Menu

Көзөмөл-кассалык аппарат (ККМ)

Жарым жылда көзөмөл-кассалык аппараттарды колдонгон компаниялардын кирешеси эки эседен көп өстү

Кыргызстанда акыркы алты айдын ичинде көзөмөл-кассалык аппарат (ККМ) колдонгон компаниялардын кирешеси эки эседен көп өстү. Бул тууралуу Салык кызматы билдирди.

Мекеменин маалыматына караганда, 2022-жылдын биринчи жарым жылдыгында ККМ колдонгон компаниялардын кирешеси 698,1 миллиард сомду түздү. Бул өткөн жылдын алгачкы алты айындагы көрсөткүчкө салыштырмалуу 351,8 миллиард сомго көп.

Салык кызматынан белгилешкендей, 2022-жылдын башынан бери 20 миңден ашык ишкердик субъект ККМ колдоно баштап, алардын жалпы саны 52 миңден ашты.

Жаңы Салык кодексине ылайык, өлкө аймагындагы соода-сатык, жумуш аткаруу, тейлөө субъекттери накталай жана накталай эмес эсептешүүдө милдеттүү түрдө ККМ колдонушу керек. Мындай талап быйыл 1-августтан тартып коюла баштады.

Өкмөттүн соода жайларында ККМ киргизүү аракети ишкерлердин каршылыгын жаратып, жер-жерлерде нааразылык акциялары өткөн. 28-июлда президент Садыр Жапаров чакан жана орто ишкерликти колдоо тууралуу жарлыкка кол коюп, өкмөткө ККМ боюнча айыппул өлчөмүн жана бирдиктүү салык ченин төмөндөтүү чараларын көрүүнү тапшырды.

Кыргызстанда бизнестин айрым түрлөрүн салыктан бошотуу каралууда

Үй-бүлө мүчөлөрү чогуу жүргүзгөн чакан жана орто бизнестин жылдык жүгүртүүсү 8 миллион сомго жетпеген өкүлдөрүн салык төлөөдөн бошотуу каралууда.

Мындай чечим көзөмөл-кассалык аппарат (ККМ) системасын киргизүү маселесин талкуулоо үчүн түзүлгөн жумуш тобунун Министрлер кабинетинин төрагасы Акылбек Жапаров катышкан жыйынында кабыл алынганын өкмөттүн басма сөз кызматы 26-июнда билдирди.

Мекеменин маалыматына караганда, анда ККМ боюнча талап коюу менен катар ишкерлер үчүн эң ийкемдүү шарттар түзүлөрү, алардын арасында маалымдап түшүндүрүү иштерин жүргүзүү керектиги, себеби көпчүлүгү аппараттарды кантип иштетүүнү түшүнбөй жатышканы айтылды.

Акылбек Жапаров алкоголдук ичимдиктерди, курамында алтыны бар продукцияларды, мунай азыктарын сатуу менен алектенген ишкерлер ККМ аппаратын сөзсүз колдонушу жана эсеп-фактура менен иштөөсү керек болорун баса белгиледи.

Өкмөт ККМ системасын милдеттүү түрдө киргизүү аракетин көрүүдө. Бирок буга каршы ишкерлер бир топтон бери түрдүү нааразылык акцияларын өткөрүп келе жатышат. Алардын талаптарын талкуулоо үчүн курамына Экономика жана коммерция министрлигинин, Мамлекеттик салык кызматынын жана ККМди милдеттүү түрдө киргизүүгө каршы чыккан ишкерлердин өкүлдөрү кирген жумуш тобу түзүлгөн. Топтун кезектеги жыйыны бир жумадан кийин өтөрү кабарланды.

Меню