Menu

Бюджет

Министрлер кабинети жыл соңуна чейин донорлордон бюджетти колдоого 30 млрд. сом алууга ниеттенүүдө

Кыргызстан бюджетти колдоо үчүн 2022-жылдын он айында донорлордон 12,1 миллиард сом алды. Бул тууралуу 22-ноябрда Жогорку Кеңештин Отун-энергетикалык комплекси, жер казынасын пайдалануу жана өнөр жай саясаты боюнча комитетинин жыйынында өлкөнүн каржы министри Алмазбек Бакетаев билдирди.

Жыйындын жүрүшүндө депутаттар быйыл бюджетти колдоо үчүн канча каражат алуу пландалганына кызыгышты.

“2022-жылдын 10 айында 12,1 миллиард сом алдык. Жыл соңуна чейин 30 миллиард 600 миллион болот”, – деди министр.

Октябрда каржы министринин орун басары Руслан Татиков Министрлер кабинети акыркы 10 айдын ичинде эл аралык каржы институттарынан бюджетти колдоого 180 миллион доллар алганын, анын 50 миллиону грант болгонун айткан.

2021-жылы Кыргызстан эл аралык донор уюмдардан 38 миллиард сом (447 миллион 585 миң 394 доллар) алган. Каржы министрлигинин Эл аралык кызматташтык башкармалыгынын жетекчиси Нурбек Акжолов чет өлкөдөн каражат эки багыт боюнча келип жатканын билдирген: мамлекеттик инвестициялар аркылуу ири долбоорлорду ишке ашырууга жана бюджетти колдоо үчүн. 11,4 миллиард сом бюджетти колдоого жумшалса, 26,4 миллиард сом ири долбоорлорго тартылган.

2022-жылдын сентябрь айына карата Кыргызстандын мамлекеттик карызы 5,2 миллиард долларга жетти. Анын 4,1 миллиарды тышкы карыз. Калганын Министрлер кабинети ички каржы институттары гана сатып ала турган мамлекеттик баалуу кагаздар боюнча төлөп бериши керек.

Камчыбек Ташиев, Минкабдын орун басары: “Биз бийликке келгенде өлкөнүн бюджети 180 млрд сом болчу, жакынкы 3-4 жылда бюджетти 1 триллион сомго жеткиребиз”

“Кыргызстандын бюджети 2020-жылы биз бийликке келгенде 180 миллиард эле сом болчу”, – деп билдирди кечээ, 3-сентябрда КР Министрлер кабинетинин төрагасынын орун басары, УКМКнын төрагасы Камчыбек Ташиев “Регион” телеканалына берген интервьюсунда.

“Кийинки 2021-жылы өлкөнүн бюджетин 300 миллиард сомго чыгардык. Быйыл 2022- жылы бюджетибиз 400 миллиард сомдон ашат деп турабыз. Келерки 2023-жылы бюджетти 500-600 миллиардга чыгарабыз. Президентибиз Садыр Жапаров коюп жаткан талап боюнча жакынкы 3-4 жылда мамлекеттин бюджетин 1 триллионго жеткиребиз. Ал мындан эки жыл мурдагы, 2020-жылдагы бюджетке караганда 5 эсе көп болот дегенди билдирет”, – деди Камчыбек Ташиев.

Акылбек Жапаров: Бюджеттин салыктан башка да киреше булактары болуш керек - видео

“Биздин бюджет бир гана салыктан көз каранды болбошу керек. Казино ачуу, туризмди өнүктүрүү сыяктуу киреше беренелерин диверсификациялоо зарыл. Бюджеттин салыктан башка да киреше булактары болушу зарыл”, – деп билдирди КР Министрлер кабинетинин төрагасы Акылбек Жапаров 22-июндагы КР ЖКнын отурумунда депутаттардын суроолоруна жооп берип жатып.

 

Меню