Menu

Эмдөө

Президент Садыр Жапаров коронавирус инфекциясына каршы эмдөөдөн өттү

Кыргыз Республикасынын Президенти Садыр Жапаров бүгүн, 23-июлда, уулу менен коронавирус инфекциясына каршы эмдөөдөн өттү.

Мамлекет башчысы менен анын уулу коронавирус инфекциясына каршы вакцинанын биринчи дозасын борбордогу мобилдүү эмдөө пункттарынын биринде алышты.

Садыр Жапаровго эмдөөдөн өткөндүгү тууралуу паспорт берилди.

Президент кыргызстандыктарга кайрылып, вакцина алуу чечими ар бир адамдын жеке иши экенин, эч ким эч кимди иммунизацияга мажбурлабастыгын айтты.

Анын айтымында, акыркы убактарда коомчулукта ар кандай чындыкка дал келбеген маалыматтар, анын ичинде коңшу өлкөлөр Кыргызстанга бекер вакцина берип, өлкө калкынын 70% ын эмдөөдөн өткөрүүнү талап кылып жатат деген туура эмес маалыматтар тарап жатат.

Садыр Жапаров Кыргызстан бюджеттик каражаттын эсебинен Кытайдын Синофарм (Sinopharm) вакцинасынан 1,1 миллион доза сатып алгандыгына көңүл бурду. Буга чейин Кытай бийлиги жалпысынан аталган вакцинанын 300 миң дозасын Кыргызстанга кайтарымсыз берген, бул үчүн кыргыз тарап аларга ыраазычылыгын билдирет. Мындан тышкары, Россия Федерациясынан 120 миң доза вакцина сатылып алынган, ал эми 10 миң доза вакцина кайтарымсыз негизде берилген. Бул үчүн дагы кыргыз тарап ыраазычылыгын билдирет.

Мамлекет башчысы жакын арада Синофарм вакцинасынан 1 млн 250 миң доза кошумча партия сатылып алынарын баса белгиледи.

Буга байланыштуу ал кыргызстандыктарга кайрылып, эл арасында тарап жаткан ушак-айыңдар менен жалган маалыматтарга ишенбөөгө үндөдү.

Президент Садыр Жапаров жарандарды жакындарынын жана жалпы коомдун саламаттыгын коргоо үчүн эмдөөдөн өтүүгө дагы бир жолу чакырды.

Президент элди вакцина алууга чакырды

Президент Садыр Жапаров 20-июлда кыргызстандыктарды Курман айт майрамы менен куттуктады.

Өлкө башчы Кыргызстанда ушуну менен экинчи жолу коронавируска байланыштуу Курман айт майрамы чектөөлөр менен өтүп жатканын белгилеп, жарандарды өздөрүнүн жана айланасындагы адамдардын саламаттыгын коргоо үчүн эмдөөдөн өтүүгө, ден соолукту бекемдөөгө чакырды.

“Курман айт күнү мусулмандар таң эртеден тазаланып, жүздөрүн кыбылага буруп, айт намазын окушат, аруу дуба-тилектерин айтышат. Жаратканга жакындоо максатында курмандык чалышып, жакындарына, кошуна-колоңдоруна жана муктаждарга таратышат. Ушул себептен Курман айт аруулуктун жана кайрымдуулуктун майрамы болуп саналат”, – деп айтылат куттуктоодо.

Дүйнө мусулмандары 20-июлда Ислам дининдеги чоң майрамдардын бири – Курман айтты белгилешти.

Коронавирус пандемиясынан улам эки жылдан бери Сауд Арабия падышалыгы өзүнүн жарандарына гана ажылык амалдарын аткарууга уруксат берген.

Кыргызстанда айт намазы борбордук аянттарда эмес, мечиттерде гана окулду. Жарандардын кол алышып, кучакташып көрүшүүсүнө тыюу салынды. Ар бир адам дааратты үйүнөн алып, өзүнүн жайнамазын көтөрө келиши керектиги эскертилген.

Дүйнө калкынын 1,7 миллиардын мусулмандар түзөт.

Кыргызстанда Курман айт майрамына байланыштуу 20-июль – дем алыш деп жарыяланган.

Булак: “Борбор Азия жаңылыктар кызматы”

БИМ: Билим берүү жана илим министри Болот Купешов кызматкерлери менен чоогу коронавируска каршы эмдөө алышты

Бүгүн, 13-июлда Кыргыз Республикасынын Билим берүү жана илим министрлигинин кызматкерлери коронавируска каршы вакцина алууну улантып жатышат. Бүгүн министрликке Бишкек шаарынын №1 поликлиникасынын мобилдик тобу келди. Министрликтин жетекчилиги биринчилерден болуп «Синофарм» вакцинасын алды. Бул тууралу БИМдин  басма сөз кызматы билдирет.

Бүгүнкү күнгө карата министрликтин борбордук аппаратынын, ошондой эле ведомство алдындагы уюмдардын кызматкерлеринин жарымынан көбү коронавируска каршы эмделишти.

ИИМ: Министр Улан Ниязбеков жана анын орун басарлары коронавирус илдетине каршы эмдөөдөн өтүштү

Бүгүнкү күнү өлкөнүн бардык аймагында жарандар COVID-19 каршы эмдөөдөн өтүшүүдө.  Ички иштер министрлигинин башчысы Улан Ниязбеков орун басарлары Нурбек Абдиев, Октябрь Урмамбетов жана  Эркебек Аширходжаев менен бирге коронавирус илдетине каршы вакцина  алышты. Бул тууралу ИИМдин басма сөз кызматы билдирет.

Ал эми, министрдин биринчи орун басары Сүйүнбек Өмүрзаков эмгек өргүүсүндө болгондуктан, ал кызматка келгенден кийин коронавируска каршы эмдөөдөн өтөт. Андан сырткары, ички иштер органдарынын жалпы өздүк курамына вакцинаны алуусу үчүн бардык шарттар түзүлгөн.

Өлкөдө коронавируска каршы эмдөө үчүн 847 пункт ачылды

Министрлер кабинетинин төрагасынын орун басары Жылдыз Бакашова өлкөдө калкты жапырт эмдөө башталганын жарыялады.

Коронавируска каршы эмдөө үчүн 847 пункт ачылды. Алардын 599у медициналык мекемелерде, 100ү мектеп, окуу жайлардын имараттарында, 12си чоң соода борборлорунда, 30у базарларда жана 12 мобилдик бригада иштейт.

“11-июлдан баштап вируска каршы массалык эмдөө башталды жана биринчи кезекте, 1 миллион 312 450 адамды түзгөн, тобокел топтор эмделет. Алар медициналык, социалдык жана укук коргоо органдарынын кызматкерлери, 60 жаштан жогорку жана өнөкөт оорулары бар адамдар, калктын социалдык жактан аярлуу катмары”, – деп билдирди Бакашова.

Вакцина акысыз, 18 жаштан улуу бардык жарандар ала алышат.

Эмдөөнү ырааттуу уюштуруу үчүн Кызыл чырым жана Кызыл жарым ай эл аралык уюмдары 900 ыктыярчыны даярдады. Алар өлкө боюнча убактылуу эмдөө пункттарына барган адамдарды каттоо жана башка иштерге жардам бермекчи.

11-июль күнү Кыргызстанга Кытайдан бир миллион 250 миң доза Sinopharm вакцинасы келди. Анын 150 миң дозасы гуманитардык жардам катары бекер берилип, калган вакцинаны бийлик бюджеттен бөлүнгөн акчага сатып алды.

29-мартта башталган коронавируска каршы эмдөө өнөктүгүнө өлкө боюнча 130 миңге чукул адам катышты.

Түркмөнстанда жарандар коронавируска каршы эмдөөдөн өтүүгө милдеттендирилди

Түркмөн бийлиги 18 жаштан жогорку курактагы жарандарды милдеттүү түрдө коронавируска каршы эмдөөдөн өткөрөт. Мындай чечим тууралуу өлкөнүн мамлекеттик маалымат каражаттары 7-июлда кабарлашты.

Бирок ал билдирүүлөрдө жарандарга кайсы вакцина сайылары так айтылган эмес.

Түркмөн бийлиги өлкөдө коронавирусту жугузуп алгандар бар экенин пандемия башталгандан бери четке кагып келет. Расмий түрдө бул өлкөдө бир да адам COVID-19га чалдыккан эмес. Ошентсе да Түркмөнстанда санитардык эрежелер күчөтүлгөн. “Эркин Европа”  радиосунун түркмөн кызматы өлкөдө вирус кенен жайылганын билдирип, ооруканалар толуп калган учурлар бар экенин кабарлап келет.

Июнь айынын соңунда түркмөн президенти Гурбангулы Бердымухамеов Кытайдын “Синофарм” вакцинасынын жарым миллион дозасын сатып алуу боюнча жарлык чыгарган.

Январь айында Түркмөнстан орусиялык “Спутник V” жана “ЭпиВакКорона” вакциналарын каттоодон өткөргөн. Бирок Орусиянын өзүндө вакцина жетишсиз болгондуктан, Түркмөнстанга саналуу сандагы гана вакцина жөнөтүлгөн.

Буга чейин Тажикстандын бийлиги да 18 жаштан жогорку курактагы жарандарын коронавируска каршы эмдөөдөн өтүүгө милдеттендирген.

Булак: “Борбор Азия жаңылыктар кызматы”

Меню