Коррупция

КР УКМК тарабынан Майлуу-Суу шаардык жылуулук менен жабдуу ишканасынын кызмат адамдарына карата КР Кылмыш-жаза кодексинин 337-беренесинин 2-бөлүгү (Кызматтык абалынан кыянаттык менен пайдалануу) боюнча кылмыштардын бирдиктүү реестрине катталган сотко чейинки өндүрүш иши тергелип жатат.

2018-2020-жылдар аралыгында Майлуу-Суу шаардык жылуулук камсыздоо бөлүмүнүн жооптуу кызматкерлери Т.Т.М., жогоруда аталган ишкананын кээ бир жумушчулары менен алдын ала сүйлөшүп алышып, өзгөчө ири суммадагы мазут жана газды  мыйзамсыз эсептен чыгарып, мамлекеттик бюджетке 56 млн 237 миң 224 сом зыян келтирилгени аныкталган.

Аталган фактылардын негизинде 2022-жылдын 26-февралында Майлуу-Суу шаардык жылуулук менен жабдуу ишканасынын мурдагы директору Т.Т.М. кармалып, Жалал-Абад шаардык ички иштер башкармалыгынын убактылуу кармоочу жайына киргизилди.

Азырыкы учурда КР УКМК тарабынан иштин бардык жагдайларын жана ага тиешеси бар адамдарды аныктоого багытталган тиешелүү ыкчам-тергөө иш-чаралары жүргүзүлүүдө.

УКМК тарабынан укук коргоо органдарындагы коррупциялык көрүнүштөрдү аныктоо, алдын алуу жана бөгөт коюу боюнча жүргүзүлүп жаткан иштердин алкагында, УКМКга кылмыш ишине оң чечим чыгаруу үчүн 6 миң АКШ доллары өлчөмүндө пара талап кылып жаткандыгы боюнча КР ИИМдин (Уюшкан кылмыштуулукка каршы күрөшүү башкы башкармалыгынын) кызматкерлерине карата чара көрүү өтүнүчү менен жаран кайрылган.  

Бул факты боюнча КР УКМКнын Башкы тергөө башкармалыгы тарабынан КР Кылмыш-жаза кодексинин 343-беренесинин 1-бөлүгү (Опузалап пара талап кылуу) боюнча кылмыш иши козголуп, иликтөө иштеринин жүрүшүндө бул факты тастыкталып, 2022-жылдын 22-февралында ИИМдин Уюшкан кылмыштуулукка каршы күрөшүү башкы башкармалыгынын кызматкерлери Ш.У. жана А.У. пара алып жаткан жеринен кармалышты.

Азыркы учурда кармалгандар КР УКМКнын тергөө камак жайынын убактылуу кармоочу жайына киргизилди.

Кыргыз Республикасынын Улуттук коопсуздук мамлекеттик комитети калктын саламаттыгын сактоо тармагында жүргүзүлүп жаткан талдоолордун алкагында, Мамлекеттик санитардык-эпидемиологиялык көзөмөл органдарынын жана саламаттыкты сактоо тармагындагы башка ведомстволордун кызматкерлеринин кызматтык милдеттерин абийирсиз аткаруусун жана коррупциялык көрүнүштөрүн аныктап таап чыкты.

УКМК тарабынан КР Кылмыш-жаза кодексинин 337-беренесинин 2-бөлүгүндө (Кызматтык абалынан кыянаттык менен пайдалануу) каралган кылмыштын негизинде Кылмыштардын жана жоруктардын бирдиктүү реестрине катталган сотко чейинки өндүрүштүн алкагында, Ош шаардык Оорулардын алдын алуу борборунун жана Мамлекеттик санэпидкөзөмөл кызмат адамдары тарабынан жеке ишкерликтин субъекттерине карата пайда көздөө максатында контролдук-көзөмөлдөө иш-милдеттери системалуу түрдө аткарылган эмес.

Ошол эле учурда, 2022-жылдын 9-февралында Кыргыз Республикасынын Жазык-процесстик кодексинин 96-беренесине ылайык кылмышка шектүү катары “О.С.М.” кармалып, Кыргыз Республикасынын  УКМК тергөө камак жайынын убактылуу кармоочу жайына киргизилди. 

Азыркы учурда сотко чейинки өндүрүштүн алкагында бул ишке тиешеси бар адамдарды аныктоо боюнча керектүү тергөө жана ыкчам-издөө иш-чаралар жүргүзүлүүдө.

Улуттук коопсуздук мамлекеттик комитети тарабынан мамлекеттик бийлик органдарындагы коррупциялык көрүнүштөрдү аныктоо, алдын алуу жана бөгөт коюу боюнча жүргүзүлүп жаткан иштердин алкагында, бизнес өкүлдөрүнүн мамлекеттик жана сот органдарынын айрым кызмат адамдары менен кылмыштуу макулдашуусу боюнча фактылар аныкталды.

2010-жылдын май айында «Ысык-Көл-Аврора» санаторийинин аймагында жайгашкан 97 бирдик кымбат баалуу кыймылсыз мүлкү бар 10 гектар жер тилкеси мамлекеттин кирешесине алынган.

Бирок кийинчерээк бул объекттердин ичинен 13 гана батир иш жүзүндө мамлекеттин менчигине өтүп, ал эми калган 56 батир жана 27 коттедж Ысык-Көл районунун жана облусунун, Бишкек шаарынын, Чүй жана Ысык-Көл облустарынын райондор аралык сотторунун, Кыргыз Республикасынын Жогорку сотунун судьяларынын, ошондой эле Президенттин Аппаратынын, Мамлекеттик мүлк фондунун жана Мамлекеттик каттоо кызматынын жооптуу кызматкерлеринин катышуусу менен татаал коррупциялык схемаларды түзүү жолу менен мыйзамсыз түрдө жеке менчик структуралардын менчигине чыгарылып кеткен.

Тергөөнүн жүрүшүндө аталган кыймылсыз мүлктү мамлекеттин карамагынан чыгаруунун уюштуруучусу болуп “А-А ПМК” ЖАКнын мурдагы башкы директору “Ч.В.Ю.”, ошондой эле анын жактоочусу жана ал менен аффилиацияланган башка адамдар экендиги аныкталды.

Бул топ өздөрүнүн кылмыштуу оюн ишке ашыруу үчүн мамлекеттик, укук коргоо жана сот органдарынын жогорку кызматтагы адамдарына акча жана кыймылсыз мүлктөрдү өткөрүп берүү жолу менен колдоо тапканы тууралуу тергөө тиешелүү далилдерди тапты.

Мындан тышкары, 2022-жылдын 5-февралында аталган адамдардын тобуна кыймылсыз мүлк объектилеринин бир бөлүгүн легалдаштырууда жасалма жарандык-укуктук келишимдерди түзүү жолу менен түздөн-түз көмөк көрсөткөн “СКД” ЖЧКсынын жетекчиси – “К.А.В.” кармалып, 2022-жылдын 7-февралында ага карата Бишкек шаарынын Биринчи Май райондук соту тарабынан тергөө учурунда камакка алуу түрүндө чечим кабыл алынды.

Улуттук коопсуздук боюнча мамлекеттик комитет бул коррупциялык схеманы түзүүнүн натыйжасында мамлекеттин кызыкчылыгына өзгөчө ири өлчөмдөгү Ысык-Көл облусунун рекреациялык зонасында жайгашкан кымбат баалуу кыймылсыз мүлктү мамлекеттик менчиктен мыйзамсыз чыгарып алуу түрүндөгү зыян келтирилгенин белгилейт.

Учурда иш боюнча жогорудагы схеманын 4 катышуучусу кылмыш жоопкерчилигине тартылып, анын ичинен 3 адам камакта, тергөө амалдары жүрүп жатат жана жакынкы арада кылмыш иши боюнча башка айыпталуучуларга карата, кимдин аракетинде кылмыштын курамы аныкталса, тиешелүү процессуалдык чечимдер чыгарылат.

КР УКМК тарабынан Кыргыз Республикасынын Кылмыш-жазык кодексинин 343-беренеси (Опузалап пара алуу) боюнча Кылмыштардын бирдиктүү реестрине катталган материалдардын алкагында, 2022-жылдын 19-январында Чүй облусунун Сокулук райондук Социалдык фонд башкармалыгынын жетектөөчү адиси “З.Э.З.” пара алып жаткан жеринен кармалды.

2022-жылдын 17-январында Сокулук районунун тургуну Социалдык фонд башкармалыгынын «З.Э.З.» аттуу кызматкерине акыркы 10 жылда төлөнгөн социалдык чегерүүлөр боюнча көчүрмө алуу боюнча кайрылган. Өз кезегинде “З.Э.З.” буга чейинки социалдык чегерүүлөр боюнча маалымат менен таанышып чыгып, анын айрым бир мыйзам бузуулары бар экенин айтып, буга байланыштуу ал акчалай сыйлык үчүн анын маселесин оң жагына чечип берүүнү сунуштаганы сотко чейинки өндүрүштө аныкталган.

Азыркы учурда кармалган жаран КР УКМК тергөө камак жайынын убактылуу кармоочу жайына киргизилип, ыкчам-тергөө иш-чаралары жүргүзүлүүдө.