Menu

Шавкат Мирзиёев

Рамзан Кадыров Шавкат Мирзиёевге эки жылкы белек кылды

Чеченстандын башчысы Рамзан Кадыров Өзбекстандын президенти Шавкат Мирзиёевди туулган күнү менен куттуктап, ага эки жылкы белек кылды.

“Мен жылкыларды аябай жакшы көрөм, сиз да жакшы көрөрүңүздү билем. Ошондуктан жалпы чечен элинин жана жеке өзүмдүн атыман сизге эки күлүктү белек кылууну чечтим. Сизге чын ден соолук, узак өмүр, ошондой эле Өзбекстан элине тынчтык, туруктуулук жана өсүп-өнүгүү каалайм”, – деди Кадыров Instagram’га чыгарган куттуктоо видеосунда.

Мындан тышкары ал куттуктоосунда Өзбекстандын президентин “жөнөкөй жана меймандос адам, ошол эле маалда акылман жана алысты көрө билген саясатчы” деп мүнөздөдү.

24-июлда Мирзиёевге коңшу өлкөлөрдүн, ошондой эле Азербайжандын, Беларустун, Орусиянын жана Түркиянын президенттери телефон чалып, аны 65 жылдыгы менен куттукташкан.

23-июлда Орусиянын президенти Владимир Путин “Орусия менен Өзбекстандын ортосундагы достукту жана кызматташтыкты чыңдоодогу өзгөчө кызматы үчүн” Шавкат Мирзиёевди Александр Невский ордени менен сыйлоо тууралуу жарлыкка кол койгон.

Шавкат Мирзиёев чек арадагы соода-сатыкты өнүктүрүүнү сунуштады

Өзбекстандын президенти Шавкат Мирзиёев Чолпон-Ата шаарындагы Борбор Азия лидерлеринин саммитинде өз ара кызматташууну мындан ары өнүктүрүүгө байланыштуу сунуштарын берди. Алардын бири катары чек ара аймактарындагы соода-сатыкка көңүл бурду.

“Талдоолор оң жылыштар бар экенин көрсөткөнү менен биздин мамлекеттердин соода-экономикалык алака-катышы дагы деле толук ачылбай турат. Ушундан улам биз өз ара соода-сатыкка түрткү берүүнүн жаңы жол-жобосун, ыкмасын жигердүү киргизүүнү сунуштайбыз. Сөз чек арадагы соода-сатык, товарларды алып өтүүнүн жөнөкөйлөштүрүү жол-жобосу тууралуу болуп жатат”, -деди Мирзиёев.

Ысык-Көл облусунун Чолпон-Ата шаарында Борбор Азия мамлекет башчыларынын төртүнчү кеңешмеси башталды. Ага Кыргызстан, Казакстан, Өзбекстан, Тажикстан жана Түркмөнстандын президенттери Садыр Жапаров, Касым-Жомарт Токаев, Шавкат Мирзиёев, Эмамоли Рахмон жана Сердар Бердымухамедов катышууда.

Казакстандын жана Өзбекстандын лидерлери Кыргызстанга 20-июлда келген. Калган эки президентти Министрлер кабинетинин төрагасы Акылбек Жапаров “Ысык-Көл” эл аралык аэропортунан бүгүн, 21-июлда тосуп алды.

Чолпон-Атада өтчү Борбор Азия лидерлеринин төртүнчү кеңешмесинде чөлкөмдүн беш мамлекети достукту, ынак кошуналыкты жана кызматташтыкты чыңдоо боюнча жаңы өнөктөштүк келишимине кол коюлары айтылып жатат.

Бул аймактагы үч өлкөдө адам өмүрлөрү кыйылган кандуу окуялар, Түркмөнстандагы бийлик транзити жана Орусиянын Украинага кол салуусунан кийинки алгачкы кеңешме.

Иш-чара президент Садыр Жапаров үчүн көп сандагы чет элдик лидерлерди кабыл алган биринчи жолугушуу.

Жыйындын алкагында президент Садыр Жапаров айрым президенттер менен көзмө көз жолугушары да айтылган.

Садыр Жапаров, Касым-Жомарт Токаев жана Шавкат Мирзиёев Ысык-Көлдө "Ак кемеге" түшүп сейилдешти

Бүгүн, 20-июлда Борбордук Азия мамлекет башчыларынын Төртүнчү Консультативдик жолугушуусунун алкагында Кыргызстандын Президенти Садыр Жапаров, Казакстандын Президенти Касым-Жомарт Токаев жана Өзбекстандын Президенти Шавкат Мирзиёевдин Ысык-Көлдүн үстүндө “Ак кемеде” сейилдешти.

 

Чолпон-Атада Борбор Азия мамлекет башчылары Жапаров, Токаев, Рахмон, Бердымухамедов жана Мирзиёевдин Консультативдик жолугушуусу өтөт

20-21-июлда Ысык-Көл облусунун Чолпон-Ата шаарында Борбордук Азия мамлекет башчыларынын Консультативдик жолугушуусу өтөт. Бул туурасында Кыргыз Республикасынын Президентинин Администрациясынын тышкы саясат бөлүмүнүн башчысы Муратбек Азымбакиев билдирди.

Жолгушууга Кыргыз Республикасынын Президенти Садыр Жапаров, Казакстан Республикасынын Президенти Касым-Жомарт Токаев, Тажикстан Республикасынын Президенти Эмомали Рахмон, Түркмөнстандын Президенти Сердар Бердымухамедов, Өзбекстан Республикасынын Президенти Шавкат Мирзиёев катышат.

“Өлкө лидерлери регионалдык коопсуздуктун чакырыктарына жана коркунучтарына биргелешип жооп кайтарууда Борбор Азия мамлекеттеринин өз ара аракеттенүүсүн бекемдөө боюнча пикир алмашат, региондун мамлекеттеринин туруктуу экономикалык өсүшүн камсыз кылуу максатында кызматташтыкты кеңейтүү перспективаларын, ошондой эле Борбордук Азия мамлекеттеринин ортосундагы маданий-гуманитардык өз ара аракеттенүүнү мындан ары чыңдоо маселелерин талкуулашат”,- деди Муратбек Азымбакиев.

Борбордук Азия мамлекеттеринин башчыларынын кезектеги Консультативдик жолугушуусунун алкагында регион өлкөлөрүнүн ортосундагы достукту, ынак коңшулаштыкты жана кызматташтыкты чыңдоого багытталган документтерге кол коюу пландалууда.

Мындан тышкары, Президент Садыр Жапаров айрым өлкөлөрдүн лидерлери менен эки тараптуу жолугушууларды өткөрөт.

Садыр Жапаров менен Шавкат Мирзиёев телефон аркылуу сүйлөшүп, ортодогу чек ара, соода, өнөр жай, транспорт маселелерин талкуулашты

Кечээ, 19-майда Кыргыз Республикасынын Президенти Садыр Жапаров менен Өзбекстан Республикасынын Президенти Шавкат Мирзиеевдун телефондук сүйлөшүүсү болду.

Кыргыз-өзбек эки тараптуу мамилелеринин бардык комплекси талкууланды.

Мамлекет башчылары Кыргызстан менен Өзбекстандын ортосундагы салттуу достук, ынак коңшулаштык жана стратегиялык өнөктөштүктү өнүктүрүү жана тереңдетүү эки өлкөнүн элдеринин түпкү кызыкчылыктарына жооп берерин белгилешти.

Тараптар соода-экономикалык кызматташуунун активдешүүсүн, анын ичинде Кыргызстан менен Өзбекстандын ортосундагы товар жүгүртүүнүн көлөмүнүн жогорулоосун канааттануу менен белгилешти.

Садыр Жапаров менен Шавкат Мирзиёев мамлекеттик чек ара маселелери, сооданы көбөйтүү, өнөр жай кооперациясын тереңдетүү, транспорт жана энергетика тармагындагы биргелешкен инфраструктуралык долбоорлорду илгерилетүү маселелери боюнча жогорку деңгээлдеги макулдашууларды ишке ашырууга өзгөчө көңүл бурушту.

Өзбекстан-Тажикстан чек арадагы кызматташтыкты бекемдейт

Өзбек президенти Шавкат Мирзиеевдин Тажикстанга расмий сапарынын жүрүшүндө биргелешкен 36 документке кол коюлду.

Арасында өнөр жай жана жаңы технологиялар тармагындагы кызматташуу, тажик-өзбек инвестициялык компания түзүү, өзбек аймагы аркылуу транзиттик жүк ташуу тууралуу келишимдер, айыл-чарба тармагындагы кызматташуу тууралуу жол картасы, бир нече меморандум бар.

Мирзиёев Тажикстанга бейшембиде барды. Аны Дүйшөмбү аэропортунда мамлекет башчы Эмомали Рахмон тосуп алды.

Лидерлер эки өлкөнүн стратегиялык өнөктөштүгүн тереңдетүү маселесин талкуулашты.

Рахмон эки өлкөнүн саясий, соода-экономикалык, маданий жана коопсуздук тармактарындагы кызматташтыгынын оң динамикасын белгиледи.

Ал эми өзбек президенти тараптардын алакасы абдан жогорку деңгээлге жеткенине токтолду.

“Тажикстан менен чектешкен бардык район, шаарлардын жетекчилерине чектеш район, шаарлар менен эффективдүү кызматташтыкты орнотуу тапшырмасын бердим. Мындай жол менен президенттер, өкмөттөр, облустар, шаарлар жана райондор ортосундагы кызматташтыкты камсыздай алабыз”.

Мирзиёев кол коюлган документтер 2022-жылы ортодогу соода жүгүртүүнүн көлөмүн 1 миллиард долларга жеткирүүгө жол ачарын кошумчалады.

Эки коңшунун мамилеси Өзбекстандын мурдагы президенти, маркум Ислам Каримовдун тушунда салкындап кеткен. 2016-жылы бийликке Мирзиёев келгенден кийин алака-катыш жакшыра баштады.

Булак: “Борбор Азия жаңылыктар кызматы”

Видео - Блогер Мирзиёевдин жашыруун резиденциясынын жаңы видеосун жарыялады

Өзбекстандык блогер Алексей Гаршин өлкө президенти Шавкат Мирзиёев үчүн курулган Шоввозсой эс алуу жайынын жаңы видеосун интернетке жарыялады.

Тасмадан тоолуу аймактагы президенттин резиденциясын, аны курчаган бак-дарактарды жана суу сактагычты көрүүгө болот. Мындан тышкары анда тик учактар конуучу аянтчалар жана эки чоң имарат бар экени айтылат.

Буга чейин коомчулукка белгисиз бул жайдын сүрөттөрү менен видеолору чыга элек болчу.

Быйыл февралда “Озодлик” радиосу Мирзиёев үчүн курулган хансарай жөнүндө журналисттик иликтөө жарыялаган. Анда Ташкенттен 100 чакырым алыс Угам-Чаткал улуттук паркынын аймагында жайгашкан ажайып жердеги ак сарай тууралуу маалымат берилген.

Кийинчерээк Мирзиёев Шоввозсой эс алуу жайы боюнча комментарий берип, эс алуу жайы мамлекеттин карамагында экенин билдирген.

Булак: “Борбор Азия жаңылыктар кызматы”

Шавкат Мирзиёев ушул жумада Тажикстанга барат

Өзбекстандын президенти Шавкат Мирзиёев 10-11-июнь күндөрү расмий сапары менен Тажикстанга барат.

Бул тууралуу өзбек мамлекет башчысынын басма сөз катчысы Шерзод Асадов дүйшөмбү күнү брифинг маалында билдирди.

Анын айтымында, сапардын алгачкы күнү сүйлөшүүлөрдүн негизги бөлүгү өтүп, эртеси президенттин Хожент шаарындагы бир катар иш-чараларга катышуусу пландалган.

Булак: “Борбор Азия жаңылыктар кызматы”

Меню