Menu

Кыргыз-казак чек арасы

Казакстан кыргыз жарандары үчүн чек араны ачуу маселесин карайт

Министрлер кабинетинин төрагасы Акылбек Жапаров Бишкек шаарында өтүп жаткан «Европа биримдиги жана Борбор Азия» экономикалык форумунун алкагында Казакстандын премьер-министри Аскар Мамин менен жолугушту.

Жолугушуу учурунда коронавирус инфекциясына каршы вакцина алган Кыргызстан жарандары үчүн Казакстандын өткөрүү пункттарын ачуу маселелери талкууланды. Бул тууралуу кыргыз өкмөтүнүн маалымат кызматы кабарлады.

Эки өлкөнүн тармактык министрликтери бул маселени карап чыгат.

Кыргызстан менен Казакстандын чек ара өткөрүү бекеттери 2020-жылдын жазынан бери кырыгызстандыктар үчүн жабык. Кыргыз жарандары коңшу өлкөгө учак менен гана бара алышат. Ошол эле маалда Казакстан жарандары Кыргызстан чек араларынан эркин өтө алышат, алар үчүн чектөө жок.

Эки өлкөнүн өкмөт башчылары соода-экономикалык, агрардык жана энергетикалык тармактарда кызматташуу маселелерин да талкуулашты. Акылбек Жапаров эки өлкө президенттери мамлекеттердин ортосундагы сооданын деңгээлин 1 миллиард АКШ долларына жеткирүү милдетин коюшкандыгын баса белгиледи.

Жолугушуунун алкагында дүң-бөлүштүрүү борборлорун куруу, казакстандык инвестицияларды тартуу менен өнөр жай соода-логистикалык комплексин түзүү боюнча биргелешкен долбоорлорду ишке ашыруу, ошондой эле Ысык-Көлдө казакстандык пансионаттардын иштеши боюнча маселелер каралды.

Чүй дарыясынын жээгин суу жеп, Кыргызстан 800 гектар жеринен ажырады

Бул тууралуу өзгөчө кырдаалдар министри Бообек Ажикеев 22-июнда басма сөз жыйынында билдирди. Министр анда “Чүй дарыясынын жээгин бекемдөө иштери талапка ылайык жүрбөгөндүктөн Кыргызстан 800 гектар жеринен айрылды”, деп айтты.

“Кыргызстан менен Казакстандын чек арасын аныктап турган Чүй дарыясынын жээгинде дамбалардын жоктугунан, дарыянын жээгин суу жеп, анын нугу жыл санап Кыргызстандын аймагына кирип жатат. Бул жаатта иштер активдүү башталды, маселе президент Садыр Жапаровдун жеке көзөмөлүндө”,- деди Ажикеев.

Былтыр март айында Чүйдүн Кемин районунда Чым-Коргон айылынын айрым тургундары Чүй дарыясынын нугу бузулуп, чек ара сызыгы өзгөргөнүн айтып чыгышкан. Маселени мекеме аралык комиссия териштирери айтылган.

Кыргызстандын Мамлекеттик чек ара кызматы Чым-Коргонго жакын Чүй дарыясы аркылуу өткөн кыргыз-казак чек ара сызыгы калыбында турганын билдирип, жергиликтүү калктын “суунун нугу бери бурулуп, жер тилкеси Казакстанга өтүп кетти” деген маалыматын жалганга чыгарган.

Жогорку Кеңеш 2014-жылы Чүй дарыясынын табигый нугун сакташ үчүн суу бойлой кеткен жээктерде кум менен шагыл казуу иштерине тыюу салуу тууралуу өкмөткө сунуш киргизген.

Кыргыз-казак чек арасынын кайсы бир бөлүгү Чүй суусун бойлоп өтөт. Эки тараптын чек ара тилкесинин жалпы узундугу 1257 чакырым. Чек араны демаркациялоо тууралуу келишимге 2017-жылдын 25-декабрында кол коюлган.

Меню