Menu

ЭКОНОМИКА

Каржы министрлиги бирдиктүү казыналык эсепке өтүп, кассалык пландаштыруу усулу киргизүүдө

“Бул тууралуу Жогорку Кеӊештин Бюджет жана финансы боюнча комитетинин бүгүн, 27-мартта Каржы министрлигинде өткөн көчмө жыйынынын жүрүшүндө белгилүү болду” – деп маалымдады КР ЖК Басма сөз кызматы.

Каржы министри Адылбек Касымалиев 2017-жылдын башынан тарта жаӊы Салык кодекси ишке киргизилгенин эске салып, ошондон улам каржылык пландаштыруу усулунан баш тартып, кассалык пландаштыруу усулу киргизилип жатканын билдирди. «Мындайча айтканда, биз азыр «каржыӊа жараша жаша» принцибине өттүк. Казынада канча каражат топтолсо, ошол каражатты гана жумшайбыз. Бул мурда боло келген каржы бөлүштүрүү жаатындагы коррупциялык жосундардан арылууга жол ачат», – дейт ал.

Ал эми депутаттарды бирдиктүү казыналык эсептин иштөө тартиби менен тааныштырган каржы министринин орун басары Алмаз Бакетаев азыр иштеп жаткан мыйзамдарга өзгөртүүлөрдү киргизүү зарылдыгын белгиледи. «Казыналык эсеп киршелер жана чыгашалар бөлүгүнөн турат. Эсеп мурдагыдай коммерциялык банктар аркылуу эмес, казыналыктын өзү аркылуу жүргүзүлө баштады. Ошондон улам, бир топ каражатты үнөмдөөгө мүмкүнчүлүк түзүлдү», – дейт ал.

Мындай демилгени хаккерлерден колдогон депутат Таалайбек Масабиров топтолгон каражаттын коопсуздугун камсыз кыла турган атайын электрондук программа иштеп чыгуу керектигин айтты. Анын пикиринде, ансыз Каржы министрлиги топтолгон каражатты уурдатуу тобокелдигинен кутула албайт.

Белгилей кетсек, министрдин айтымында, ушу тапта Каржы министрлигине караштуу мекемелерде ишти оптималдаштыруу чаралары көрүлүп, 200 кызмат орду кыскартылды.

 

Өткөн жылы мамлекеттик сатып алуулардан 4 млрд 700 млн сом каражат үнөмдөлгөн

КР ЖК Басма сөз кызматынын маалыматына караганда, 2016-жылдын жыйынтыгында мамлекеттик органдар 44070 электрондук сынактын негизинде 43 млрд 520 миӊ сомго аргандай сатып алууларды жүргүзүп, натыйжада республикалык жана жергиликтүү бюджеттерден 4 млрд 700 млн сом үнөмдөлгөн. Бул тууралуу Жогорку Кеӊештин Бюджет жана финансы боюнча комитетинин бүгүн, 27-мартта Каржы министрлигинде өткөн көчмө жыйынынын жүрүшүндө белгилүү болду.

Каржы министрлигине караштуу Мамлекеттик сатып алуулар департаментинин башчысы Улан Даникеев азыркы учурда баардык мамлекеттик органдар менен жергиликтүү башкаруу органдарына 1 млн сомго чейинки сатып алууларды, сынаксыз эле жүргүзүүгө уруксат берүү чаралары иштелип чыкканын билдирди. Андан сырткары, ал мамлекеттик органдар менен жергиликтүү башкаруу органдары өз бюджетинин 3 пайыз өлчөмүндөгү каражатка да сынаксыз сатып алуусуна мүмкүнчүлүк түзүлө турганын кошумчалады.

Мамлекеттик сатып алуулар департаментинин башчысы ушундай чаралардан улам, «Мамлекеттик сатып алуулар жөнүндө» мыйзамга айрым өзгөртүүлөр менен толуктоолорду киргизүү боюнча мыйзам долбоору иштелип чыгып, парламенттин кароосуна киргизилгенин билдирди. Анын айтымында, мыйзамга «атайын тартип», «улуттук режим», демпингдик баа» деген сындуу бир катар жаӊы түшүнүктөр киргизилүүдө. Анткени, улуттук мыйзамды Евразия экономикалык бирлигинин курамына кирген өлкөлөрдүн мыйзамдарына шайкеш келтирүү милдети турат.

Талкуу жыйынтыгында «Мамлекеттик сатып алуулар жөнүндө» КР мыйзамына өзгөртүүлөр менен толуктоолорду киргизүү жөнүндө» мыйзам долбоорунун концепциясы жактырылды.

 

Депутат Акылбек Жапаров: “Алгач ички рыногубузду иретке келтирүү керек болуп жатат”

Бүгүн, 27-мартта Агрардык саясат, суу ресурстары, экология жана регионалдык өнүктүрүү боюнча комитетинин кезектеги жыйыны болду. Бул тууралуу Жогорку Кеңештин Басма сөз кызматы маалымдады.

Комитет жыйынында «Евразиялык экономикалык бирликке интеграциялоо шарттарында ата мекендик өндүрүүчүлөрдү, экспортерлорду коргоо жана аларга колдоо көрсөтүүнүн тартиби боюнча Кыргыз Республикасынын Өкмөтүнө тапшырма берүү жөнүндө» Кыргыз Республикасынын Жогорку Кеңешинин токтомунун долбоору каралып, жактырылды.

Депутат Акылбек Жапаров Евразиядык экономикалык бирликке (ЕАЭБ) кошулуунун негизги максаттарына жетишүүгө коюлган маселелерге токтолду. Ал атаандаштыкка жөндөмдүүлүктү күчөтүү жаатында сатуу рыногун кеңейтүү, товар жүгүртүүнү арттыруу, жаңы жумуш орундарын түзүү жана башка бир катар милдеттерди чечүүгө багытталган биргелешкен аракеттер менен Жогорку Кеңештин КР Өкмөтүнүн аткаруусуна карата тапшырмалар белгиленген токтом долбоору даярдалгандыгын маалымдады.

Талкууда депутат Дастан Жумабеков токтом долбоорунда Кыргызстан аймагына контрабандалык продукциялардын киргизилишине жол бербөө боюнча катуу чараларды көрүү тапшырмасы жакшы белгиленгендигин, чындыгында эле бул контрабанда маселесине өзгөчө көңүл буруу зарылдыгын билдирди. Ошондой эле комитеттин бир катар мүчөлөрү да токтом долбоорун колдоого алып, өз пикирлерин ортого салышты.

Депутат Акылбек Жапаров тармактык комитеттин депутаттары айткан сунш-пикирлер токтом долбоорунда камтылганын белгилеп: “Алгач ички рыногубузду иретке келтирүү керек болуп жатат”,- дейт. А.Жапаров маалыматтарда белгиленгендей, өлкөгө 471 миллион сомдук айыл чарба продукциялары сырттан кирип жатканына токтолуп, мынча акча каражаты өзүбүздө калгандай иш-аракетерди көрүү зарылдыгын, өзүбүздө ишканаларды ачуу керектигин билдирди. Эл өкүлү сунушталган токтомдун алкагында бул багытта атайын программа иштеп чыгып, турмушка ашыруу боюнча тапшырмалар белгиленип жатканын кошумчалады.

Депутат Рада Туманбаева дагы кесиптештерин колдоого алып, токтомдун аткарылышы боюнча кайсы бир мезгилден кийин маалымат угууну сунуш кылды.

Жыйынтыгында кароого киргизилген токтом долбоору сунуш-пикирлерди эске алуу менен жактырылып, Жогорку Кеңештин кароосуна жиберүү чечими кабыл алынды.

 

Кыргызстандын айыл-чарба жана өнөр-жай продукциялары Казакстандын Тараз шаарындагы жарманке-көргөзмөгө коюлат

Кыргызстандын айыл-чарба жана өнөр-жай продукциялары Казакстан Республикасынын Жамбыл областынын Тараз шаарында бүгүн, 25-мартта өтүп жаткан жарманке-көргөзмөгө коюлат. Бул туурасында Кыргыз Республикасынын Өкмөтүнүн аппаратынын маалыматтык камсыздоо бөлүмү маалымдады.

Иш чарага Талас облусунун бардык айыл өкмөттөрүнөн айыл чарба азыктарын өстүргөн дыйкан-фермерлер, ишкерлер катышат. Өкмөттүн Талас облусундагы ыйгарым укуктуу өкүлү Дайыр Кенекеев облустагы дыйкан-фермерлер үчүн жарманкенин мааниси чоң экенин билдирди.

«Анда эки облустун мекеме-уюмдарынын, бизнес өкүлдөрүнүн жана айыл-чарба товар өндүрүүчүлөрүнүн ортосунда мындан ары кызматташуу боюнча келишимдерге жана макулдашууларга кол коюлат. Анын натыйжасында экспорттун көлөмүнүн жогорулоосу болжолдонууда. Мындай келишимдер Талас облусунун социалдык-экономикалык абалынын жакшырышына да өбөлгө түзөт. Эске салсак, Талас облусунун Кара-Буура районунда 9-мартта фитосанитардык жана фетеринардык лаборатория ачылды. Мындай мүмкүнчүлүк менен облустун дыйкандары үчүн азыктарын коңшу мамлекеттерге экспорттоого шарт түзүлдү», – деди Дайыр Кенекеев.

Тараздагы иш-чара маданий концерттик программа менен коштолуп, эки өлкө ортосундагы маданий-гуманитардык кызматташтыкты чыңдоо максатында улуттук буюмдардын жарманкеси да өткөрүлөт.

Эки өлкөнүн аталган облустар ортосундагы соода-экономикалык жана маданий гуманитардык алакаларын бекемдөө максатында өтүп жаткан Казакстандын Тараз шаарында Кыргызстандын айыл-чарба жана өнөр-жай продукцияларынын жарманке-көргөзмөсү Кыргыз Республикасынын Өкмөтүнүн колдоосунда уюштурулууда.

Назарбаев: Өзбекстандын жаңы бийлиги соодадагы бардык тоскоолдуктарды жойду

Бийликке Шавкат Мирзиёевдин келиши менен Өзбекстан соодалашуудагы болгон тоскоолдуктарды алып, «бардык мүмкүнчүлүктөрүн ачты». Мындай пикирин Казакстан президенти Нурсултан Назарбаев өзбек мамлекет башчысынын Астанага болгон сапары маалында билдирди.

«Акыркы беш айдын ичинде эле өлкөлөр ортосундагы товар алмашуу эки тараптан тең 30 пайызга өскөн. Төрт соода үйү ачылып, буудай 30 пайызга, өзбек жашылча-жемиштери 25 пайызга көбүрөөк келди, буга чейин мындай болгон эмес. Мунун баары Өзбекстандын жаңы башчысынын бардык соода мүмкүнчүлүктөрүн ачып, тосколдуктарды алгандыгынын аркасында мүмкүн болуп отурат», – деди Назарбаев.

Казак лидери ошондой эле бүгүнкү күндө Өзбекстан менен Казакстандын ортосунда чечилбеген көйгөй жок экенин белгиледи. Назарбаев эки тараптуу сүйлөшүүлөрдүн жүрүшүндө дээрлик миллиард долларлык 75 келишимге кол коюларын жана мындай көрүнүш алгачкы жолу болорун кошумчалады.

Өз кезегинде Өзбекстан президенти Шавкат Мирзиёев дагы эки өлкөнүн мамилесиндеги кызматташтыктын жаңы баскычы башталганын билдирди.

«Биз дайыма Казакстанды эң жакын жана ишенимдүү коңшу катары эсептеп келебиз. Менин алгачкы сапарларымдын бирин Астанага жасаганым эле көп нерсени айтып турат. Биздин делегациялардын курамында алгачкы жолу парламенттин жана Коргоо министрликтеринин жетекчилери бар. Буга чейин мындай тыгыз кызматташтык болгон эмес», – деди Мирзиёев.

Булак: Борбор Азия жаңылыктар кызматы

ЭВК түркмөн экономикасы сырткы чакырыктардан сак болушу керектигин эскертти

Эл аралык валюта корунун (ЭВК) 6-марттан 17-мартка чейин Түркмөнстанда иштеген миссиясы түркмөн өкмөтү оор сырткы кыйынчылыктарга, анын ичинде мунай менен газга болгон баалардын төмөндөшүнө каршы аракетин улантып жатканын белгиледи.

Эл аралык валюта корунун Мартин Соммер баштаган миссиясынын корутундусунда алгач Түркмөнстан экономикасы үчүн сырткы факторлордун таасирин чектөө боюнча бир катар чараларды, анын ичинде инвестициялык программалардагы мамлекеттин капитал салуу көлөмүн азайтуу зарыл экендиги айтылат. Эксперттер учурда Түркмөнстан эгемендүүлүккө ээ болгон 1991-жылдан берки эң олуттуу экономикалык төмөндөөгө дуушар болуп жатат деп эсептешүүдө.

ЭВКнын божомолуна ылайык, газдын экспортунун көлөмүн көбөйтүү боюнча өкмөттүн аракеттери өлкөнүн экономикасынын турукташына көмөкчү болот, бирок сырткы эсептер боюнча учурдагы операциялардын таңкыстыгы сакталат.

Экономисттердин пикиринде, Түркмөнстандын улуттук экономикасын диверсификациялоонун башкы чаралары болуп ички өндүрүш үчүн шарттарды түзүү, мамлекеттин карамагындагы ишканаларды менчиктештирүү, кичи жана орто бизнести өнүктүрүү, инвестицияларды экономиканын бардык тармактарына текши бөлүштүрүү жана өлкөнүн аймактарын өнүктүрүү эсептелет.

Булак: Борбор Азия жанылыктар кызматы

Forbes: Былтыр казакстандык миллиардерлердин төртөөсүнүн байлыгы көбөйгөн

Forbes журналы жарыялаган дүйнөдөгү эң бай адамдардын кезектеги тизмесине казакстандык беш миллиардер кирип, былтыр алардын төртөөсүнүн байлыгы көбөйгөн.

Рейтингде Казакстандын эң бай адамы катары өлкө президентинин иш башкармалыгынын мурдагы жетекчиси Булат Утемуратов көрсөтүлгөн. Анын байлыгы журнал тарабынан быйыл да 2,3 миллиард долларга бааланган.

Өлкөдөгү экинчи бай адам «Казакмыс» корпорациясынын мурдагы башчысы Владимир Кимдин байлыгы 2,1 миллиард долларды түзгөн. Бул анын былтыркы көрсөткүчүнөн 600 миллион долларга көп. Ошол эле экинчи орунга президент Нурсултан Назарбаевдин кызы менен күйөө баласы Динара жана Тимур Кулибаевдер жайгаштырылган. Алардын да байлыгы 2,1 миллиард долларга бааланып, бир жыл ичинде 100 миллион долларга көбөйгөн.

Журналдын рейтингиндеги акыркы казакстандык, ERG компаниясынын ээлеринин бири, “Евразия банкынын” президенти Алижан Ибрагимовдун байлыгы 1,9 миллиард долларга жетип, бир жылдын ичинде 300 миллион долларга өскөн.

Төрт жыл катары менен дүйнөдөгү эң бай адам деп Microsoft корпорациясынын негиздөөчүсү Билл Гейтс аталып келет. Анын байлыгы акыркы бир жылдын ичинде дээрлик 10 миллиард долларга көбөйүп, 86 миллиард долларга жеткен.

Булак: Борбор Азия жаңылыктар кызматы

Медведев тууралуу иликтөө YouTube каналында 10 миллион көрүүчү топтоду

Оппозиционер Алексей Навальныйдын Орусия премьер-министри Дмитрий Медведев тууралуу тарткан иликтөөсү YouTube каналында он миллиондон ашуун жолу көрүүлдү. Бул федералдык телеканалдардагы айрым программалардын орточо аудиториясынан көп дегенди билдирет.

Навальный жетектеген Коррупцияга каршы күрөшүү фонду тасманы 2-мартта жарыялаган. Иликтөөдө Медведев Орусиядагы элиталык кыймылсыз мүлктөргө мыйзамсыз түрдө ээлик кылганы баяндалган.

Навальный премьер-министрди кайрымдуулук фонддоруна негизделген жана ишенимдүү адамдары тарабынан башкарылган “көп баскычтуу коррупциялык схеманы” түзүүгө айыптаган. Орус өкмөтү бул маалыматка комментарий берүүдөн баш тартты.

Иликтөө жарыялангандан кийин Орусиянын ондогон шаарынын активисттери каршылык акцияларын өткөрүү үчүн маалымкат беришти. Москва мэриясы жүрүш боюнча макулдашуудан баш тартты. Төмөнкү Новгороддун администрациясы алгач коррупцияга каршы митингди өткөрүүгө уруксат берип, бирок кайра бул оюнан кайтты. Екатеринбургдун жергиликтүү бийлиги Медведевге каршы митинг “Орусия Конституциясына каршы” келерин билдирди.

Булак: Борбор Азия жаңылыктар кызматы

Бишкек-Ош жолунун Маданият-Бекабад бөлүгүн реаблитациялоо үчүн Европа өнүктүрүү банкы быйыл 60 млн. доллар каражат бөлдү

Бүгүн, 20-мартта КРнын Транспорт министри Жамшитбек Калилов Бишкек – Ош автомагистралынын төртүнчү фазасына кирген Маданият – Бек-Абад автомагистралынын учурдагы абалы менен жеринде таанышты. Бул туурасында ыйгарым укуктуу өкүлдүн басма катчысы билдирди. Министрди КРнын Өкмөтүнүн Жалал-Абад облсундагы ыйгарым укуктуу өкүлү Кыянбек Сатыбалдиев жана облусттук ПЛУАД -6 ишканасынын жетекчиси Камил Абдыкалыков бирге коштоп жүрүштү.

Базар-Коргон райондук мамлекеттик администрациясынын башчысы – аким Айбек Бегимкулов КРнын Транспорт министри Жамшитбек Калиловдон Борбордук базардын бет маңдайындагы эки тараптуу жолду асфальтоого жана Базар-Коргон – Арстанбап ички жолун тейлеген ДЭУ ишканасынын техникалык паркын жаңылоого көмөк көрсөтүүсүн жана Бекмамат Осмонов көчөсү менен Бишкек — Ош автомагистралына кошулган жерине светофор орнотуу өтүнүчүн айтты. Акимдин айтуусунда светофордун жоктугунан ушул жерде автоавариялар көп катталып жатат. Министр айтылган маселелер боюнча колдон келген жардамын берээрин айтуу менен светофорду Бишкек – Ош автомагистралынын төртүнчү фазасын бүткөрүүдө эске алынаарын билдирди. Учурда  Бишкек – Ош автомагистралынын Сузак, Базар-Коргон жана Ноокен райондорундагы участкаларында жолду тейлөө башкармалыктары тарабынан кыштан кийинки пайда болгон жолдогу пайда болгон  чуңкурларды ремонттоо иштери жүргүзүлүп жатат.

Ноокен райондук мамлекеттик администрациясынын башчысы – аким Эркинбек Маматаев жана Кочкор-Ата шаарынын мэриясынын жетекчилери Бишкек – Ош автомагистралынын райондун аймагындагы бузулган жерлерин ремонттоо жана Кочкор-Ата базарынын жанынан өткөн 300 метр.  аралыкты түзгөн жолдун көйгөйүн тезирээк чечүүгө министрден жардам сурашты. КРнын Транспорт министри Жамшитбек Калилов Кочкор-Ата шаарынын базарынын жанынан өтүүчү 300 метр келген аралыктагы жолду асфалттоо жумуштары апрель айында башталаарын ишендирип кетти.

–     Бишкек – Ош автомагистралынын төртүнчү фазасына кирген Маданият – Бек-Абад жолунун 67 км. түзгөн аралыгын толук реаблитациялоо жумуштары быйылкы жылы  башталат. Бул максатта Европа өнүктүрүү банкы тарабынан 60 млн. доллар каражат каралган. Жолду реаблитациялоонун техникалык экономикалык негиздери толугу менен иштелип чыгылган. Учурда жолдун курулушуна кызыктар болгон 5 ири компаниялар тендерге катышып жатышат. Бул аралыктагы жолдун курулушу быйылкы жылы башталып,  толугу менен 3 жылда бүткөрүлөт,- деди КРнын Транспорт министри Жамшитбек Калилов.

Бишкек – Ош автомагистралынын Маданият – Бек-Абад аралыгындагы  67 км. келген  жолдун курулуш иштери  көп жылдардан бери создуктурулуп,  башталбай келүүдө.

Жолдошбай Осмонов, Жалал-Абад облусу

 

Бишкек-Ош жолунун Маданият-Бекабад бөлүгүн реаблитациялоо үчүн Европа өнүктүрүү банкы быйыл 60 млн. доллар каражат бөлдү

Бүгүн, 20-мартта КРнын Транспорт министри Жамшитбек Калилов Бишкек – Ош автомагистралынын төртүнчү фазасына кирген Маданият – Бек-Абад автомагистралынын учурдагы абалы менен жеринде таанышты. Бул туурасында ыйгарым укуктуу өкүлдүн басма катчысы билдирди. Министрди КРнын Өкмөтүнүн Жалал-Абад облсундагы ыйгарым укуктуу өкүлү Кыянбек Сатыбалдиев жана облусттук ПЛУАД -6 ишканасынын жетекчиси Камил Абдыкалыков бирге коштоп жүрүштү.

Базар-Коргон райондук мамлекеттик администрациясынын башчысы – аким Айбек Бегимкулов КРнын Транспорт министри Жамшитбек Калиловдон Борбордук базардын бет маңдайындагы эки тараптуу жолду асфальтоого жана Базар-Коргон – Арстанбап ички жолун тейлеген ДЭУ ишканасынын техникалык паркын жаңылоого көмөк көрсөтүүсүн жана Бекмамат Осмонов көчөсү менен Бишкек — Ош автомагистралына кошулган жерине светофор орнотуу өтүнүчүн айтты. Акимдин айтуусунда светофордун жоктугунан ушул жерде автоавариялар көп катталып жатат. Министр айтылган маселелер боюнча колдон келген жардамын берээрин айтуу менен светофорду Бишкек – Ош автомагистралынын төртүнчү фазасын бүткөрүүдө эске алынаарын билдирди. Учурда  Бишкек – Ош автомагистралынын Сузак, Базар-Коргон жана Ноокен райондорундагы участкаларында жолду тейлөө башкармалыктары тарабынан кыштан кийинки пайда болгон жолдогу пайда болгон  чуңкурларды ремонттоо иштери жүргүзүлүп жатат.

Ноокен райондук мамлекеттик администрациясынын башчысы – аким Эркинбек Маматаев жана Кочкор-Ата шаарынын мэриясынын жетекчилери Бишкек – Ош автомагистралынын райондун аймагындагы бузулган жерлерин ремонттоо жана Кочкор-Ата базарынын жанынан өткөн 300 метр.  аралыкты түзгөн жолдун көйгөйүн тезирээк чечүүгө министрден жардам сурашты. КРнын Транспорт министри Жамшитбек Калилов Кочкор-Ата шаарынын базарынын жанынан өтүүчү 300 метр келген аралыктагы жолду асфалттоо жумуштары апрель айында башталаарын ишендирип кетти.

–     Бишкек – Ош автомагистралынын төртүнчү фазасына кирген Маданият – Бек-Абад жолунун 67 км. түзгөн аралыгын толук реаблитациялоо жумуштары быйылкы жылы  башталат. Бул максатта Европа өнүктүрүү банкы тарабынан 60 млн. доллар каражат каралган. Жолду реаблитациялоонун техникалык экономикалык негиздери толугу менен иштелип чыгылган. Учурда жолдун курулушуна кызыктар болгон 5 ири компаниялар тендерге катышып жатышат. Бул аралыктагы жолдун курулушу быйылкы жылы башталып,  толугу менен 3 жылда бүткөрүлөт,- деди КРнын Транспорт министри Жамшитбек Калилов.

Бишкек – Ош автомагистралынын Маданият – Бек-Абад аралыгындагы  67 км. келген  жолдун курулуш иштери  көп жылдардан бери создуктурулуп,  башталбай келүүдө.

Жолдошбай Осмонов, Жалал-Абад облусу

 

Меню