Акылбек Жапаров

Кыргыз Республикасынын Министрлер Кабинетинин Төрагасы Акылбек Жапаров Кыргыз Республикасындагы Кытай Эл Республикасынын Атайын жана Ыйгарым укуктуу Элчиси Ду Дэвэнди кабыл алды.

Жолугушуунун жүрүшүндө тараптар соода-экономикалык, транспорт-логистикалык тармактарга өзгөчө көңүл буруу менен эки тараптуу кызматташуунун актуалдуу маселелерин талкуулашты.

Элчи КЭР Мамлекеттик кеңешинин Премьери Ли Кэцяндын «Кытай-Кыргызстан-Өзбекстан» темир жолун куруу маселесине тийиштүү билдирүүсүн айтты.

Белгиленгендей, «Кытай-Кыргызстан-Өзбекстан» темир жолу үч өлкө элинин бакубаттуулугун жогорулатуу жана экономикалык өнүгүүнү илгерилетүүдө стратегиялык мааниге ээ болгон маанилүү регионалдык долбоор болуп саналат.

Кытай тарап канагаттануу менен белгилегендей, үч тараптын биргелешкен аракеттерине жараша темир жолду куруу долбоорунун техника-экономикалык негиздемесин иштеп чыгуу ийгиликтүү башталды жана кыргыз жана өзбек тарап менен долбоорду мындан ары карай илгерилетүү үчүн кызматташууга даярдыгын билдирди.

Министрлер Кабинетинин башчысы Акылбек Жапаров өз кезегинде Ли Кэцяндын билдирүүсү үчүн ыраазычылык билдирип, Кыргыз Республикасы үчүн темир жол магистралынын курулуш долбоорун ишке ашыруунун артыкчылыктуу маанисин баса белгиледи.

«Кытай-Кыргызстан-Өзбекстан темир жолун куруу долбоорун ишке ашырууда олуттуу жылыштар бар. Жакында долбоордун активдүү фазасы башталат деп ишенебиз», – деп белгиледи Акылбек Жапаров.

Жолугушууда Элчи Ду Дэвэнь кытай тарап кыргыз-кытай мамлекеттик чек арасындагы өткөрүү пункттарынын иш убактысын 2022-жылдын августунан 31-октябрына чейин 2 саатка узартуу чечимин кабыл алганын билдирди.

Мындан тышкары, кытай тарап эки өлкөнүн ортосундагы авиа каттамдардын санын көбөйтүүгө даяр экендигин билдирди (учурда эки жумада бир каттам бар). Кыргызстан менен Кытайдын ортосундагы аба каттамдарынын жыштыгын жумасына 3 жолкуга чейин көбөйтүү пландалууда.

Элчи ошондой эле үстүбүздөгү жылдын октябрь айында «Экспресс ден соолук» долбоорунун алкагында Кыргызстандын муктаж жарандарына көздүн катарактасына 550 операцияны бекер жасоого даяр кытайлык алдыңкы дарыгер-офтальмологдорунун Кыргызстанга келиши пландалып жаткандыгын билдирди.

Кыргыз тарап Кытайдын негизги соода-экономикалык өнөктөш катары өзгөчө маанисин белгилеп, кызматташуунун бардык артыкчылыктуу багыттары боюнча мындан ары жемиштүү иш алып барууга даяр экендигин белгиледи.

Кыргыз Республикасынын Министрлер Кабинетинин Төрагасы Акылбек Жапаров Министрлер Кабинетине караштуу Архитектура, курулуш жана турак жай-коммуналдык чарба мамлекеттик агенттигинде көчмө жыйын өткөрдү.

Кеңешменин жүрүшүндө Бишкектин жанындагы 7 миң орундуу спорттук-маданий комплекстин, Ысык-Көл облусундагы «Асман» экологиялык таза шаарынын, ошондой эле Орок айылындагы 22 миң орундуу стадиону бар «Бишкек Сити» эл аралык ишкер борборунун курулуш долбоору сунушталды.

Мындан тышкары, борбор калаадагы №47 түзөтүү колониясынын ордуна мектеп жана бала бакчаларды камтыган турак жай комплексин куруу маселеси каралды.

Министрлер Кабинетинин башчысы тиешелүү ведомстволорго жогоруда аталган объектилердин курулуш долбоорлорун эл аралык стандарттарга жана ченемдерге шайкеш келтирүү иретинде сапаттуу иштеп чыгууну тапшырды.

«Бул объектилердин курулуш долбоорлорун сапаттуу иштеп чыгуу маанилүү. Аталган долбоорлор жагымдуулугу, ыңгайлуулугу, коопсуздугу жана экологиялык жактан тазалыгы боюнча тыкыр ойлонулушу шарт», – деди Акылбек Жапаров жана мамлекеттик, жергиликтүү бийлик органдарына бир катар тапшырмаларды берди.

Кыргыз Республикасынын  Министрлер Кабинетинин Төрөгасы Акылбек Жапаров Ош облусуна болгон жумушчу сапарынын алкагында бүгүн, 30-июлда, Чоң-Алай районунун Доорот-Коргон айылында өткөн райондун кайра түзүлгөндүгүнүн 30 жылдыгына арналган иш-чарага катышты. Акылбек Жапаров Президент Садыр Жапаровдун жана жеке өзүнүн атынан район тургундарын мааракелүү дата менен куттуктады.

“Чындыгында Чоң-Алай – карт тарыхтын сырларын катып жаткан жер. Кокон хандыгында Шералы ханды хан кылган Нүзүп аталык, Алымбек датка жана Курманжан датка  дал ушул жерге келип, иштеп турган. Чоң-Алайды  – даткалардын изи калган жер дейбиз.  Бул жердин элинин бекем ынтымагы – башкаларга  үлгү. 2017-жылы жер титирегени эсиңиздерде болсо керек. Ошондо 623 үй жабыркаган. Бирок келген жардамдарды башкалардай ызы-чуу кылбай, абдан так, калыс, уюшкандыкта бөлүштүрүп, бекем ынтымагыңарды көрсөткөнсүздөр”- деди Жапаров.

Өлкөдөгү акыркы өзгөрүүлөргө, социалдык-экономикалык көрсөткүчтөргө токтолгон министрлер кабинетинин башчысы башталган ири долбоорлор аягына чыгарын белгиледи.

“Аймакта наркы 455 млн сом болгон Шибээ-Жекенди каналына быйыл биз 100 млн  сомго жакын каражат бөлдүк. Буюрса, 500 гектар жаңы жер өздөштүрүлөт, 462 гектар талаалардын суу менен камсыз болушу жакшырат. Быйыл канал толук бүтүп, ишке берилет.

Президентибиз Садыр Нургожоевич ушул жерде мектепке капсула салып кеткен. Аны бүтүрөбүз.  30 жылдын ичинде 33 Өкмөт башчы, 5 Президент алмашты. Акыркы 15 жылдан бери саясий толкундар менен катаклизмден арылбай келдик. Президент Садыр Жапаровдун келиши менен баары өзгөрүүдө.

Башкысы – Кумтөрдү Кыргызстанга алдык. Былтыр 17-майда тышкы  башкаруу киргизилгенден бери 220 млн долл. таза киреше таптык. Алтындын бардык запастарына өзүбүз ээлик кылабыз! Кумтөр мындан ары Кыргызстандыкы болду. Бул – баарыбыздын  күткөн жеңишибиз“– деп кошумчалады.

Райондун борбордук стадионунда өткөн мааракелик салтанатка Министрлер Кабинетинин Төрагасынын орун басары, УКМКнын  төрагасы Камчыбек Ташиев, Жогорку Кеңештин депутаттары жана жергиликтүү тургундар катышты. Чогулгандарга театрлаштырылган оюн-зооктор  көрсөтүлдү.

Ош облусунун Чоң-Алай району 1992-жылы түзүлгөн, түштүк-батышынан Тажикстандын Тоолуу Бадахшан автономиялуу облусу, Жерге-Тал району менен чектешет. Тоолуу аймакта 34636 адам жашайт, анын карамагына 3 айыл аймак кирет.

Казакстан Республикасынын Президенти Касым-Жомарт Токаев 2022-жылдын 20-21-июлунда Ысык-Көл облусунун Чолпон-Ата шаарында өтүүчү Борбор Азия мамлекет башчыларынын Консультативдик жолугушуусуна катышуу үчүн Кыргыз Республикасына келди.

«Ысык-Көл» эл аралык аэропортунда жогорку даражалуу конокту Кыргыз Республикасынын Министрлер Кабинетинин Төрагасы Акылбек Жапаров тосуп алды.

Борбор Азия мамлекеттеринин башчыларынын консультативдик жолугушуусунун алкагында бир катар документтерге кол коюу, ошондой эле эки тараптуу жолугушууларды өткөрүү пландалууда

Ички дүң продукциянын өсүшү боюнча эл аралык институттардын пессимисттүү божомолуна карабастан, биз кырдаалды турукташтыра алдык. Бул тууралуу Кыргыз Республикасынын Президентинин катышуусунда өткөн Кыргыз Республикасынын Министрлер Кабинетинин кеңейтилген жыйынында Кыргыз Республикасынын Министрлер Кабинетинин Төрагасы Акылбек Жапаров. билдирди

Акылбек Жапаров өз сөзүндө Кыргыз Республикасынын 2022-жылдын 6 айындагы социалдык-экономикалык өнүгүүсүнүн жыйынтыгы боюнча өлкөнүн ички дүң продукциясынын өсүү темпи 6,3%ды түзгөнүн белгиледи.

«Экономиканын бардык тармактарында өсүш байкалды: айыл чарбасында 2%, курулушта 3,4%, кызмат көрсөтүүдө 4%, өнөр жай тармагында 14,6% өсүш болду», – деди министрлер кабинетинин башчысы.

Ал кошумчалагандай, 2022-жылдын 6 айында тоо-кен тармагындагы салыктык кирешелер 25,8 миллиард сомду түздү.

«2021-жылы казынага тоо-кен тармагынан 22,9 млрд сом түшкөн. Жарым жылда былтыркы бир жылга караганда салыкты көп чогулттук. Мен кендерди иштетүүгө каршы чыккандарга кайрылат элем. Өлкөдө 245 авариялык мектеп бар, 219 704 аз камсыз болгон үй-бүлө (алардын санариптик картасы түзүлдү) жана 710 миңден ашуун пенсионер жашайт. Жыл сайын болжол менен 10 миңдей жаңы кошумча окуучулук орундар талап кылынат. Бул үчүн жылына 24 жаңы мектеп куруу керек. Мындан тышкары, республика боюнча ооруканаларды оңдоо, калктын социалдык жактан корголбогон катмарына кам көрүү зарыл. Бул үчүн бизде кошумча булактар болушу керек”, – дейт Акылбек Жапаров.

Кыргыз Республикасынын Министрлер Кабинетинин Төрагасы Акылбек Жапаров Кыргыз Республикасындагы Кытай Эл Республикасынын Атайын жана Ыйгарым укуктуу Элчиси Ду Дэвэнди кабыл алды.

Жолугушуунун жүрүшүндө кыргыз-кытай кызматташтыгынын учурдагы күн тартибиндеги актуалдуу маселелер боюнча пикир алмашуу болду.

Өзгөчө басым айланма Чүй каналын жана «Түндүк-Түштүк» альтернативдик автожолунун курулушунун алкагында кар көчкүдөн коргоочу курулуштарды куруу сыяктуу долбоорлорго бурулду.

Акылбек Жапаров белгилегендей, Министрлер Кабинети өз алдына өлкөлөр ортосунда түзүлгөн соода потенциалын активдуу пайдалануу милдетин койду.

«Биздин өлкөлөрдүн ортосунда энергетика жана айыл чарба тармагында чоң потенциал бар, бирок биз өз мүмкүнчүлүктөрүбүздү пайдалана албай жатабыз», – деди Министрлер Кабинетинин башчысы.

Өз кезегинде Элчи өз ара кызыкчылык туудурган бардык долбоорлор боюнча көмөк көрсөтүүгө даяр экенин ырастады.

«Биргелешкен аракеттер менен биз активдүү жүрүп жаткан стратегиялык маанилүү долбоорлорду ишке ашырууда жакшы натыйжага жетиштик. Бул иш келечекте дагы улантылат», – деп жыйынтыктады Ду Дэвэнь.