Menu

ЖККУ – ОДКБ

КР Тышкы иштер министри Жээнбек Кулубаев ЖККУга (ОДКБ) мүчө-мамлекеттердин тышкы иштер министрлерине кыргыз-тажик чек арасындагы кырдаал тууралу айтып берди

Нью-Йорк шаарында Кыргыз Республикасынын Тышкы иштер Министри Жээнбек Кулубаев армян тараптын төрагалыгы алдында өткөн ЖККУга мүчө-мамлекеттердин тышкы иштер министрлеринин жумушчу жыйынына катышты. Бул тууралу ТИМдин басма сөз кызматы билдирет.

Жолугушуунун жүрүшүндө БУУнун Башкы Ассамблеясынын 77-сессиясынын күн тартиби боюнча ЖККУга мүчө-мамлекеттердин позицияларын координациялоо боюнча конструктивдүү пикир алмашуу болду.

Министр ошондой эле Тажикстан Республикасынын мыйзамсыз, чагымчыл жана деструктивдүү аракеттеринин натыйжасында кескин начарлап кеткен кыргыз-тажик мамлекеттик чек арасындагы кырдаалга токтолду.

Ж.Кулубаев БУУнун Уставында жана ЕККУнун Корутунду актысында, ошондой эле башка эл аралык документтерде бекитилген аймактык бүтүндүк, мамлекеттик чек аралардын кол тийбестиги, эл аралык талаш-тартыштарды тынчтык жолу менен чечүү, күч колдонбоо жана күч колдонуу менен коркутпоо сыяктуу фундаменталдык эл аралык принциптер одоно түрдө бузулганын белгиледи. Министр тажик тарапты 1991-жылдын 8-декабрындагы КМШ түзүү жөнүндө макулдашуунун жана 1991-жылдын 21-декабрындагы Алма-Ата декларациясынын алкагында аймактык бүтүндүктү жана учурдагы чек аралардын кол тийбестигин сыйлоо боюнча эл аралык милдеттенмелерди сактоого чакырды.

Мындан тышкары Армения Республикасынын Уюмда төрагалык кылган учурда ЖККУ ишмердүүлүгүнүн артыкчылыктуу багыттары, ошондой эле ЖККУнун Жамааттык коопсуздук кеңешинин үстүбүздөгү жылдын төртүнчү кварталында боло турган сессиясына даярдыктын жүрүшү боюнча талкууланды.

Тышкы иштер министрлигинин Башчысы Кыргызстандын эл аралык демилгелерин жарыялады. Тактап айтканда, ал быйыл кыргыз тарап БУУнун Башкы Ассамблеясынын 77-сессиясынын 2023-2027-жылдарды «Тоолорду өнүктүрүү боюнча иш-аракеттердин беш жылдыгы» жана «Куралсыздануу жана таркатпоо үчүн маалымдуулуктун эл аралык куну» деп жарыялоо боюнча резолюцияларынын долбоорлорун алдыга жылдырып жатканын билдирди. Ошондой эле, Кыргызстан 2023-2025-жылдарга БУУнун Адам укуктары боюнча кеңешинин мүчөлүгүнө талапкерлигин койгондугу тууралуу маалымдап, катышуучулардан аталган демилгелерди колдоону суранды.

Садыр Жапаров Москвада "санкциялардын согушу" тууралуу сөз кылды

Президент Садыр Жапаров Жамааттык коопсуздук келишими уюмунун лидерлеринин Москвадагы саммитинде Кыргызстанды “санкциялардын согушу” тынчсыздандырып турганын айтты.

“Кыргызстандын экономикасы коронавирус пандемиясынан калыбына келе электе санкциялар боюнча абал азык-түлүк жана энергетика коопсуздугуна, макроэкономикалык жана социалдык туруктуулукка коркунуч жаратууда. Ушундай шартта санкциялардын кесепетин жумшартуу жана биздин өлкөлөрдө социалдык-экономикалык абалдын начарлап кетишин алдын алуу үчүн жалпы иш-аракеттерди талкуулоого жана иштеп чыгууга зарылчылык жаралды”, – деди Жапаров.

Ал бул маселени жакында Жогорку Евразиялык экономикалык кеңештин Бишкектеги жыйынында жана биринчи Евразиялык экономикалык форумда талкуулаганга мүмкүнчүлүк болорун белгиледи.

Мындан тышкары Жапаров коопсуздукка байланыштуу коркунучтар жана саясий-аскердик чыңалуулар Жамааттык коопсуздук келишими уюмунун дээрлик бардык чек арасына жеткенин, уюмга мүчө мамлекеттердин ички ишине сырттан кийлигишүү аракети байкалып жатканын айтты. Жапаров буга жыл башында Казакстандагы “күтүүсүз кризисти” мисал келтирип, уюм бул окуяга ыкчам реакция кылганын белгиледи.

Ошондой эле кыргыз президенти ЖККУнун түштүктөгү Ооганстан менен чек арасында чыңалган абал өкүм сүрүп жатканын, буга айрым ооган райондорунда радикалдуу-террорчул түзүмдөрдүн иш-аракети себеп болуп жатканын да кошумчалады.

ЖККУнун Москвадагы саммити Орусия Украинага басып киргенден бери биринчи жолу өтүп жатат.

Орус күчтөрү 24-февралда Украинага кол салгандан бери Москва Батыш өлкөлөрүнүн мурда болуп көрбөгөн санкцияларына кабылды. Мындай чаралардын кесепети Борбор Азия өлкөлөрүндө да сезилип жатат. Батыш өлкөлөрү санкциялар эгемен өлкөгө кол салган Орусияны ооздуктоо үчүн зарыл чара экенин белгилеп келишет.

Айрым эл аралык уюмдар жана жарандык активисттер Казакстандагы январь окуяларында жайкын тургундарга ок атылганын сынга алышууда.

Министрлер кабинетинин төрагасы Акылбек Жапаров ЖККУнун Жамааттык коопсуздук кеңешинин кезексиз сессиясына онлайн режимде катышат

Бүгүн, 10-январда, Кыргыз Республикасынын Президенти Садыр Жапаровдун тапшырмасы менен Министрлер Кабинетинин Төрагасы Акылбек Жапаров онлайн режиминде ЖККУнун Жамааттык коопсуздук кеңешинин кезексиз сессиясына катышат.

Сессияда «Казакстан Республикасындагы абал жана аны жөнгө салуу чаралары жөнүндөгү» маселе талкууланат.

Жогорку Кеңеш ЖККУнун Жамааттык тынчтык орнотуу күчтөрүнүн курамында Казакстанга аскер контингентин жөнөтүүгө уруксат берди

Кыргыз Республикасынын Жогорку Кенеши бүгүнкү 7-январдагы жыйынында, ЖККУнун Жамааттык тынчтык орнотуу күчтөрүнүн курамында Казакстан Республикасына Кыргыз Республикасынын аскер контингентин жөнөтүүгө уруксат берди.

Белгилей кетсек, 5-январда казак тарап ЖККУнун катчылыгына уюмдун жоболоруна жана юридикалык милдеттенмелерине ылайык, Казакстан Республикасына тиешелүү аскердик контингенттерди жөнөтүү аркылуу тараптардын жардам көрсөтүүсүн тез арада уюштуруу өтүнүчү менен кайрылган.

Кыргыз Республикасынын Президенти Садыр Жапаров 6-январда Жогорку Кеңештин Төрагасы Талант Мамытовго парламенттин кезексиз жыйынын чакыруу жана Казакстан Республикасына ЖККУнун Жамааттык тынчтык орнотуучу күчтөрүнүн курамына Кыргыз Республикасынын аскер кызматкерлерин жөнөтүү маселесин кароо сунушу менен кайрылган.

Кыргыз Республикасынын Конституциясынын жоболоруна ылайык, Кыргыз Республикасынын Жогорку Кеңеши Казакстан Республикасынын аймагында кырдаалды турукташтыруу жана жөнгө салуу максатында тынчтыкты орнотуу иш-чараларына катышуу үчүн жамааттык күчтөрдүн курамында Кыргыз Республикасынын аскер контингентин жиберүүгө уруксат берди.

Кыргызстандык тынчтык орнотуучулар стратегиялык маанидеги объектилерди коргоону камсыздоого тартылат. Аны менен бирге алар Казакстан Республикасындагы акциялардын катышуучуларына карата эч кандай аракеттерге тартылбайт.

ЖККУ Казакстанга аскерлерин жөнөттү

Жамааттык коопсуздук келишими уюму (ЖККУ) Казакстанга аскерлерин жөнөткөнүн расмий жарыялады. Бул тууралуу уюмдун Жамааттык коопсуздук кеңешинин төрагасы, Армениянын премьер-министри Никол Пашинян билдирди.

6-январь күнү эртең менен ЖККУдан “Интерфакс” орус агенттигине “уюм Казакстанга аскерлерин жөнөткөнүн” билдиришкен.

Орусиянын Мамлекеттик Думасынын КМШ боюнча комитетинин башчысы Леонид Калашников ЖККУнун күчтөрү аскердик инфраструктураны, Байкоңур космодромун жана башка объектилерди коргой турганын айткан.

Буга чейин Казакстандын президенти Касым-Жомарт Токаев Алматыдагы башаламандыктарга байланыштуу ЖККУга жардам сурап кайрылган. Ал Алматыдагы кырдаалды “террордук топтордун иши” деп атаган.

Социалдык түйүн колдонуучулары Токаевдин бул чечимин сындап, чет өлкөлүк аскерлердин кирише каршы пикирлерин жазып жатышат.

ЖККУга Армения, Беларус, Кыргызстан, Казакстан, Орусия жана Тажикстан кирет.

6-январда Алматы шаардык полиция департаменти калаада ондогон киши каза болгонун билдирди. Өлкөдө интернет байланыш жок болгондуктан, акыркы окуялар тууралуу маалымат алуу оор болууда.

5-январь күнү Алматыда башамандык болуп, белгисиз топ акимчиликти жана аэропортту басып алган. Өлкөдө 17:00дөн түнкү 12ге чейин интернет өчүрүлгөн. Шаардагы ондогон дүкөн жана банктар тонолгону кабарланган. Ага чейин Токаев баш калаадан кетпей турганын жана Коопсуздук кеңешин жетектээрин айтып, жалпы өлкө боюнча өзгөчө абал жарыялаган.

Садыр Жапаров ЖККУга мүчө өлкөлөрдүн лидерлери менен Казакстандагы кырдаал боюнча бир катар телефондук сүйлөшүүлөрдү өткөрдү

Кыргыз Республикасынын Президенти Садыр Жапаров кечээ кечинде ЖККУга мүчө өлкөлөрдүн лидерлери менен бир катар телефондук сүйлөшүүлөрдү өткөрдү.

Мамлекет башчысы Казакстан Республикасынын Президенти Касым-Жомарт Токаев, ЖККУнун Жамааттык коопсуздук кеңешинин төрагасы, Армениянын Премьер-министри Никол Пашинян, ошондой эле Россия Федерациясынын Президенти Владимир Путин менен сүйлөштү.

Лидерлер Казакстан Республикасындагы учурдагы кырдаалды талкуулашты.

Президент Садыр Жапаров коңшу өлкөдөгү болгон адам курмандыктары, көптөгөн талап-тоноочулук жана башка фактылар тууралуу маалыматтарга тынчсыздануусун билдирди.

Тараптар ЖККУнун Уставына ылайык, кризистик кырдаалды жөнгө салуу боюнча коопсуздукту камсыздоонун бирдиктүү позициясын талкуулашты.

Садыр Жапаров ЖККУ саммитинде кыргыз-тажик мамлекеттик чек арасы боюнча маселени көтөрдү

Кыргыз Республикасынын Президенти Садыр Жапаров бүгүн, 16-сентябрда, Душанбе шаарында Жамааттык Коопсуздук Кеңешинин (ЖККУ) сессиясында кыргыз-тажик мамлекеттик чек арасы боюнча маселени көтөрдү.

Ал кыргыз-тажик мамлекеттик чек арасындагы чыңалуунун сакталышы кыргыз тарапты Уюмга мүчө бардык мамлекеттердин буга өзгөчө көңүл буруусуна басым жасоого милдеттендирерин белгиледи.

«Кыргыз Республикасы тынчтыкты сүйгөн, ачык жана демократиялуу мамлекет болуп саналат, өзүнүн көз карандысыздыгынын алгачкы күндөрүнөн тартып коңшу өлкөлөр жана дүйнөдөгү башка мамлекеттер менен жалпы ырааттуу, достук, ынак коңшулук жана тең салмактуу саясатты жүргүзүп келет. Өлкөлөр ортосундагы талаштуу маселелерди тынчтык жолу менен жана саясий жана дипломатиялык ыкмалар менен гана сүйлөшүү столунда чечүү зарылдыгы боюнча Кыргызстандын көз карашы өзгөрүүсүз калат», — деп баса белгиледи Садыр Жапаров.

Региондогу абалды эске алуу менен Садыр Жапаров бир катар сунуштарды, анын ичинде ЖККУга мүчө болгон мамлекетке уюмга мүчө башка өлкө тарабынан куралдуу кол салуу болгон учурда Уюмдун алкагында ыкчам чара көрүү жана чечим кабыл алуу механизмдерин иштеп чыгууну айтты.

Президент Садыр Жапаров ошондой эле ЖККУга мүчө мамлекеттердин башчыларынын көңүлүн кыргыз тарап Уюмдун анын ишмердүүлүгүнүн эффективдүүлүгүн жана натыйжалуулугун камсыз кылуу максатында өнөктөштөр менен өз ара кызыкчылык жараткан бардык маселелер боюнча стратегиялык сүйлөшүүлөрдү улантуу ниети бар экенине бурду.

Душанбеде ЖККУ саммити жабык өтүүдө

Бүгүн, 16-сентябрда Тажикстандын баш калаасы Душанбе шаарында Жамааттык коопсуздук келишим уюмуна (ЖККУ) мүчө өлкөлөрдүн башчыларынын жолугушуусу өтүүдө.

Ага Кыргызстандын, Казакстандын, Тажикстандын президенттери, Армениянын премьер-министри жана Орусиянын тышкы иштер министри катышып жатат.

Жыйындын башында тажик президенти Эмомали Рахмон ЖККУнун алкагында кызматташтыкты өнүктүрүү тууралуу кыска сүйлөгөндөн кийин залдагы журналисттер сыртка чыгарылып, жолугушуу жабык уланды. Жыйындын соңунда ЖМК өкүлдөрү үчүн брифинг уюштурулат деп күтүлүүдө.

Буга чейин ЖККУ саммитиндеги негизги темалардын бири — Ооганстандагы абал болору кабарланган.

ЖККУ саммити Ооганстанда бийликке талибдер келген учурда өтүп жатат. 17-сентябрда Душанбеде Шанхай кызматташтык уюмуна (ШКУ) мүчө өлкөлөрдүн лидерлеринин жолугушуусу башталат. Мындан тышкары бул күнү ЖККУ жана ШКУ өлкөлөрүнүн лидерлеринин Ооганстандагы кырдаал боюнча атайын жолугушуусу пландалууда.

Жамааттык коопсуздук келишим уюму (ЖККУ) 1992-жылы түзүлгөн. Бүгүнкү күндө ага Кыргызстан, Армения, Беларус, Орусия, Казакстан жана Тажикстан мүчө.

Президент Садыр Жапаров ЖККУнун жамааттык коопсуздук Кеңешинин сессиясына жана ШКУга мүчө-мамлекет башчыларынын Кеңешинин отурумуна катышат

Үстүбүздөгү жылдын 15-17-сентябрында Кыргыз Республикасынын Президенти Садыр Жапаров Тажикстан Республикасынын Душанбе шаарына иш сапары менен барып, анын алкагында Жамааттык коопсуздук келишими уюмунун жамааттык (ЖККУ) коопсуздук Кеңешинин сессиясына жана Шанхай кызматташтык уюмуна (ШКУ) мүчө-ммалекет башчыларынын Кеңешинин отурумуна катышат.

Бул туурасында Кыргыз Республикасынын Президентинин Администрациясынын тышкы саясат бөлүмүнүн башчысы Жээнбек Кулубаев билдирди.

Үстүбүздөгү жылдын 16-сентябрында, Тажикстан Республикасынын төрагалыгында өтүүчү Жамааттык коопсуздук келишими уюмунун Жамааттык коопсуздук кеңешинин кезектеги сессиясынын жүрүшүндө мамлекет башчылары эл аралык жана регионалдык коопсуздуктун актуалдуу көйгөйлөрү жана уюмдун сессия аралык мезгилдеги ишмердүүлүгүнүн негизги жыйынтыктары жөнүндө пикир алмашышат. Ошондой эле алдыда Армениянын ЖККУдагы төрагалыгы мезгилиндеги уюм ишмердүүлүгүнүн алгылыктуу багыттары жөнүндө маалыматты угушат.

Жыйыныктоочу декларацияга, ошондой эле уюмдун ишмердүүлүгүнүн маселелерин жөнгө салган 13 документке кол коюлары күтүлөт.

Андан соң 17-сентябрда Тажикстан Республикасынын төрагалыгында ШКУга мүчө-мамлекет башчыларынын кеңешинин кезектеги отуруму өтөт.

ШКУ отурумунун күн тартиби ШКУнун ишмердүүлүгүнүн 20 жылдагы негизги жыйынтыгы, уюм алкагында көп тараптуу өз ара аракеттенүүнүн абалы жана келечеги, пандемиянын кесепеттерин жоюу боюнча биргелешкен кадамдар, ошондой эле регионалдык жана эл аралык кызматташтыктын актуалдуу маселелерин камтыйт.

Бул отурумдун жыйынтыгы боюнча ШКУнун 20 жылдыгына арналган мааракелик декларацияны кабыл алуу пландалууда, ошондой эле уюмдун ишмердүүлүгүнө тиешелүү 30дан ашуун документке, анын ичинде ШКУнун жаңы башкы катчысын дайындоо тууралуу чечимге кол коюлары күтүлүүдө.

Афганстанда болуп жаткан окуяларга, ошондой эле чөлкөмдөгү туруктуулукту жана коопсуздукту сактоо боюнча чараларды кабыл алуунун зарылдыгына байланыштуу Президент Садыр Жапаров ШКУ жана ЖККУ мүчө-мамлекеттеринин делегация башчыларынын Афганстандагы кырдаал боюнча жолугушуусуна катышат. Ошондой эле саммит талааларында эки тараптуу жолугушуулар өтөт.

«Аны менен бирге, Кыргыз Республикасы көрсөтүлгөн көп тараптуу аянтчалар алкагындагы кызматташууга чоң маани берээрин белгилейбиз.
Кыргызстандын ЖККУ жана ШКУга катышуусу өлкөнүн тышкы саясатындагы приоритеттүү багыттардын бири», — деп белгиледи Жээнбек Кулубаев.

ЖККУнун Кыргызстандагы машыгуусуна Тажикстан катышпайт

Жамааттык коопсуздук келишими уюмунун Кыргызстанда өтө турган “Рубеж-2021” аскердик машыгуусуна Тажикстандын өкүлдөрү катышпайт.

Бул тууралуу 6-сентябрда Парламенттин Эл аралык иштер, коргоо жана коопсуздук комитетинин жыйынында коргоо министринин орун басары Нурлан Кирешеев депутат Анвар Артыковдун суроосуна жооп берип жатып билдирди. Анын себеби айтылган жок. Кирешеев кыргызстандык аскерлер жакын арада Тажикстанда өтө турган кезектеги машыгууга бара турганын кошумчалады.

Комитет жыйынында депутаттар ЖККУнун ролу, уюмга мүчө мамлекеттер ортосундагы чатак чыккан маалдагы орду, Коргоо министрлигинин аракети кандай болушу керек экенине кызыкты.

“Рубеж-2021” деп аталган аскердик машыгуу 7-9-сентябрда “Эдельвейс” полигонунда өтөт. Ага Орусия баш болгон Жамааттык коопсуздук келишими уюмуна (ЖККУ) мүчө мамлекеттердин армиясы катышат. Иш-чара Ооганстанда курчуган кырдаалга байланыштуу Кыргызстанда жана Тажикстанда өткөрүлүп жатат.

Жамааттык коопсуздук келишими уюмуна Армения, Беларус, Казакстан, Кыргызстан, Орусия жана Тажикстан кирет. Борбор Азия өлкөлөрү Ооганстандагы кырдаалга тынчсызданып, качкындардын агымынан чочулап турат.

Меню