Menu

Казакстан

ТИМ казак тарапты Викрам Рузахуновго консулдун жолугушуусун тез арада камсыз кылууга жана аны жакынкы арада бошотууга чакырды

Жалпыга маалымдоо каражаттарында жана социалдык тармактарда Казакстан Республикасында болуп өткөн массалык баш аламандыкка катышты деп шектелип Кыргызстандыктын кармалганы тууралуу виде сюжеттин таралышана байланыштуу, бүгүн 2022-жылдын 9-январында Кыргыз Республикасынын Тышкы иштер министрлигине Кыргыз Республикасындагы Казакстан Республикасынын Атайын жана Ыйгарым укуктуу Элчиси Рапиль Жошыбаев чакырылды.
Жолугушуунун жүрүшүндө КРнын Тышкы иштер министринин орун басары А. Мадмаров Казакстан Республикасынын Атайын жана Ыйгарым укуктуу Элчиси Р.Жошыбаевге КРнын жараны В.Рузахуновдун камалышына байланыштуу Министрликтин Нотасын тапшырды. Викрам Рузахуновго консулдун жолугушуусун тез арада камсыз кылууга жана аны жакынкы арада бошотууга чакырды.
Өз кезегинде Казакстандын Элчиси кыргыз тарабынын тынчсыздануусу Казакстан Республикасынын Тышкы иштер министрлигинин жетекчилигине тез арада жеткирилерин айтып, жакынкы аралыкта кеңири маалымат берүүнү убадалады. Ал азыркы оор кырдаалда Казакстандын компетенттүү органдары болгон окуянын бардык жагдайларын жана себептерин тактоо үчүн кылдат иликтөө жүргүзөт деп ишендирди.
Мындан сырткары, Кыргыз Республикасынын Тышкы иштер министринин биринчи орун басары Н.Ниязалиев Казакстан Республикасынын Тышкы иштер министринин орун басары М.Сыздыков жана Казакстан Республикасынын Атайын жана Ыйгарым укуктуу Элчиси Р.Жошыбаев менен телефон аркылуу сүйлөшүп, аталган жаранга менен байланышкан кырдаалга боюнча кыргыз тарабынын өтө тынчсыздануусун билдирди.
Н.Ниязалиев казак тарабын Казакстан Республикасындагы акыркы окуяларга чет элдик жарандардын катышуусу боюнча текшерилген жана ишенимдүү маалыматтарды гана жарыялоого чакырды. Ошондой эле консулдук мамилелер боюнча эл аралык жана эки тараптуу документтердин талаптарына ылайык Кыргыз Республикасынын жарандарынын кармалышы тууралуу өлкөнүн дипломатиялык өкүлчүлүктөрүнө өз убагында маалымат берүү зарылдыгын белгиледи.
Мындан тышкары, КРнын Тышкы иштер министрлигинин Консулдук кызмат департаментинин директору В.Рузахуновдун жакындары менен жолугуп, анын жүрүшүндө бардык жагдайларды тактоо боюнча көрүлүп жаткан чаралар тууралуу маалымат берип, Министрлик тарабынан көрүлүп жаткан чаралар жана аталган жаранды тезинен бошотуу боюнча бардык мүмкүн болгон аракеттер көрүлөөрүн ишендирди.
Жарандарга консулдук-укуктук жардам көрсөтүүнүн алкагында Министрлик Казакстан Республикасынын аймагындагы Кыргызстандын ар бир жаранына ар кандай жардам көрсөтүү боюнча бардык чараларды көрүп жатат.
Ошону менен бирге Кыргыз Республикасынын Тышкы иштер минитсри Р.Казакбаев Казакстан Республикасынын ТИМнин жетекчилиги менен туруктуу байланышта жана Казакстан Республикасынын аймагында жашап жана эмгектенип, тактап айтканда, базарларда жана башка иштерде иштеп жатышкан мекендештерибиздин маселеси Министрдин өзгөчө көзөмөлүндө.

УКМК: «Жапайы Арман» каймана аты бар криминалдык «авторитеттин» негизсиз билдирүүлөрү жакшы даярдалган маалыматтык чабуулдун уландысы

Боордош Казакстандагы кырдаалга, Казакстанда убактылуу жүргөн Кыргызстандын жарандарынын Казакстандын укук коргоо органдары тарабынан кармалган фактылары боюнча кыргыз коомчулугунун тынчсыздануусуна байланыштуу КР УКМК төмөндөгүлөрдү билдирет:

Учурда Казакстанда стабилдүүлүктү эртерээк калыбына келтирүү шартында Кыргызстан менен Казакстандын компетенттүү түзүмдөрүнүн ортосунда аймактык коопсуздукту жана укук тартибин камсыздоого багытталган зарыл болгон эки тараптуу байланыштар жүргүзүлүүдө. Мурдагыдай эле учурдагы кырдаалды эске алуу менен практикалык жана маалыматтык өз ара аракеттенүү уланууда.

Казакстандын укук коргоо органдарынын кызматкерлери тарабынан кармалган жана башка процессуалдык аракеттерге дуушар болгон жакындарына болгон Кыргыз Республикасынын жарандарынын тынчсызданууларына байланыштуу, КР УКМК Казакстандын компетенттүү органдары объективдүүлүктү камсыз кылат деп ишенет. Себеби, басымдуу көпчүлүгү соода жана тейлөө тармагында иштеген кыргызстандыктар кокусунан көчөдө калып, кармалып калышы мүмкүн. Эки тараптуу каналдар аркылуу Казакстандын компетенттүү түзүмдөрүнө Кыргызстандын жарандарынын Казакстандагы башаламандыктарга жана талап-тоноолорго эч кандай тиешеси жок экендиги маалымдалды. «Жапайы Арман» каймана аты бар криминалдык «авторитеттин» негизсиз билдирүүлөрүнөн келип чыккан, андан кийин, өзгөчө ушундай оор мезгилде боордош кыргыз-казак күчтөрүнүн ортосуна жик салууга кызыкдар болгондор тарабынан кабыл алынганы Казакстандын расмий өкүлдөрүнүн айтымында, жакшы даярдалган маалыматтык чабуулдун уландысы. Жана бул башаламандык аймагын кеңейтүүгө багытталган.

Кармалган В.Рузахунов жана ушундай кырдаалга туш болгон башка мекендештерибиз боордошубуз Казакстандагы окуяларды козгогон күчтөрдүн пландарынын бир бөлүгүнүн кезектеги курмандыктары болуп калганын билдиребиз. 

Өз кезегинде УКМК жана башка компетенттүү мамлекеттик органдар ар дайым казак боордоштор менен биргелешкен чараларды көрүүгө даяр жана казак бийлиги муну объективдүү чечип, кызыкдар күчтөр тарабынан кыргыздарга каршы таңууланган риторикага алдырбайт деп ишенет.

Биз кармалган жарандардын жакындарын сабырдуулукка, өз ара түшүнүшүүгө жана алардын жакындарына, казак боордошторубузга дуба кылууга, Казакстанда туулуп өскөн кыргыз мекендештерибизди тынчтыктын жана мыйзамдуулуктун тез арада калыбына келиши үчүн дуба кылууларына чакырабыз.

Жогорку Кеңеш ЖККУнун Жамааттык тынчтык орнотуу күчтөрүнүн курамында Казакстанга аскер контингентин жөнөтүүгө уруксат берди

Кыргыз Республикасынын Жогорку Кенеши бүгүнкү 7-январдагы жыйынында, ЖККУнун Жамааттык тынчтык орнотуу күчтөрүнүн курамында Казакстан Республикасына Кыргыз Республикасынын аскер контингентин жөнөтүүгө уруксат берди.

Белгилей кетсек, 5-январда казак тарап ЖККУнун катчылыгына уюмдун жоболоруна жана юридикалык милдеттенмелерине ылайык, Казакстан Республикасына тиешелүү аскердик контингенттерди жөнөтүү аркылуу тараптардын жардам көрсөтүүсүн тез арада уюштуруу өтүнүчү менен кайрылган.

Кыргыз Республикасынын Президенти Садыр Жапаров 6-январда Жогорку Кеңештин Төрагасы Талант Мамытовго парламенттин кезексиз жыйынын чакыруу жана Казакстан Республикасына ЖККУнун Жамааттык тынчтык орнотуучу күчтөрүнүн курамына Кыргыз Республикасынын аскер кызматкерлерин жөнөтүү маселесин кароо сунушу менен кайрылган.

Кыргыз Республикасынын Конституциясынын жоболоруна ылайык, Кыргыз Республикасынын Жогорку Кеңеши Казакстан Республикасынын аймагында кырдаалды турукташтыруу жана жөнгө салуу максатында тынчтыкты орнотуу иш-чараларына катышуу үчүн жамааттык күчтөрдүн курамында Кыргыз Республикасынын аскер контингентин жиберүүгө уруксат берди.

Кыргызстандык тынчтык орнотуучулар стратегиялык маанидеги объектилерди коргоону камсыздоого тартылат. Аны менен бирге алар Казакстан Республикасындагы акциялардын катышуучуларына карата эч кандай аракеттерге тартылбайт.

Министрлер Кабинети Казакстандагы абал боюнча бир катар чечимдерди кабыл алды

Бүгүн, 6-январда, Министрлер Кабинетинин Төрагасы Акылбек Жапаров Кыргыз Республикасынын Министрлер Кабинетинин чукул жыйынын өткөрдү.

Жыйындын жүрүшүндө Казакстан Республикасынын жалпы аймагында чыңалуунун күчөшү жана өзгөчө кырдаалдын киргизилишине байланыштуу өлкөдө түзүлгөн учурдагы коомдук-саясий абал талкууланды.

Министрлер Кабинетинин Төрагасы кыргыз-казак чек арасындагы абал жана Кыргызстандын аймагына кылмыштуу элементтердин жана курал-жарактардын кирүү коркунучу ыктымалдыгы боюнча күч ведомстволорунун жетекчилеринин баяндамаларын укту. Ошондой эле финансы-экономикалык блоктун министрликтерине республиканын банк тутумунун үзгүлтүксүз ишин, ошондой эле азык-түлүк, отун коопсуздугун камсыздоо боюнча тийиштүү чараларды кабыл алуусу боюнча тапшырмалар берилди.

Министрлер Кабинетинин Төрагасы Акылбек Жапаров билдиргендей, мамлекет башчынын жана Жаматтык коопсуздук жөнүндө келишим уюму (ЖККУ) Кеңешинин чечимине ылайык, Кыргыз Республикасы Казакстан Республикасынын Президенти Касым-Жомарт Токаевдин кайрылуусуна байланыштуу бир тууган Казакстанга колдон келген колдоо көрсөтүүгө жана ЖККУ алкагындагы өзүнүн союздук милдеттенмелерин тийиштүү деңгээлде аткарууга даяр экендигин тастыктайт.

Министрлер Кабинети тарабынан Президент Садыр Жапаровдун тапшырмасынын алкагында бүгүн түштөн кийин Кыргыз Республикасынын Жогорку Кеңешинин чукул жыйынын өткөрүүнү демилгелөө чечими кабыл алынды.

Жогорку Кеңештин жыйынында баяндамачы катары Кыргыз Республикасынын Министрлер Кабинетинин Төрагасынын орун басары Камчыбек Ташиев дайындалды. Ошондой эле ага Казакстан Республикасындагы окуялардын өнүгүүсүнө реакция кылуу боюнча өкмөттүк штабды ыкчам жетектөө милдети жүктөлдү.

Министрлер Кабинетинин мүчөлөрү ошондой эле башка бир катар маселелерди талкуулап, чечимдерди кабыл алды.

ЖККУ Казакстанга аскерлерин жөнөттү

Жамааттык коопсуздук келишими уюму (ЖККУ) Казакстанга аскерлерин жөнөткөнүн расмий жарыялады. Бул тууралуу уюмдун Жамааттык коопсуздук кеңешинин төрагасы, Армениянын премьер-министри Никол Пашинян билдирди.

6-январь күнү эртең менен ЖККУдан “Интерфакс” орус агенттигине “уюм Казакстанга аскерлерин жөнөткөнүн” билдиришкен.

Орусиянын Мамлекеттик Думасынын КМШ боюнча комитетинин башчысы Леонид Калашников ЖККУнун күчтөрү аскердик инфраструктураны, Байкоңур космодромун жана башка объектилерди коргой турганын айткан.

Буга чейин Казакстандын президенти Касым-Жомарт Токаев Алматыдагы башаламандыктарга байланыштуу ЖККУга жардам сурап кайрылган. Ал Алматыдагы кырдаалды “террордук топтордун иши” деп атаган.

Социалдык түйүн колдонуучулары Токаевдин бул чечимин сындап, чет өлкөлүк аскерлердин кирише каршы пикирлерин жазып жатышат.

ЖККУга Армения, Беларус, Кыргызстан, Казакстан, Орусия жана Тажикстан кирет.

6-январда Алматы шаардык полиция департаменти калаада ондогон киши каза болгонун билдирди. Өлкөдө интернет байланыш жок болгондуктан, акыркы окуялар тууралуу маалымат алуу оор болууда.

5-январь күнү Алматыда башамандык болуп, белгисиз топ акимчиликти жана аэропортту басып алган. Өлкөдө 17:00дөн түнкү 12ге чейин интернет өчүрүлгөн. Шаардагы ондогон дүкөн жана банктар тонолгону кабарланган. Ага чейин Токаев баш калаадан кетпей турганын жана Коопсуздук кеңешин жетектээрин айтып, жалпы өлкө боюнча өзгөчө абал жарыялаган.

Тиллаев: ЕАЭБ мүчөсү Казакстан кыргыз айдоочуларынан ар бир фуранын транзити үчүн 5 миң долларга чейин талап кылып жатышат

Жогорку Кеңештин депутаты Таабалды Тиллаев өкмөттү Казакстан менен чек арадагы өткөрүү бекеттеринде жүк ташуучу унаалардын кезегине байланыштуу маселени чечүүнү тапшырды. Анын айтымында, казак тарап чек арадан өтүү үчүн кыргыз айдоочуларынан акы талап кылууда.

“Казакстан аркылуу транзитке байланыштуу мага жүк ташуучулар кайрылышты. Алар коңшулар ар бир фура үчүн 4-5 миң доллар талап кылып жатканын айтышууда. Мен ЕАЭБ линиясынын алкагында сүйлөшүү өткөрүүнү сурайм. Силер азыр “Дордой”, “Кара-Суу” базарларындагы абалды жакшы билесиңер”, – деди Тиллаев 10-июндагы парламенттин жыйынында.

Май айынын аягында “Ак-Тилек” өткөрмө бекетинде Казакстанга кирүү үчүн 80-90 автоунаа кезекте турган күндөр болгон. Чек ара кызматы мындай узун тыгын экономика жанданып, оор жүк ташыгандар көбөйгөнүнө байланыштуу экенин билдирген.

Казакстан аркылуу жүк ташыган кыргызстандык айдоочулардын чек арадан өтүү маселеси 3-июнда Министрлер кабинетинин төрагасы Улукбек Мариповдун Казакстандын Кыргызстандагы элчиси Рапил Жошыбаев менен жолугушуусунда да талкууланган.

Казакстан аскердик жардам катары Тажикстанга 3 млн. ашык ок-дары берет

Казакстандын Коргоо министрлиги «Кайтарымсыз аскердик-техникалык жардам көрсөтүү тууралуу Казакстан жана Тажикстан өкмөттөрүнүн ортосундагы келишимди ратификациялоо жөнүндөгү» мыйзам долбоорун иштеп чыкты.

Мекеменин басма сөз борборунун маалыматына караганда, долбоорду талкуулоо 17-июнга чейин уланат. Азырынча бул документ боюнча Тажикстандын бийлиги расмий маалымат бере элек.

«Документ быйыл 17-апрелде кол коюлган казак жана тажик өкмөттөрүнүн ортосундагы кайтарымсыз аскердик-техникалык жардам берүү тууралуу келишимди күчүнө киргизүү боюнча мамлекеттин ичиндеги жол-жоболорду ишке ашыруу максатында иштелип чыкты», — деп жазылган Коргоо министрлигинин билдирүүсүндө.

Келишим ратификациялангандан кийин Тажикстанга 5,45 миллиметрлик 3 миллион 240 миң, 23 миллиметрлик 20 миң жана минометтор үчүн 82 миллиметрлик 10 миң даана ок берүү каралган.

Казакстан менен Тажикстандын ортосундагы дипломатиялык мамилелер 1993-жылы 7-январда башталган. Эки өлкө 2015-жылы стратегиялык өнөктөштүк тууралуу келишимге кол коюшкан.

Казакстандын президенти Касым-Жомарт Токаев быйыл 19-20-май күндөрү Тажикстандын башчысы Эмомали Рахмондун чакыруусу менен Душанбеге барган. Сүйлөшүүлөрдүн жүрүшүндө тараптар соода-экономикалык кызматташтыкты бекемдөө, анын ичинде өз ара товар алмашууну көбөйтүү, инвестицияларды тартуу, өнөр-жай кооперацияларын, айыл чарбасын жана транзиттик-транспорттук потенциалды өнүктүрүү маселелерине өзгөчө көңүл бурушкан. Мындан тышкары президенттердин жолугушуусунда суу-энергетикалык, аскердик-техникалык жана маданий-гуманитардык тармактар боюнча өз ара аракеттешүү маселелери талкууланган.

Сүйлөшүүлөрдүн жыйынтыгында өлкө лидерлери эки тараптуу мамилелерди жаңы деңгээлге чыгарууга аракет кылуу тууралуу биргелешкен билдирүү кабыл алышкан. Делегация мүчөлөрү алты документке кол коюшкан. Алардын арасында аскердик-техникалык кызматташтык тууралуу документтер болгон эмес.

Булак: “Борбор Азия жаңылыктар кызматы”

Меню