Menu

БУУ

Эдил Байсалов Нью-Йорктогу БУУ штаб-квартирасында өтүп жаткан ЭКОСОС калкасы астындагы Туруктуу өнүгүү боюнча жогорку деңгээлдеги саясий форумга катышты

Кыргыз Республикасынын Министрлер Кабинетинин Төрагасынын орун басары Эдил Байсалов 2022-жылдын 5-июлунан 18-июлуна чейин Нью-Йорктогу БУУ штаб-квартирасында өтүп жаткан БУУнун Экономикалык жана социалдык кеңешинин (ЭКОСОС) калкасы астындагы Туруктуу өнүгүү боюнча жогорку деңгээлдеги саясий форумга катышты.

Министрлер Кабинетинин Төрагасынын орун басары Эдил Байсалов БУУ Европа экономикалык комиссиясынын (ЕЭК) региондору үчүн туруктуу өнүктүрүү боюнча аймактык форумунун төрагасы катары «Аймактардан келген билдирүүлөр» сессиясында баяндама жасады. Өз сөзүндө Э.Байсалов ТӨМгө жетишүү үчүн прогрессти тездетүүнүн маанилүүлүгүн белгилеп, БУУ ЕЭКтин региондогу туруктуу өнүгүү чөйрөсүндө биримдикти түзүү, макулдашылган саясатты жана өз ара үйрөнүүнү жогорулатуу платформасы катары ролун белгиледи.

Эдил Байсалов ошондой эле «2030-жылга карата ТӨМгө жетишүүнү тездетүү: кризистерди жана кыйынчылыктарды жеңүү» темасындагы Министрлердин тегерек столуна катышты. БУУнун башкы трибунасында сүйлөгөн сөзүндө ал Кыргызстан эл аралык туруктуу өнүгүү күн тартибин жана «эч кимди артта калтырбоо» глобалдык милдеттенмени ишке ашырууга умтуларын белгиледи. Туруктуу өнүгүү максаттары мамлекеттик өнүгүүнүн негизги документтерине интеграцияланганы баса белгиленди. Ал Кыргыз Республикасынын тоо күн тартибиндеги демилгелерине кеңири токтолду.

Белгилей кетсек, Туруктуу өнүгүү боюнча жогорку деңгээлдеги саясий форумдун жыйынтыгы боюнча Министрлик декларация кабыл алынат, анда кыргыз тарап Тоолорду туруктуу өнүктүрүүнүн эл аралык жылын жана тоо экосистемаларын сактоонун маанилүүлүгүн белгилөө бөлүгүндө эки чечүүчү пунктту камтый алды.

Эдил Байсаловдун Саясий форумдун ишине катышуусунун алкагында ошондой эле бир катар эки тараптуу жолугушуулар болуп өттү, атап айтканда БУУ Башкы катчысынын орун басары, БУУ Өнүктүрүү программасынын администраторунун орун басары Уша Рао-Монари менен жолугушуусу болуп өттү, анын жүрүшүндө эл аралык кызматташтыктын учурдагы жана актуалдуу маселелери талкууланды.

БУУ Кыргызстанды аялдарга жана кыздарга карата зордук-зомбулукту токтотууну тездетүүгө чакырат

Мамлекеттин гендердик теңдик, аялдардын жана кыздардын укугун илгерлетүү багытында акыркы аракеттерди эске алуу менен, БУУнун Кыргызстандагы тутуму акыркы айларда үрөй учурган гендердик зомбулуктун учурларына жана аялдарга, кыздарга карата зомбулук жасаган күнөөкөрлөрдүн жазасыз калуусуна тынчсыздануусун билдирет.
1996-жылдан бери Кыргыз Республикасы аялдарга карата дискриминациянын бардык түрлөрүн жоюу боюнча эл аралык конвенциянын (CEDAW) катышуучусу болуп келет. Аталган конвенция Кыргызстанды аялдарга жана кыздарга карата дискриминацияны бардык чөйрөлөрдө жоюуга жана аялдар менен кыздардын тең укуктарын камсыз кылууга милдеттендирет.
БУУ Кыргыз Республикасынын 2021-жылы CEDAW комитетине бешинчи мезгилдүү баяндамасынын алкагында алган милдеттенмесин кубаттайн. Баяндама тапшырылгандан кийин CEDAW комитети, 2021-жылдын ноябрындагы Кыргызстанга карата корутундусуна ылайык (шилтеме: CEDAW Кыргызстан 2021 [1]), өкмөткө зомбулуктун алдын алуу, жабырлануучуларды коргоо, аларга жардам көрсөтүү жана күнөөлүүлөрдү жоопкерчиликке тартуу боюнча күч-аракеттерин ыкчамдатууну сунуштады.
БУУ системасы өкмөттү аялдарга, кыздарга карата бардык зомбулук кылмыштарын укук коргоо органдары тарабынан ыкчам жана адекваттуу иликтөөнү тездетүүгө жана Кыргызстандагы бардык аялдарга жана кыздарга сот аркылуу адилеттүүлүккө жетүү мүмкүнчүлүгүн камсыз кылууга чакырат. Эл аралык стандарттарга ылайык, зомбулуктан жапа чеккендерге, тийиштүү тергөөнүн жана сот процессинин ордуна, элдештирүү чаралары мажбурланбашы керек.
БУУ системасы мындан ары өкмөттү гендердик зомбулуктун бардык түрлөрүнүн, анын ичинде үй-бүлөлүк жана сексуалдык зомбулуктун кылмыштуу табияты тууралуу мамлекеттик кызматкерлер жана жалпы коомчулук арасында маалымдоо иштерин активдештирип, калкка жана жарандык коомго мындай кылмыштарды четке кагууда колдоо көрсөтүүгө чакырат. Жаш балдарды жана өспүрүмдөрдү, мигрант аялдарды, ВИЧ менен жашаган аялдарды, майыптуулугу бар аялдарды, азчылыктарды жана калктын аялуу катмарын басмырлоодон, эксплуатациялоодон жана гендердик зомбулуктан коргоого өзгөчө көңүл буруу керек.
БУУ кызыктар тараптардын көптөгөн оң демилгелерин кубаттайт жана гендердик зомбулукту жоюу, үй-бүлөлүк зомбулукту нормалдаштырган социалдык көз караштарды өзгөртүү, ошондой эле укук коргоо органдарынын жана юстиция тутумунун аялдардын жана кыздардын муктаждыктарына жооп берүү дараметин өнүктүрүү боюнча өкмөткө колдоо көрсөтүүнү уланта берүүнү баса белгилейт.
Маалымат үчүн:
Ички иштер министрлигинин маалыматы боюнча, 2021-жылы 604 зордуктоо фактысы катталса, анын 53% кылмыштын курамы жок табылып токтотулган; 254 адам уурдоо фактысы катталып, анын 84%ы кылмыштын курамы жок табылып
токтотулган. 2021-жылы үй-бүлөлүк зомбулук боюнча 10 151 факты катталган. Үй-бүлөлүк зомбулуктан жабыркагандарга 9038 убактылуу коргоо ордери берилген болсо, анын 8463ү аялдарга, 264ү жашы жете электерге берилген.
Ички иштер министрлигинин маалыматы боюнча, 2022-жылдын биринчи беш айында 3988 үй-бүлөлүк зомбулук фактысы катталган.

КРнын БУУдагы Туруктуу Өкүлчүлүгү БУУда «Тоолуу аймактарды өнүктүрүү боюнча иш-аракеттердин беш жылдыгы» концепциясынын презентациясын уюштурду

24-майда Бириккен Улуттар Уюмунун Штаб-квартирасында Нью-Йорк шаарындагы Кыргыз Республикасынын БУУдагы Туруктуу Өкүлчүлүгү БУУга мүчө мамлекеттердин Нью-Йорктогу туруктуу өкүлчүлүктөрү үчүн «Тоолуу аймактарды өнүктүрүү боюнча иш-аракеттердин беш жылдыгы» концепциясынын презентациясын уюштурду. Ага Бишкектен жогорку өкүл катары Кыргыз Республикасынын Президентинин «Тоолуу аймактарды өнүктүрүү боюнча иш-аракеттердин беш жылдыгын» ишке ашыруу боюнча атайын өкүлү Нурлан Айтмурзаев катышты.

Иш-чарада Бириккен Улуттар Уюмунун Азык-түлүк жана айыл чарба уюмунун башкы директору Цуй Дунъюй жана БУУнун Экономикалык жана социалдык маселелер боюнча департаментинин директорунун милдетин аткаруучу Александр Трепелков сөз сүйлөштү. Атайын өкүл Нурлан Айтмурзаев презентация жасады. Мындан тышкары, БУУнун Азык-түлүк жана айыл чарба уюмунун Тоо өнөктөштүгүнүн Катчылыгынын башчысы Розалаура Ромео “Тоолорду туруктуу өнүктүрүү эл аралык жылы – 2022” темасында презентация жасады. Жалпысынан 15 презентация болду.

Иш-чарада 2019-жылы Кыргызстандын демилгеси менен түзүлгөн Тоолуу өлкөлөрдүн достору тобуна мүчө мамлекеттердин туруктуу өкүлдөрү, ошондой эле БУУнун башка мүчө мамлекеттери жана негизги эл аралык уюмдардын өкүлдөрү катышты.

Атайын өкүл Нурлан Айтмурзаев тоолуу аймактар экосистеманын уникалдуу түрү экендигин жана климаттын өзгөрүшүнө байланыштуу алар дуушар болгон кыйынчылыктар өзгөчө экенин белгиледи. Ошондуктан, климаттын өзгөрүшүнө адаптациялануу жана аларды жумшартуу, ошондой эле бул өлкөлөрдө туруктуу өнүгүү алардын муктаждыктарына багытталган атайын иш-чаралар комплексин ишке ашырууну талап кылат.

«Беш жылдыктын» презентациясында тоолуу өлкөлөрдүн экономика жана соода, илим, билим жана маданият, айлана-чөйрөнү коргоо, климаттын өзгөрүшү жана табигый кырсыктарды алдын алуу жаатындагы, ошондой эле бул багыттар боюнча эл аралык кызматташтык көйгөйлөрүн чечүүгө багытталган Кыргыз Республикасынын тоо демилгелеринин комплекси жарыяланды. Биринчи кезекте, кыргыз тарап БУУнун түрдүү түзүмдөрүнүн алкагында өз кызыкчылыктарын натыйжалуу коргоо үчүн тоолуу өлкөлөрдүн чоң коалициясын түзүүнү колдоду. Тоолуу өлкөлөрдүн ушул жана башка демилгелерин «Тоолуу аймактарды өнүктүрүү боюнча иш-аракеттердин беш жылдыгы» деп аталган бирдиктүү иш-чаралардын комплексине бириктирүү сунушталып, кийинки беш жылда – 2023-2027-жылдары ишке ашыруу сунушталды. Бул аракеттерди формалдаштыруу үчүн БУУнун Башкы ассамблеясынын 77-сессиясынын жүрүшүндө 2023-2027-жылдарды «Тоолуу аймактарды өнүктүрүү боюнча иш-аракеттердин беш жылдыгы» деп жарыялоо тууралуу резолюцияны кабыл алуу сунушталды. Кыргыз тарап бул резолюцияны колдоо жана биргелешип демилгелөөнү көрсөтүү өтүнүчү менен БУУга мүчө мамлекеттерге кайрылды. Ошону менен бирге, тийиштүү компетенцияга ээ болгон эл аралык уюмдарга беш жылдык планга аткаруучу уюм катары кошулуу тууралуу кайрылды. Резолюцияны жана жалпысынан беш жылдык планга саясий колдоону камсыз кылуу максатында кыргыз тарап БУУнун Башкы Ассамблеясынын 77-сессиясынын Жогорку деңгээлдеги жумалыгынын алкагында Кыргыз Республикасынын Президенти С.Н.Жапаровдун жана тоолуу өлкөлөрдүн бийик даражалуу өкүлдөрүнүн катышуусунда тоолорду туруктуу өнүктүрүү боюнча Жогорку деңгээлдеги жолугушууларды өткөрүү планын билдирди.

Маалымдама: 2021-жылдын сентябрь айында Кыргыз Республикасынын Президенти С.Н.Жапаров БУУнун Башкы Ассамблеясынын 76-сессиясында «Тоолуу аймактарды өнүктүрүү боюнча иш-аракеттердин беш жылдыгын» жарыялоо демилгесин билдирген. Бул демилгени практикалык ишке ашыруу үчүн анын концепциясы иштелип чыкты, анда тоолуу өлкөлөрдүн кызматташтыгын чыңдоого, алардын элдеринин бакубаттуулугун жогорулатууга жана тоо экосистемаларын коргоого багытталган чаралардын кеңири комплекси камтылган. Кыргыз Республикасы бардык тоолуу мамлекеттерди аларды ишке ашырууга катышууга чакырат. Биз беш жылдык планга тиешелүү мандаты бар бардык эл аралык уюмдардын, биринчи кезекте Тоо шериктештигинин Катчылыгынын, , БУУнун Азык-түлүк жана айыл чарба уюмунун, БУУӨПтун, ЭКОСОКтун, ЮНЕСКОнун, ЮНИДОнун, ЮНЕПтин, ЮНКТАДдын, ГЭФтин аймактык комиссияларынын, эл аралык каржы институттарынын ишке ашыруу аркылуу катышуусун маанилүү деп эсептейбиз. сооданы өнүктүрүү, транспорттук-логистикалык инфраструктураны жакшыртуу, инвестицияларды тартуу, технологияларды жана инновацияларды трансферттөө, айлана-чөйрөнү коргоо, климаттын өзгөрүшүнө каршы күрөшүү, анын ичинде “жашыл” экономиканы өнүктүрүү, “жашыл «технологиялар, «жашыл» энергетика, кырсыктардын алдын алуу, тоолуу өлкөлөрдүн маданиятын, тарыхын, жаратылышын жайылтуу жана туризмди өнүктүрүү, ошондой эле тоолуу аймактарды туруктуу өнүктүрүү жаатындагы долбоорлорго инвестициялоо аркылуу.

Министрлер Кабинетинин Төрагасынын орун басары Эдил Байсалов Россиянын эл аралык уюмдарга катышуусун токтотуу аракетине каршы чыкты

Министрлер Кабинетинин Төрагасынын орун басары Эдил Байсалов Женева шаарына жумушчу сапарынын алкагында (Швейцария Конфедерациясы) Бириккен Улуттар Уюмунун Европа экономикалык комиссиясынын (БУУ ЕЭК) Регионалдык форумунун жабылышында жыйынтыктоочу сөз сүйлөдү.

Өз сөзүндө Эдил Байсалов Россия Федерациясынын эл аралык уюмдарга катышуусун токтотуу аракетине каршы чыкты.

Министрлер Кабинетинин Төрагасынын орун басары комиссияга мүчө 56 мамлекеттин делегациясын комиссиянын Чыгыш менен Батыштын ортосундагы кызматташтыктын көпүрөсү катары ишинин тарыхый мандатын сактап калууга чакырды.

«Төрага катары мен Сиздерди Европа экономикалык комиссиясынын өзгөчө ролун жана мандатын сактап калууга жана коргоого чакыргым келет. Бардык трагедиялуу жагдайларга, тараптардын позицияларынын кагылышына жана эмоциялардын күчөшүнө карабастан, биз БУУ ЕЭКти диалог аянтчасы жана кызматташтык көпүрөсү катары сактап калышыбыз керек. Акыркы 75 жыл ичиндеги чыңалуу мезгилдеринде биздин өлкөлөр уюмдун өзгөчө мандатын жогору баалап келген. Комиссиянын негизги мүчөлөрүнүн биринин катышуусун чектөө баарыбызды чектейт», – деди Эдиль Байсалов.

Белгилесек, БУУ Европа экономикалык комиссиясы (БУУ ЕЭК) 1947-жылы 28-мартта БУУнун Экономикалык жана Социалдык Кеңеши (ЭКОСОС) тарабынан аймактын ичиндеги экономикалык ишмердүүлүктү өнүктүрүү жана экономикалык байланыштарды чыңдоо максатында түзүлгөн. БУУ ЕЭК Бириккен Улуттар Уюмунун беш аймактык экономикалык комиссиясынын бири болуп саналат жана штаб-квартирасы Женевада жайгашкан.

Жумушчу тилдер катары француз, англис жана орус тилдери саналат. Уюмга 56 мамлекет: Европа өлкөлөрү, АКШ, Канада, Түркия Республикасы, Израиль мамлекети, Борбор Азия өлкөлөрү кирет. Кыргыз Республикасы 1993-жылдын 30-июлунда Комиссиянын толук кандуу мүчөсү болгон.

Бириккен Улуттар Уюму Кумтөр кени боюнча Кыргыз Республикасы менен Centerra Gold Inc ортосунда тынчтык келишимине кол коюлгандыгы боюнча комментарий берди

БУУнун Башкы катчысынын пресс-катчысынын орун басары Ф.Хан журналисттер үчүн өткөргөн пресс-конференциясында,  Кыргыз Республикасынын Өкмөтү менен канадалык Centerra Gold Inc компаниясынын ортосунда Кумтор кени боюнча тынчтык келишимине кол коюлгандыгын БУУ тарабынан кабыл алынгандыгын билдирди.

Тынчтык келишимине кол коюу – маселени эл аралык коммерциялык укуктун алкагында чечилишин билдирет, аны кыргыз тарап БУУнун мүчөсү катары сактап келет. Биздин өлкө тарабынан эл аралык укукту сактоосун көрсөтүү дуйнөлүк коомчулук үчүн абдан маанилүү ролду ойнойт.

Женевада Эдил Байсаловдун төрагалыгы астында Бириккен Улуттар Уюмунун Европа экономикалык форуму өтүүдө

Эдил Байсаловдун төрагалыгы астында Бириккен Улуттар Уюмунун Европа экономикалык комиссиясынын Регионалдык форуму өтүүдө.

Форумду ачып жатып, Министрлер Кабинетинин Төрагасынын орун басары COVID-19 пандемиясы бүткүл дүйнөгө олуттуу таасирин гана тийгизбестен, туруктуу өнүгүүнү жана 2030-жылга чейин Туруктуу өнүктүрүүнүн Күн тартибин ишке ашырууну камсыздоо аракеттерине да өз таасирин тийгизгендигин белгиледи.

Эдил Байсалов ошондой эле Кыргыз Республикасы тарабынан туруктуу өнүктүрүүнүн багыттарын ишке ашыру боюнча жүргүзүлүп жаткан иштер тууралуу маалымат берди, атап айтканда,  туруктуу өнүктүрүү жаатындагы максаттар 2026-жылга чейин Кыргыз Республикасын өнүктүрүүнүн улуттук программасына интеграцияланган.

«Биздин 6,5-миллион калкыбыздын жарымынан ашууну 25 жашка чейинки жаштар, өлкө Президенти Садыр Жапаров тарабынан балдар жана жаштар үчүн билим берүү жана саламаттык сактоо деңгээлин жогорулатуу боюнча жалпы улуттук максат жарыяланган. Бул максатты ишке ашыруу мектеп мугалимдеринин эмгек акысын кеминде 80%га жана үч эседен ашык жогорулатуу менен башталды. Биз так илимдер, математика, маалымат технологиялары жана чет тилдер боюнча жогорку квалификациялуу мугалимдердин жаңы муунун ишке тартуу жана даярдоо боюнча активдүү кампанияны баштоодобуз. Үчүнчү күн катары менен COVID-19 инфекциясынын жаңы учурлары катталган жок. Биз эмдөө өнөктүгүн ийгиликтүү өткөрдүк жана өнүгүп келе жаткан жаш өлкө катары COVID-19 пандемиясынан келип чыккан кесепеттерди калыбына келтирип баштоого умтулуудабыз», – деди Эдил Байсалов жана Министрлер Кабинети тарабынан калктын аяр катмары үчүн тышкы таасирлерди жумшартуу боюнча тийиштүү чаралар кабыл алынып жаткандыгын белгиледи.

Белгилесек, БУУнун Европа экономикалык комиссиясы (БУУ ЕЭК) 1947-жылы 28-мартта БУУнун Экономикалык жана Социалдык Кеңеши (ЭКОСОС) тарабынан аймактын ичиндеги экономикалык ишмердүүлүктү өнүктүрүү жана экономикалык байланыштарды чыңдоо максатында түзүлгөн. БУУ ЕЭК Бириккен Улуттар Уюмунун беш аймактык экономикалык комиссиясынын бири болуп саналат жана штаб-квартирасы Женевада жайгашкан.

Жумушчу тилдер катары француз, англис жана орус тилдери саналат. Уюмга 56 мамлекет: Европа өлкөлөрү, АКШ, Канада, Түркия Республикасы, Израиль мамлекети, Борбор Азия өлкөлөрү кирет. Кыргыз Республикасы 1993-жылдын 30-июлунда Комиссиянын толук кандуу мүчөсү болгон.

Эдил Байсалов: «Кыргызстан дагы үч миң жыл бою БУУнун мүчөсү жана эгемендүү мамлекет катары калат»

Министрлер Кабинетинин Төрагасынын орун басары Эдил Байсалов 2023-2027-жылдарга БУУ туруктуу өнүгүү жаатындагы кызматташтык боюнча рамкалык програмасынын бетачарында сөз сүйлөп, анда бул иш-чаранын Кыргыз Республикасынын Бириккен Улуттар Уюмуна кабыл алынгандыгына 30 жыл толгон күнү өткөрүлүп жаткандыгы маанилүү экендигин белгиледи.

«Биздин өлкө БУУга мүчө болгондугуна 30 жыл толду жана бул убакыт аралыгында жарандардын жаңы мууну өсүп чыкты. Биз жаш, намыстуу жана алга умтулган өлкөбүз. Калкыбыздын үчтөн экисинен ашууну – отуз жашка чейинки жаштар. Ошондуктан, эгемендүүлүктүн алгачкы отуз жылдык жыйынтыгын белгилеп жатып, биздин элибиз өзүнүн эгемендүүлүгүн, мамлекеттүүлүгүн жогору баалап, кийинки үч миң жылда БУУга мүчө болуп кала берет деп айта алабыз», – деди Министрлер Кабинетинин Төрагасынын орун басары .

Эдил Байсалов жакынкы жылдарда Кыргызстандагы БУУнун агенттиктеринин ишинде ийкемдүүлүк жана республиканын жетекчилиги тарабынан бекитилген өлкөнү туруктуу өнүктүрүү программасынын артыкчылыктуу багыттарын колдоо зарылдыгын белгиледи.

Бүгүн ЮНДАФ Стратегиялык координациялык комитетинин жыйыны Министрлер Кабинетинин жетекчилигинин жана мүчөлөрүнүн жана Бириккен Улуттар Уюмунун тутумунун бардык кеңсе өкүлдөрүнүн катышуусунда өтүүдө.

Кыргыз Республикасынын Нью-Йорктогу БУУдагы Туруктуу өкүлү Аида Касымалиева БУУнун Башкы катчысы Антониу Гутерришке Ишеним Грамотасын тапшырды

2022-жылдын 15-февралында Кыргыз Республикасынын Нью-Йорктогу БУУдагы Туруктуу өкүлү Аида Касымалиева БУУнун Башкы катчысы Антониу Гутерришке Ишеним Грамотасын тапшырды.

Туруктуу өкүл Аида Касымалиева Кыргыз Республикасынын Президенти Садыр Жапаровдун атынан жылуу каалоо-тилектерин айтып, кызматташтыкты мындан ары да бекемдөө контекстинде өлкөнүн БУУдагы приоритеттери тууралуу маалымат берди. А.Касымалиева ошондой эле өлкөнүн айлана-чөйрөнү, анын ичинде тоо экосистемасын коргоо боюнча көрүлүп жаткан артыкчылыктуу багыттары жана көрүлүп жаткан чаралар жөнүндө, тактап айтканда, Кыргыз Республикасынын Президенти С.Жапаров тарабынан 2022-жылды “Тоолордун экосистемасын коргоо жана климаттык туруктуулук жылы” деп жарыялангандыгы, Кыргыз Республикасынын демилгеси менен БУУнун Башкы Ассамблеясы “2022-жылды Тоолорду туруктуу өнүктүрүүнүн эл аралык жылы” аттуу резолюцияны кабыл алгандыгы жана БУУнун Башкы Ассамблеясынын алдыдагы 77-чи сессиясынын алкагында “Тоолуу аймактарды өнүктүрүү боюнча беш жылдык аракеттери” деген жаңы резолюциянын долбоорун сунуштоо боюнча Кыргыз Республикасынын демилгеси тууралуу маалымат берди.

Өз кезегинде БУУнун Башкы Ассамблеясынын Башкы катчысы Антониу Гутерриш Кыргызстандын Туруктуу өкүлү А.Касымалиеваны жылуу кабыл алып, Кыргыз Республикасы менен БУУнун ортосундагы мамилелерди өнүктүрүү максатында мындан аркы ийгиликтүү иш-аракеттерди каалады. Ал ошондой эле Президент С.Н.Жапаровго жана өлкө элине чын жүрөктөн салам айтып, Кыргызстанга бир нече жолу ырахат менен келгенин жана Кыргызстандын элин, жаратылышын, тоолорунун кооз жерлерин жылуу сезимдер менен эскерерин белгиледи. Бул контекстте БУУнун Башкы катчысы Кыргызстан тоо күн тартибин алдыга жылдырууда лидер экенин баса белгилеп, бул багытта мындан аркы ийгиликтерди каалады.

Президент Садыр Жапаров БУУнун Башкы катчысынын жардамчысы Мирьяна Сполярич Эггерди кабыл алды

Кыргыз Республикасынын Президенти Садыр Жапаров бүгүн, 17-июнда, Бириккен улуттар уюмунун (БУУ) Башкы катчысынын жардамчысы, БУУнун өнүктүрүү программасынын (ӨП) администраторунун орун басары, БУУӨПтүн Европа жана КМШ өлкөлөрү боюнча региондук директору Мирьяна Сполярич Эггерди кабыл алды.

Ар кыл багыттардын кеңири чөйрөсүндө биргелешип кызматташуунун актуалдуу маселелери боюнча пикир алмашуу болду.

Мамлекет башчысы БУУ тутумунун Кыргызстандын өнүгүүсүнө кошкон зор салымын белгилеп, Уюмдун агенттиктерине туруктуу өнүктүрүү жаатында өлкөдөгү ишмердиги жана Баткен облусуна көрсөткөн гуманитардык жардамы үчүн ыраазычылык билдирди.

Президент аймакты өнүктүрүү боюнча иштелип чыккан программанын алкагында Баткен облусуна өзгөчө макам берилерин баса белгиледи. Мындан улам узак мөөнөттүү келечекте чек ара райондорун өнүктүрүү боюнча долбоорлорду ишке ашыруу зарыл экенин кошумчалады.

Садыр Жапаров чек ара аймактарынын тургундарынын жашоо-шартын жакшыртуу маанилүү экенин белгилөө менен чек ара аймактарын өнүктүрүү боюнча атайын, максаттуу долбоорлорду биргеликте ишке киргизүүнү сунуш кылды.

Мамлекет башчысы ошондой эле дүйнөдө климаттык өзгөрүүлөргө байланыштуу көйгөйлөр барган сайын актуалдуу болуп бараткандыгына токтолду. Жакында Кыргызстан ЮНЕСКОнун алкагында мөңгүлөрдү сактоо жаатында демилгелерди көтөрө тургандыгына көңүл бурду.

Президент Садыр Жапаров эл аралык өнөктөштөрдүн жардамы менен Кыргызстандагы мөңгүлөрдүн абалын көзөмөлдөө жана алардын өзгөрүшүнө жетиштүү жооп кайтаруу боюнча өлкөнүн мүмкүнчүлүктөрүн күчөтүүнү көздөп жатканын билдирип, БУУну бул багытта бирге иш алпарууга чакырды.

БУУнун Башкы катчысынын жардамчысы Мирьяна Сполярич Эггер БУУнун түзүмдөрү өлкөнүн чек ара райондорунун жашоочуларына кошумча колдоо көрсөтүү мүмкүнчүлүктөрүн иликтеп жаткандыгын баса белгиледи.

Ал аялдардын жана жаштардын укуктарын коргоо боюнча иштерди канааттануу менен белгилеп, алардын коом турмушундагы активдүү ролуна токтолду. Мирьяна Сполярич Эггердин айтымында, Кыргызстан региондогу өлкөлөрдүн арасында бул багытта алдыңкы орунду ээлейт.

БУУнун Башкы катчысынын жардамчысы учурда Өнүктүрүү программасы иштелип жаткандыгын, анын алкагында Кыргызстанга жардам көрсөтүү каралып жатканын маалымдады.

Мирьяна Сполярич Эггер бул программа 2021-2026-жылдарга карата Кыргызстанды өнүктүрүүнүн орто мөөнөттүү стратегиясынын приоритеттерине жооп берет деген үмүтүн билдирди.

Ошондой эле ал айлана-чөйрөнү жана биологиялык ар түрдүүлүктү сактоо боюнча экологиялык долбоорлорду колдоонун маанилүүлүгүн белгиледи.

БУУнун Башкы катчысынын жардамчысы кыргыз тарапты кызыктырган бардык долбоорлорду ишке ашырууга көмөк көрсөтүүгө даярдыгын билдирди.

Видео - Ализа Солтонбекова БУУнун Мүмкүнчүлүгү чектелген адамдардын укуктары жөнүндө конвенция боюнча 14-сессиясында сөз сүйлөдү

«Азыркы учурда БУУнун мүмкүнчүлүгү чектелген адамдардын укуктары жөнүндө конвенциясын Кыргызстан тарабынан ишке ашырылышы боюнча улуттук отчетту даярдоо боюнча иштер жүрүп жатат, аны ушул жылы адам укуктары боюнча Комитетке берүү пландаштырылууда”, – деди  Кыргыз Республикасынын Саламаттыкты сактоо жана социалдык өнүктүрүү министринин биринчи орун басары Ализа Солтонбекова.

Кыргызстан 2019-жылдын 13-мартында БУУнун мүмкүнчүлүгү чектелген адамдардын укуктары жөнүндө конвенциясын ратификациялаган, анын алкагында алардын өлкөдөгү абалы жакшырышы керек.

Учурда Кыргыз Республикасында 195 миңден ашуун мүмкүнчүлүгү чектелген адамдар жашайт, алардын 32 миңи балдар. Акыркы он жылдын ичинде республиканын калкы 18% га, ал эми ден-соолугунун мүмкүнчүлүктөрү чектелүү адамдардын саны 47% га өстү.

“Кыргыз Республикасы социалдык саясат өзгөчө орунду ээлеген мамлекет. Социалдык теңсиздиктин себептерин жана аны жоюунун жолдорун аныктоо – бул биздин коомдун мындан аркы ийгиликтүү өнүгүүсү менен байланышкан мамлекеттик саясаттын артыкчылыктуу багыты ”, – деди Солтонбекова.

Анын айтымында, мамлекет мүмкүнчүлүктөрү чектелген адамдарды социалдык жактан коргоо тутумундагы мамилелерди адаптациялайт, көңүлдү турмуштук ишмердүүлүккө жана көзкарандысыз жашоонун жаңы концепциясын калыптандырууга бурат.

Бүгүнкү күнгө чейин, Кыргыз Республикасында 2021-2040-жылдарга мүмкүнчүлүгү чектелген адамдар жана башка мобилдик топпор  үчүн “Жеткиликтүү өлкө” аттуу Мамлекеттик программасынын долбоору иштелип чыккан, бул биринчи кезекте аларды билим берүү жана жумуш менен камсыз кылуу жаатында иш-аракеттердин бардык чөйрөлөрүнө интеграциялоого багытталган.

Кыргыз Республикасынын Өкмөтүнө караштуу Ден-соолугунун мүмкүнчүлүктөрү чектелүү адамдар үчүн кеңеш туруктуу коммуникация платформасы катары түзүлгөн. Кеңештин негизги милдети – БУУнун Майыптардын укуктары жөнүндө Конвенциясынын жоболорун ишке ашыруу боюнча иш-чараларды контролдоону жана ведомстволор аралык координациялоону камсыз кылуу, мамлекеттик органдарга социалдык-экономикалык абалды жакшыртуу боюнча мыйзамдарды ишке ашырууга көмөктөшүү майыптарга жана конституциялык укуктарды жана эркиндиктерди жүзөгө ашырууда майыптарга бирдей мүмкүнчүлүктөрдү камсыз кылуу.

«Мүмкүнчүлүгү чектелген адамдардын абалын жакшыртуу максатында, мамлекеттин реалдуу мүмкүнчүлүктөрүн эске алуу менен, мамлекеттик социалдык төлөмдөрдү жана кызматтарды көрсөтүү, ошондой эле инфраструктураны жакшыртуу жигердүү колдонулуп жатат. Албетте, бул ишти күчөтүү керек », – деди Солтонбекова.

А. Солтонбекова белгилегендей, мамлекеттик орган  тарабынан “Мамлекеттик социалдык заказ жөнүндө” Кыргыз Республикасынын Мыйзамын ишке ашыруунун алкагында ден-соолугунун мүмкүнчүлүктөрү чектелүү адамдарга социалдык кызматтарды өнүктүрүү боюнча жигердүү иш алып барууда.

Меню