Menu

Владимир Путин

Эрдоган Путинди согушту токтотууга үндөдү

Түркиянын президенти Режеп Тайып Эрдоган менен Орусиянын президенти Владимир Путин телефондон сүйлөштү. Алар энергетика маселесин, Украинадагы согуш жана Сириядагы жаңжалды талкуулашканын Anadolu маалымат агенттиги 5-январда жазды.

Эрдоган Украинадагы согуш тууралуу Путинге “тынчтык жана диалог үчүн чакырыктар колдоого алынышы зарылдыгын” белгилеген. Мындай сунушка Путин эмне деп жооп бергенин түрк агенттиги жазган жок.

Кремлдин басма сөз кызматы билдиргендей, Путин Эрдоганга Украинага аскердик жардам берип жаткан “Батыш мамлекеттеринин кыйратуучу ролу” тууралуу айткан. Ал ошондой эле Москва Киев менен диалогго ачык экенин билдирди. Бирок анын пикиринде Украина бийлиги Москванын талаптарын аткарып, “жаңы аймактык реалдуулукту” эске алышы керек.

Буга чейин Украинанын президенти Владимир Зеленский Киевге оккупацияланган бардык аймактар, анын ичинде аннексияланган Крым кайтарылганда гана Орусия менен сүйлөшүүгө даяр экенин билдирген.

Түркия Украинадагы согуштан улам Орусияга каршы санкцияларга кошулбаган жалгыз НАТОго мүчө өлкө. Ошол эле маалда Анкара Киевге гуманитардык жардам көрсөтүп, Украинага курал-жарак жеткирүүдө. Ошондой эле Түркия жаңжалды жөнгө салууга ортомчу болууну көздөп келет.

Орусия өзү басып алган Украинанын аймактарынан 1 миллиард доллардык буудайды чыгарып кеткен

Орусия Украинадан кеминде 1 миллиард долларга бааланган буудайды чыгарып кеткен. Бул тууралуу Bloomberg агенттиги NASA Harvest’ке (АКШ космикалык агенттигинин эл аралык азык-түлүк коопсуздугуна багытталган долбоору) шилтеме кылып кабарлады.

Маалыматка караганда, Украинанын Орусия көзөмөлдөп турган аймактарында болжол менен буудайдын 6 миллион тонна түшүмү жыйналган. Учурда орус аскерлери украин данынын дээрлик төрттөн бир бөлүгү эгилген аймакты ээлеп турушат. Москва ал аймактарды быйыл октябрдын башында аннексиялаганын жарыялаган.

Украинанын оккупацияланбаган аймагында быйыл 26 миллион тоннадан ашык буудай жыйналган. Бул алгач божомолдонгондон кыйла көп.

Иликтөөдө айтылгандай, Орусиянын кемелери Украинадан жүктөп чыккан эгин түрдүү өлкөлөргө, анын ичинде Ливия менен Иранга экспорттолгон. Бирок орус тарап буудайдын кайсыл жерде жүктөлгөнүн жашырууга аракет кылып жаткандыктан, анын көлөмүн эсептеп чыгуу оорчулук жаратууда.

Октябрдын аягында Financial Times басылмасынын журналисттери бир учурдун мисалында Орусия Украинадан чыгарып кеткен буудай кантип дүйнөлүк базарга чыгып жатканын көрсөтө алган. Анда Запорожье облусунан чыккан жүктүн экспорттук документтери өзгөртүлүп, дан Орусиянын Тольятти шаарынан жүктөлгөнү жазылган. Журналисттердин маалыматына ылайык, Сириянын желеги менен чыккан кемедеги буудай Түркиянын Хопа портунда сатылган. Анда токтоп турган “Павел” аттуу жүк ташуучу кеменин сүрөтүн порттогу жергиликтүү аткаминерлердин бири “Фейсбук” баракчасына жарыялаган.

Украина менен Орусия дүйнөдө эң көп буудай экспорттогон алдыңкы беш өлкөнүн катарына кирет. 2021-жылы Украина 12,4 миллиард долларга дан экспорттогон. Согуш башталгандан кийин буудайды деңиз аркылуу экспорттоо дээрлик токтоп калган. Июль айында Москва үч украин портунан дан азыктарын жөнөтүп турууга макулдук берген. Ноябрда буудай экспорттоо келиши дагы 120 күнгө узартылган.

Украина буга чейин Орусияны оккупацияланган аймактардан дан азыктарын чыгарып кетүүгө бир нече жолу айыптаган.

Путин: мобилизациялангандардын 50 миңи Украинада согуштук аракеттерге катышууда

Орусия президенти Владимир Путин мобилизациялаган 80 миң киши ушул тапта Украинада экенин, алардын 50 миңи согуштук аракеттерге катышып жатканын айтты. Бул тууралуу ТАСС кабарлады.

“Бизде 50 миң киши согуштук бөлүктөрдө. Калгандары азырынча согуштук аракеттерге катышкан жок. Бирок 80 миңге чейинки киши согуштук аракеттер жүрүп жаткан аймакта. Калгандарынын баары – полигондордо”, – деди Путин.

Ноябрдын башында “Медиазона” Украинада набыт болгон 115 мобилизацияланган кишинин аты-жөнүн жарыяланган. Басылма чын-чынында бул сан алда канча көп болушу мүмкүн экенин божомолдогон.

Буга чейин коргоо министри Сергей Шойгу мобилизацияланган 300 миңдей кишинин 87 миңи атайын даярдыктан өткөндөн кийин Украинага жөнөтүлгөнүн маалымдаган. Министр аскерге чакырылган жоокерлер согушка жиберилбей турганын айткан.

21-сентябрда Орусиянын президенти Владимир Путин жарым-жартылай мобилизация жарыялаган. Ушундан кийин миңдеген жарандар учак жана чек арадагы пункттар аркылуу өлкөдөн чыгып кете башташкан.

Марат Иманкулов: Жапаров Путинге кыргыз-тажик чек ара маселесин чечүүдө ортомчу болууну сунуштады

Кыргызстан Тажикстан менен чек арасын тактап алыш үчүн Орусияга ортомчулук сурап кайрылып, орус тарап Советтер Союзунан бери сакталып турган архивдик документтерди изилдеп чыкмай болду. Бул тууралуу 17-октябрда “Биринчи радионун” эфиринде Коопсуздук кеңешинин катчысы Марат Иманкулов билдирди.

Анын айтымында, президент Садыр Жапаров мындай өтүнүч менен орус президенти Владимир Путинге Астанада тажик президенти Эмомали Рахмон үчөө өткөргөн жолугушууда айткан:

“Ал жерде ачык сүйлөшүү болду. Биздин президент өз көз карашын билдирип, чек ара маселеси тынчтык жана сүйлөшүү жолу менен чечилиши керек экенин, биз бул принциптен эч качан тайбаганыбызды жана мындан ары да ошону карманарыбызды айтып, чек арадагы чечиле элек маселелерди чырга же агрессияга айландырууну токтотуш керектигин белгиледи. Ошондой эле ал Орусиянын президенти Путинге чек ара маселесин жөнгө салууда ортомчу болушун айтып кайрылды. Себеби маселе аябай тереңдеп кетти”.

Иманкулов билдиргендей, Орусия колундагы архивдик документтерди карап бермей болду:

“Биз баарыбыз бир өлкөдө – Советтер Союзунда жашаганбыз. СССРдин мураскери катары Орусиянын борборундагы архивдик мекемелерде административдик чек аралар боюнча көптөгөн документтер, карталар сакталып калган. Путин бул сунушту кабыл алды. Алар баарын изилдеп чыкмай болушту. Маселенин, талаштын өзөгү эмнеде болуп жатканын жөнөткүлө деп суранышты. Алар архивдик документтерди көтөрүп чыгып, бул маселени тынч жол менен чечип алышыбызга жардам бермей болушту”.

Өткөн аптада Казакстандын Астана шаарында 20дан ашуун өлкө лидери чогулуп, бир нече эл аралык жыйындар өткөн. Ошондой эле Кыргызстандын, Орусиянын, Тажикстандын президенттери Садыр Жапаров, Владимир Путин жана Эмомали Рахмондун үч тараптуу жолугушуусу да болгон.

Анда кыргыз-тажик чек арасындагы кырдаал жабык талкууланды.

Гаагада Путинди соттоо үчүн атайын трибунал түзүлөт

Гаагада Украинанын өтүнүчү менен эң мыкты эл аралык юристтердин катышуусунда Путин жана Орусиянын бардык саясий жетекчилери үчүн атайын трибунал түзүлүүдө.

Аларды Украинага каршы агрессиялык кылмыштары үчүн соттошот. Трибуналды түзүүнү он бир өлкө колдоду. Сот болжол менен бир жылдан кийин башталышы мүмкүн. Бул тууралуу “Настоящее Время” телеканалына атайын трибуналдын украиналык жумушчу тобунун мүчөсү Олег Гавриш билдирди.

Анын айтымында, трибуналды түзүү боюнча эл аралык келишим дээрлик даяр.

“Агрессия кылмышы эл аралык укукта эң жогорку кылмыш болуп эсептелет. Ошондуктан бул согушту баштаган кишилерди соттоо үчүн жетиштүү себеп боло алат. Украинада согуш 2014-жылы эле башталган, быйыл февралда болсо толук масштабдуу кол салуу болду. Мунун баарын Путин, Шойгу, Лавров, Патрушев, Бортников, Медведев жана башкалар кирген Орусиянын Коопсуздук кеңеши колдоду. Алар бул кылмыштар үчүн жазаланышы керек болгон биринчи талапкерлер”, – деп белгиледи Гавриш.

Эгер күнөөлөрү далилденсе, алар 30 жылдан өмүрүнүн аягына чейин эркинен ажыратылат. Бул сотту түзүүнү Балтия өлкөлөрү, Польша, Улуу Британия, Чехия, Словакия, Румыния колдойт.

Гавриштин билдиришинче, бул жерде Орусиянын пикири такыр маанилүү эмес. Эгер орус лидерлери аталган өлкөлөргө келсе, алар кармалат жана соттолот.

Путиндин балдарынын энеси Алина Кабаеванын Швейцариядагы үйү $75,5 миллионго сатыкка коюлган

Болжол менен олимпиада чемпиону Алина Кабаева пайдаланып жүргөн делген Швейцариядагы үй 75 миллион швейцариялык франкка (75,5 миллион доллар) сатыкка коюлган. Бул тууралуу “Досье” иликтөө борбору жазды.

Кабаева – “Улуттук медиа топтордун” топ-менеджери. Иликтөөлөрдүн көбүндө ал Орусиянын президенти Владимир Путиндин балдарынын энеси экени айтылып келет. Орусия лидери менен жакын мамиледе болгону үчүн ага эл аралык санкциялар салынган.

“Досьенин” кабарчысы өзүн Женева көлүнүн жээгинен турак жай издеп жүргөн банкирдин жардамчысы катары тааныштырып, аталган үйдү сатуу менен алектенип жаткан риелторго телефон чалган. Риелтор үйдүн Кабаевага байланышы бар-жоктугу тууралуу суроого чейин кабарчыга кыймылсыз мүлк тууралуу көп маалымат берген. Ал журналисттин суроосуна жооп бербестен сөзүн улантып, көп өтпөй үй сатыктан алынганын билдирген. Журналисттин расмий катынан кийин үй сатылары тууралуу жарыя өчүрүлгөн.

Сатыкка коюлган үй Швейцариянын жана дүйнөнүн эң бай муниципалитети деп эсептелген Колоньи аймагында жайгашкан. Буга чейин The Wall Street Journal гезити Кабаеванын Швейцариядагы жашоосу тууралуу макаласында ал Луганодогу резиденцияда жана Колоньидеги тик учак коно турган аянтчасы бар виллада жашаганын жазган. “Досьенин” журналисти аталган муниципалитеттеги бир гана үйдө ошондой аянтча бар экенин аныктаган.

Үй Rampe de Cologny көчөсүндө, мурда Владимир Путиндин досу Геннадий Тимченкого таандык болгон вилланын жанында жайгашкан. Бул жер – “Вилла Hauterive” деп аталган аянттын бир бөлүгү. Кезинде анын жарымы Швейцариянын президенти Гюстав Адорго таандык болсо, акыркы жылдары ага Сауд Арабиянын жарандары ээлик кылып келишкен. Кабаева жашаганы айтылган экинчи бөлүгү документтер боюнча финансист Пьер Ален Фольеге жана анын жубайы Ван Линге таандык.

Жапаров, Путин жана Рахмон кыргыз-тажик чек арасындагы абалды талкуулады

13-октябрда Казакстандын борбору Астана шаарында Кыргызстан, Орусия жана Тажикстан президенттери Садыр Жапаровдун, Владимир Путиндин жана Эмомали Рахмондун үч тараптуу жолугушуусу болду.

Анда кыргыз-тажик чек ара маселеси талкууланганын Жапаровдун басма сөз кызматы кабарлады. Маалыматка караганда, мамлекет башчысы орус президентине биргелешкен жолугушууну өткөрүү демилгеси, Кыргызстан менен Тажикстандын ортосундагы мамлекеттик чек ара маселелеринде көмөк көрсөтүүгө даярдыгы үчүн ыраазычылык билдирген. Ошондой эле кыргыз-тажик мамлекеттик чек арасында түзүлгөн соңку кырдаалга кеңири токтолгон.

“Ал кыргыз тарап талаштуу маселелерди тынчтык жолу жана саясий-дипломатиялык ыкмалар менен гана чечүү зарылчылыгы боюнча өзгөрүүсүз позицияны карманарын белгилеп, тажик тараптын куралдуу агрессиясынын кесепеттерин эске салды. Жапаров ошондой эле Кыргызстан кыргыз-тажик мамлекеттик чек ара сызыгын эки тарапка тең пайдалуу болгудай кылып тез арада калыптандырууга ынтызар экенин, бул туруктуулуктун жана ынак коңшулуктун кепили боло тургандыгын белгиледи”, – деп айтылат президенттин басма сөз кызматы тараткан маалыматта.

Жолугушууда сөздү Владимир Путин баштап, эки өлкө тең Орусиянын стратегиялык өнөктөшү экенин, эл аралык уюмдардын алкагында тыгыз кызматташып жатышканын белгиледи.

Ошондой эле Кыргызстандын миллиондой, Тажикстандын 2 млн. жараны Орусияда окуп, иштеп жатканын айтып, бардык багыттар боюнча жакын байланыштар бар экенин айтты. Өлкөлөр ортосунда соода алмашуунун көлөмү көбөйүп жатканын жана анын өнүгүшүнө кызыкдар экенин белгиледи. Ошондой эле үч тараптуу сүйлөшүүдө таңуулаган жагдай жок экенин, бирок жолугушуу жогорку мааниге ээ экенин кошумчалады.

Сүйлөшүүлөрдүн калган бөлүгү жабык форматта өттү. Ал боюнча башка маалымат айтылган жок.

Биргелешкен жолугушуу Путиндин демилгеси менен уюштурулган.

Бул – Кыргызстан менен Тажикстан президенттеринин чек арадагы ондогон адамдын өмүрүн алган соңку куралдуу кагылыштан кийинки алгачкы жолугушуусу. Анда Жапаров менен Рахмон кол алышып учурашкан жок.

16-17-сентябрда кыргыз-тажик чек арасында кан төгүлгөн окуяны Кыргызстандын Тышкы иштер министрлиги “Тажикстандын алдын ала пландаган куралдуу агрессиясы” деп атаган.

Душанбе айыпты Бишкекке оодарган.

Астанада Жапаров, Путин жана Рахмондун жолугушуусу болот

Казакстандын борбору Астана шаарында 13-октябрда Кыргызстан, Орусия, Тажикстандын президенттери Садыр Жапаров, Владимир Путин жана Эмомали Рахмондун үч тараптуу жолугушуусу болот.

Анда кыргыз-тажик чек арасындагы көйгөйлүү маселелерди талкуулоо пландалууда. Бул тууралу президенттин басма сөз катчысы Эрбол Султанбаев журналисттерге билдирди. Маалыматка караганда, биргелешкен жолугушуу Кыргызстан менен Тажикстандын ортосундагы чек ара маселелерин чечүүгө көмөк көрсөтүүгө даярдыгын билдирген орус мамлекет башчысы Владимир Путиндин демилгеси менен уюштурулган.

12-14-октябрда Астанада Азиядагы өз ара аракеттенүү жана ишеним чаралары боюнча кеңешмеге мүчө мамлекеттердин VI саммити, Көз карандысыз мамлекеттер шериктештигинин (КМШ) мамлекет башчыларынын кеңешинин кезектеги жыйыны жана “Борбор Азия + Орусия” мамлекет башчыларынын саммити өтөт.

Ага катышуу үчүн Кыргызстандын президенти Садыр Жапаров 12-октябрда Казакстанга барды.

Бул Кыргызстан менен Тажикстан президенттеринин чек арадагы ондогон адамдын өмүрүн алган соңку куралдуу кагылыштан кийинки алгачкы жолугушуусу болот.

16-17-сентябрда кыргыз-тажик чек арасында кан төгүлгөн окуяны Кыргызстандын Тышкы иштер министрлиги “Тажикстандын алдын ала пландаган куралдуу агрессиясы” деп атаган.

Дүйшөмбү кайра айыпты Бишкекке оодарган.

Путиндин Казакстанга келишине каршы чыккандар көбөйүүдө

Алматы шаарында полиция кызматкерлери Орусия консулдугунун алдына нааразылык акциясына чыккан төрт активистти кармап кетти.

Акциянын катышуучулары орус президенти Владимир Путиндин 12-октябрга белгиленген Астанага сапарына нааразылык билдирүү үчүн чыгышкан. Бул тууралуу  казак  ЖМКлары жазып чыгышты.

Митингге чыккандар Орусия консулдугунун имаратына жетип, талаптарын айтууга үлгүрүшкөн жок. Жолдо аларды полиция кармап, автозакка салып кетти.

Полиция кармоонун себебин түшүндүргөн жок.

12-14-октябрда Орусиянын президенти Владимир Путин Астанада болору кабарланган. Бул арада соцтармактарда Путиндин Казакстанга келишине каршы чыккандар көбөйүүдө. Укук коргоочулар, саясатчылар жана жөнөкөй жарандар Украинадагы согушту айыптап, сапарды жокко чыгарууну талап кылууда. Казак аткаминерлери Путиндин сапары өтө маанилүү экенин белгилеп жатышат.

Астанада 13-октябрда Азиядагы өз ара аракеттенүү жана ишеним чаралары боюнча кеңешменин 6-саммити, 14-октябрда Көз карандысыз мамлекеттер шериктештигинин мамлекет башчыларынын кеңешинин жыйыны, ушул эле күнү “Борбор Азия – Орусия” форматындагы 1-саммит болот.

Кремль: Путин Эрдоган менен Казакстанда жолугушат

Орусиянын президенти Владимир Путин 13-октябрда Казакстанда өтө турган саммитте Түркиянын лидери Режеп Тайып Эрдоган менен жолугушат. Бул тууралуу Кремлдин басма сөз катчысы Дмитрий Песков билдирди.

Анын айтымында, жолугушуунун жүрүшүндө Украинадагы согуш жана орус-түрк эки тараптуу мамилелери жөнүндө сөз болот.

Күн мурун AFP жана dpa агенттиктери Түркиянын расмий адамдарына шилтеме кылып, Эрдоган менен Путин Азиядагы өз ара аракеттенүү жана ишеним чаралары боюнча кеңешменин саммити учурунда Астанада жолугуша турганын кабарлашкан.

Буга чейин Түркия менен Орусиянын лидерлери сентябрдын ортосунда Самаркандда өткөн Шанхай кызматташтык уюмунун саммитинде жолугушкан.

НАТОго мүчө Түркия Орусия Украинага кол салган 24-февралдан бери өзүн Киев менен Москванын ортосунда ортомчу катары көрсөтүп келет. Анкара Москваны сындап, ошол эле маалда Батыш өлкөлөрүнүн экономикалык жана каржылык санкцияларына кошулган эмес.

Эрдоган согушту токтотуу үчүн Путин менен Зеленский сүйлөшүүлөрдү баштайт деген үмүтүн билдирген.

Өткөн жумада Түркиянын тышкы иштер министри Мевлүт Чавушоглу март айында Стамбулда өткөн сүйлөшүүлөрдөн кийин Киев менен Москва дипломатиядан алыстап кетишкенин айткан. “Украин-орус согушу созулган сайын кырдаал начарлагандан начарлап баратат. Ок атышуу болушунча тез аранын ичинде токтотулушу керек. Канчалык эрте болсо, ошончолук жакшы болот”, – деген Чавушоглу.

Путин украин армиясынын ийгиликтүү контрчабуулдарынан кийин өткөн айда Украинанын орус аскерлери көзөмөлдөп турган аймактарында “референдум” өткөрүп, алар Орусиянын курамына кошулганын жарыялаган. Ал Москва Украина менен сүйлөшүүлөргө даяр экенин да билдирген. Бирок Зеленский Путин менен сүйлөшүү ыктымалдыгын четке кагып, Украина Орусиянын Путинден кийинки президенти менен гана сүйлөшөрүн айткан.

Меню