Menu

Рэкет

Ош шаарынын жашоочусунан 20 миӊ АКШ долларын опузалап талап кылган жаран кармалды

Ош шаардык ички иштер башкармалыгынын кылмыш иликтөө бөлүмүнүн уюшкан кылмыштуулукка каршы күрөшүү бөлүмчөсүнүн кызматкерлери тарабынан Ош шаарынын 36 жаштагы жашоочусунан ири суммадагы акчаны опузалап талап кылып жаткан  жаран кармалды.
Кылмышка шектүү Ош шаарынын тургуну 1987-жылы туулган Ш.М. адам өлтүрүү үчүн мурда соттолгондугу аныкталган.
Ош шаардык ички иштер башкармалыгына 2022-жылдын 1-март күнү Ош шаарынын 36 жаштагы тургуну арыз менен кайрылып, аны «М» аттуу жаран өмүрүнө, жакындарына коркунуч келтирип, 20 миӊ АКШ доллар өлчөмүндөгү акча каражатын  бир нече күндөн бери «WhatsApp»  мессенджери  аркылуу опузалап талап кылып жаткандыгын билдирген.  Арыз Ош шаардык ички иштер башкармалыгына катталып, Кыргыз Республикасынын Жазык кодексинин 208-беренесинин (Опузалап талап кылуу) белгилери менен кылмыш иши козголгон.
2-март күнү  саат 17.00 чамасында Ош шаарындагы кафелердин биринде аталган сумманын бир бөлүгүн  алып жаткан учурда Ош ШИИБнын уюшкан кылмыштуулукка каршы күрөшүү бөлүмчөсүнүн жана атайын операциялар отрядынын кызматкерлери тарабынан кармалды.
Шектүү Ош шаардык ички иштер башкармалыгынын убактылуу кармоочу жайына киргизилди. Тиешелүү иликтөө иштери жүрүп жатат.

Түрмөдө жатып алып, ишкерлерди опузалап, "салык" салган уюшкан кылмыштуу топтун мүчөлөрү кармалды

Кыргыз Республикасынын ИИМдин Криминалдык милиция кызматы кылмыштуулук менен күрөшүүгө, мыйзамсыз аракеттерге бөгөт коюуга багытталган ыкчам иш-чаралардын жүрүшүндө уюшкан кылмыштуу топтордун бири опузалап талап кылган фактыны аныкташты.

ИИМдин КМКнын 3-башкармалыгынын маалыматы боюнча ИИМдин ыкчам каттоосунда уюшкан кылмыштуу топтун мүчөсү катары турган жана эркинен ажыратылган жерлерде жазасын өтөп жаткандар узак убакыт боюу ишкерлик чөйрөсүндө алектенгендерден ири суммадагы акча каражатын опузалап талап кылышкан.

2020-жылдын күз айында белгисиз адамдар товарларды ташуу жана жеткирүү менен алектенген ишкерге чалышып, коркутуу жолу менен акча каражатын талап кылышканы аныкталган.

Бир аз убакыт өткөндөн кийин  ишкерге криминалдык чөйрөнүн өкүлү катары өзүн тааныштырган адам келип, акча каражатын жана толук товарын тартып алган. Ишкерге жалпы суммасы 420 миң сомдук материалдык чыгым келтирилген.

Бул факты КЖБРге катталып, Кыргыз Республикасынын Жазык кодексинин 203-беренесинин 2-бөлүмүнүн 2-пункту (Опузалап талап кылуу) менен сотко чейинки өндүрүш жүргүзүлө баштаган.

Жакында ИИМдин КМКнын 3-башкармалыгынын кызматкерлери тарабынан жүргүзүлгөн ыкчам-тергөө иш-чараларынын жүрүшүндө шектүүлөрдүн бири   Ысык-Ата районунда жашаган 1989-жылы туулган С.Б. кармалып, убактылуу кармоочу жайга киргизилген. Ал мурда Кыргыз Республикасынын Кылмыш-жаза кодексинин (эски кодекс) 97-беренесинин негизинде соттолгон жана ИИМдин ыкчам каттоосунда уюшкан кылмыштуу топтун мүчөсү катары турат. Жаран С.Б. Талас облусунан кармалган.

ИИМдин КМКнын 3-башкармалыгынын маалыматы боюнча кылмышкерлер ишкерлерден кирешелеринин бир бөлүгүн дайыма берип турушун талап кылышкан.

Азыркы учурда Чүй облусунун райондук ички иштер бөлүмдөрүнүн биринин тергөө кызматы жүргүзүүдө.

ИИМ: Исфана шаарында ишкерлерди коркутуу менен опузалап акча талап кылган рэкетирлер кармалды

ИИМдин КМКнын Аймактар аралык башкармалыгынын ыкчам кызматкерлерине Исфана шаарынын базарларынын биринде иштеген ишкер кайрылган. Ишкер укук коргоо кызматкерлерине белгисиз адамдар андан “үстүнөн карап тургандыгы” үчүн 500 доллар талап кылышкандыгын айткан. Бул тууралу ИИМдин басма сөз кызматы билдирет.
Аталган факт кылмыштардын жана жоруктардын бирдиктүү реестрине  катталып, ИИМдин Тергөө кызматы (Ош шаары) тарабынан Кыргыз Республикасынын Жазык кодесинин 203 беренеси (Опузалап талап кылуу) негизинде сотко чейинки өндүрүш иштери башталган.
Ыкчам кызматкерлер опузалап талап кылган деп шектелгендердин биринин изине түшкөн. Жакында, ИИМдин КМКнын Аймактар аралык башкармалыгынын кызматкерлери кылмышка шектүү 300 доллар өлчөмүндө акча алып жаткан жеринен кармашкан. Бул Баткен облусунун Исфана шаарынын тургуну М.Ч. болуп чыккан.
Мындан тышкары, көрүлгөн иш-чаралардын натыйжасында, ИИМдин КМКнын Аймактар аралык башкармалыгынын (МРУ) кызматкерлери, ИИМдин КМКнын 3-башкармалыгынын ыкчам кызматкерлери менен биргеликте , ошол эле күнү Бишкек шаарында экинчи шектүүнү кармашкан. Ал Баткен облусунун Лейлек районунун тургуну, 30 жаштагы М.С. болуп, ошол эле күнү ал убактылуу кармоочу жайга киргизилген. Учурда башка шериктерин кармоо чаралары көрүлүп, кылмышкерлердин опузалап талап кылган башка фактыларга катыштыгы текшерилүүдө.
Тергөө иштери уланууда.
Меню