиге текшерүү жүргүзүлгөн. Анын ичинде 2263 бюджеттик мекеме, 399 чарба жүргүзүүчү субъект, 355 жергиликтүү бюджеттен каржыланган мекеме-уюм бар. Ал эми өткөн жылдагы текшерүүлөрдүн натыйжасында, жалпы суммасы 2,6 млрд сомду түзгөн каржы тартибин бузуулар аныкталып, анын 1,1 млрд сому калыбына келтирилген.

«Мамлекеттик бюджеттин резервддери жана жоготуулары өткөн жылы 13,2 млрд сомду түзсө, анын 1,9 млрд сому кайра кайтарылган. Андан тышкары, натыйжасыз пайдануунун натыйжасында 868 млн сом өлчөмүндө чыгаша аныкталды. Алардын 82 пайызы бюджеттик каражаттарга тиелешүү болуп, жоготуунун 151 млн сому калыбына келтирилди», – дейт Эсептөө палатасынын башчысы.

Жогорку Кеӊештин Транспорт, коммуникация, архитектура жана курулуш боюнча комитети КР Өкмөтү менен Сауд өнүктүрүү фондунун ортосундагы Түндүк – Түштүк альтернативдүү автожолунун курулушун каржылоо боюнча насыялык келишимди жактырды. Бул туурасында Жогорку Кеӊештин Басма сөз кызматы маалымдайт.

Транспорт жана жолдор министрлигинин өкүлү Азимкан Жусубалиевдин айтымында, Түндүк – Түштүк альтернативдүү автожолундагы 24 чакырым жолдун курулушун каржылоо максатында, Сауд өнүктүрүү фондунан 20 млн доллар өлчөмүндө жеӊилдетилген насыя алынууда. Насыяны төлөө мөөнөтү – 25 жыл, пайыздык үстөгү – 1 пайыз. Бул участок 2-категориядагы жол болуп саналат.

Эске салсак, Түндүк – Түштүк автожолунун жалпы узундугу – 433 чакырым. Ушу тапта 74 чакырым жолдун курулушунун каржысы табыла элек. Жол 2020-жылы ишке киргизилет, ал эми 2022-жылы толугу менен кабыл алынмакчы. Жолдун начар бөлүктөрү подрядчиктердин эсебинен калыбына келтирилүүгө тийиш.

Жогорку Кеӊештин Бюджет жана финансы боюнча комитети КР Өкмөтү менен Жапониянын Эл аралык кызматташтык агенттигинин (JICA) ортосундагы «Бишкек – Ош авто жолундагы көчкүдөн коргоо» долбоору боюнча гранттык макулдашууну ратификациялоо боюнча мыйзам долбоорунун концепциясын жактырды. Бул туурасында Жогорку Кеӊештин Басма сөз кызматы маалымдайт.

Транспорт жана жолдор министри Жамшитбек Калиловдун айтымында, Жпониянын гранттык каражатына Бишкек – Ош авто жолунун 246-чакырымындагы кар көчкүдөн коргой турган узундугу 460 метр тоннелдин курулушуна жумшалат. Мындай тоннель жолду көчкүдөн толук коргойт. Бул багытта 38,2 млн доллар көлөмүндө грант бөлүнүүдө.

Андан сырткары, тармактык комитет «Жол техникаларын тейлөө мастерскойлорун өркүндөтүү» долбоору боюнча 4 млн доллар өлчөмүндөгү гранттык каражат боюнча макулдашууну ратификациялоо тууралуу мыйзам долбоорунун концепциясында да жактырды. Ал 20 жылдан бери колдонулуп келаткан жол куруу техникаларын оӊдоого мүмкүнчүлүк берет.