Menu

Электр тармагы

Кыргызстан быйыл Казакстан менен Түркмөнстандан 2 млрд кВт/саат электр энергиясын импорттойт

2022-жылдын жылытуу мезгилинде Кыргызстандын электр энергиясын керектөөсү 15,9 млрд кВт/саатты түзсө, 2023-жылы бул көрсөткүч 16,6 млрд кВт/саатка жетип, ортодогу тартыштык 1,9 млрд кВт/саат болушу мүмкүн.

Бул тууралуу Министрлер кабинетинин төрага орун басары Бакыт Төрөбаев “Биринчи радионун” эфиринде билдирди.

“Бул тартыштыкты кыскартуу максатында Казакстан менен Түркмөнстандан 2 миллиард кВт/саат электр энергиясын импорттоо боюнча келишимдер түзүлдү”, – деди Төрөбаев.

Бирок ал аталган өлкөлөрдөн электр энергиясын импорттоо башталган-башталбаганын тактап айткан жок.

Төрөбаевдин айтымында, бүгүнкү күнгө карата Токтогул суу сактагычындагы суунун көлөмү 10,6 миллиард куб метрди түзүүдө. Бул былтыркы жылдын ушул мезгилиндеги көрсөткүчкө салыштырмалуу 818 миллион куб метрге көп. Ошол эле маалда суук аба ырайына байланыштуу өлкөдө электр энергиясын пайдалануунун рекорддук көрсөткүчү байкалууда. Мындан улам Токтогул суу сактагычындагы суунун сарпталышы да көп болууда.

Сууктун түшүүсү менен Кыргызстандын түрдүү аймактарында электр энергиясын берүүдө мүчүлүштүктөр болуп, жарык өчүлүрүп жатканы тууралуу билдирүүлөр келүүдө. “Улуттук электр түйүндөр” ишканасы өлкөдө маал-маалы менен өчүрүүлөр болбогонун, бирок электр түйүндөр менен жабдууларга күч келгендиктен, жарык берүү үзгүлтүккө учурап жатканын билдирген.

Кыргызстан Түркмөнстан менен Казакстандан электр жарыгын сатып алууда

Министрлер кабинетинин төрагасынын орун басары Бакыт Төрөбаев Жогорку Кеңештин 19-октябрдагы жыйынында Кыргызстан 2022-жылы 16,2 млрд. кВт/саат электр энергиясын керектей турганын билдирди.

Анын айтымында, өлкө ГЭСтерден 11 млрд. 500 млн. кВт/саат электр энергиясы, Бишкек Жылуулук электр борборунан (ЖЭБ) 2 млрд. электр жарыгы өндүрүлөт. Калган 3 млрд. кВт/саат электр энергиясы чет жактан импорттолот.

“9 айдын ичинде 9,3 млрд. кВт/саат электр энергиясы өндүрүлдү. Бул 1,4 млрд. кВт/саат электр энергиясына аз. Анткени сууну үнөмдөп атабыз. Импорт боюнча: Түркмөнстандан электр жарыгын алуу боюнча келишим түзүлгөн. Азыр 1 млрд. 800 млн. кВт/саат электр энергиясын алдык. Казакстандан да электр жарыгын алуу боюнча контракт түзүлгөн. Бул өлкөдөн 241 млн. кВт/саат электр энергиясын алдык. Мындан тышкары 2023-жылдын биринчи кварталында 600 млн. кВт/саат электр энергиясын алуу боюнча сүйлөшүү бар”.

Бакыт Төрөбаев энергетика тармагындагы оңдоо иштеринин 95% бүткөнүн, 1-ноябрга чейин толук бүткөрүлөрүн билдирди. Ал мындан тышкары Кыргызстанда күз-кыш мезгилине карата 2 млн. 994 миң тонна көмүр керектелерин билдирди. Анын ичинен 1 млн. 237 миң тонна көмүр калк үчүн, бюджеттик мекемелерге 257 тонна, Бишкек ЖЭБине 1 млн. 500 миң тонна көмүр керек. ЖЭБде 253 миң тонна гана көмүр бар.

Кыргызстан кышында коңшу өлкөлөрдөн 2,7 млрд кВт/саат электр энергиясын импорттоону пландоодо

Кыргызстан быйыл кышында 2,7 миллиард кВт/саат электр энергиясын импорттоону пландап жатат. Бул тууралуу 27-июлда энергетика министри Доскул Бекмурзаев билдирди.

Анын айтымында, бүгүнкү күнгө карата Токтогул суу сактагычында 12 миллиард 802 куб метр суу топтолду.

“Күз-кыш мезгилине карата 13,5 миллиард куб метр суу топтойбуз деп ойлойм – бул өтө пессимисттик божомол. Импорттоло турган 2,7 милллиард кВт/саат электр энергиясын эске алып эсептесек кыштан чыгабыз. Жабдуулардын эскиргенине байланыштуу авариялык учурлар катталышы мүмкүн, бирок маал-маалы менен өчүрүү болбойт”, – деди министр.

Кыргызстан жылына 15 миллиард кВт/саатка жакын электр энергиясын керектейт. Бул көрсөткүч ар жыл сайын 4-5% көбөйүп турат. Токтогул суу сактагычындагы сууну үнөмдөө үчүн өлкө бийлиги 2021-жылы алмашуу жолу менен 2 миллиард киловатт-саат электр энергиясын импорттогон.

Макулдашууга ылайык, 2021-жылдын март айынан ноябрына чейин Казакстан Кыргызстанга 900 млн кВт/саат, Өзбекстан 2021-жылдын мартынан 2022-жылдын апрелине чейин 750 миллион кВт/саат электр энергиясын бериши керек болчу. Кыргызстан жалпысынан коңшуларынан 1 миллиард 650 млн кВт/саат электр кубатын алууну макулдашып, аны 2023-жылга чейин жайкысын кайтарып берүү милдеттенмесин алган.

Мындан тышкары Кыргызстан Өзбекстан аркылуу Түркмөнстандан да электр энергиясын импорттогон. Жалпысынан бул өлкөдөн август айынан декабрга чейин 501 кВт/саат сатып алуу пландалган.

Меню