Menu

Чынгыз Жумагулов

Акыйкатчы институту Чыңгыз Жумагуловдун ("Дөө Чыңгыз") №21 тергөө изоляторунда өлтүрүлгөндүгү боюнча ички иликтөөнүн жүрүшүн талап кылды

Кылмыш чөйрөсүндө “Дөө Чыңгыз” деген каймана ат менен таанымал Чыңгыз Жумагулов 30-июлда №21 мекеменин камерасында киши колдуу болуп көз жумганы боюнча маалымат коомчулукка чыгар замат, Акыйкатчы аппараты жаран Чыңгыз Жумагуловдун өлүмүнө алып келген тергөө изоляторундагы окуя тууралу маалымат берүү суроо-талабын жөнөткөн. Алдын-ала маалыматтар боюнча, Жазаларды аткаруу мамлекттик кызматынын №21 мекемесинде Ч. Жумагулов менен бир камерада ар кандай айыптоолор менен ар башка адамдар отурганы, денесиндеги бычактан сайылган жараттан улам каза болгону маалымдалган. Ал эми тыюу салынган буюм (бычак) кантип соттолучунун колунда болуп калганы боюнча тергөө иштери жүрүп жатканы жана камерада соттун өкүмү күчүнө кире элек соттолгондор отурганы айтылган.
Акыйкатчы институту Кыргыз Республикасында бардык адамдар мыйзам алдында бирдей жана эч кандай басмырлоосуз мыйзамдын бирдей корголушуна укуктуу экенин, буга байланыштуу ар кандай түрдөгү дискриминацияга мыйзам тарабынан тыюу салынууга тийиштигин жана мыйзам бардык адамдарга расасы, өңү, жынысы, тили, дини, улуттук же социалдык теги, мүлктүк абалы, саясий же башка көз караштарына карабастан дискриминациядан бирдей жана натыйжалуу коргоону кепилденерин эске алуу менен, аталган окуя боюнча тергөө ишинен сырткары, бул мекемедеги кызмат адамдары өзүнүн милдеттерин так аткарбай шалаакылык кылган жоопкерчиликсиз мамилесине кызматтык баа берүү максатында, мындай окуялар башка кайталанбаш үчүн ички иликтөө милдетүү түрдө жүрүшүн талап кылды.

УКМК: Ишкерлерден системалуу түрдө өзгөчө ири өлчөмдө акча талап кылып жүргөн УКТ мүчөсү Чынгыз Жумагулов - "Дөө Чынгыз" кармалды

Ыкчам-издөө иш-чараларынын жүрүшүндө 2022-жылдын 15-июлунда Бишкек шаарынын аймагында уюшкан кылмыштуу топтун мурда издөөдө жүргөн мүчөсү, криминалдык чөйрөдө “Дөө Чынгыз” деген ат менен белгилүү Дж.Ч.А. кармалды.

Кармоо кылмыштуу топту уюштуруу, ошондой эле жеке ишкердик менен алектенген адамдардан системалуу түрдө өзгөчө ири өлчөмдө акча каражатын талап кылуу фактысы боюнча колдо болгон материалдардын алкагында жүргүзүлдү.

Буга байланыштуу, Дж.Ч.А. мыйзамсыз аракеттеринен жабыркаган жарандар УКМК органдарына 0312640475 ишеним телефону аркылуу кайрылса болот.

УКМК: Кримтөбөл Чынгыз Жумагуловду ("Дөө Чынгыз") кармоо жана анын уюшкан кылмыштуу тобунун мүчөлөрү менен атышуу болгондугу тууралуу маалыматтар чындыкка дал келбейт

УКМК тарабынан козголгон кылмыш ишинин алкагында уюшкан кылмыштуу топтун айрым мүчөлөрүнүн кылмыштуу аракеттерине бөгөт коюу боюнча ыкчам-издөө иш-чаралары жүргүзүлүүдө.

Бул иштин алкагында 2022-жылдын 8-июлунда Чүй облусунун аймагында уюшкан кылмыштуу топтун мүчөлөрүн кармоо боюнча ыкчам-издөө иш-чаралары жүргүзүлдү.

Айрым массалык маалымат каражаттарында жарыяланган Чынгыз Жумагуловду кармоо жана анын уюшкан кылмыштуу тобунун мүчөлөрү менен атышуу болгондугу тууралуу маалыматтар чындыкка дал келбейт.

КР УКМК жалпыга маалымдоо каражаттарынын өкүлдөрүн жалган жана такталбаган маалыматтарды таркатпоого чакырат. Ошол эле учурда социалдык тармактардагы топтордун ээлерин маалыматты дыкат текшерип, коомчулукту адаштырбоого үндөйт.

Меню