Menu

Өзбекстан

Өзбекстандын бийлиги кышкысын калкка былтыркыдан көбүрөөк электр энергиясын берүүнү убадалады

Өзбекстанда быйылкы күз-кыш мезгилинде керектөөчүлөргө 34 миллиард 918 миллион киловатт-саат электр энергиясы берилет. Бул өткөн жылдын ушул мезгилине салыштырмалуу 2 миллиард 540 миллион киловатт-саатка көп.

Өлкөнүн Энергетика министрлигинин маалыматына караганда, электр энергиясынын 10 миллиард 938 миллион киловатт-сааты калкка, калганы экономиканын тармактарына берилет.

10-октябрда вице-премьер жана энергетика министри Журабек Мирзамахмудовдун катышуусунда өткөн жыйында быйылкы күз-кыш мезгилинде керектөөчүлөргө 30,6 миллиард куб метр жаратылыш газы берилери айтылган. Анын 10,4 миллиард куб метрин калк, калганын экономиканын тармактары пайдаланат.

Мындан тышкары жыйындын жүрүшүндө 15-сентябрдан тарта калкка 144 миң тонна көмүр берилгени, жыл соңуна чейин дагы 882 миң тонна даярдалышы керектиги айтылган.

Өзбекстанда жыл сайын күз-кыш мезгилинде электр жарыгын жана жаратылыш газын берүү үзгүлтүккө учурап, буга байланыштуу нааразычылык акциялар өтүп турат.

Өзбекстандын Башкы прокуратурасы: Россиянын куралдуу күчтөрүнө кошулуп, Украинага каршы согушкандар 10 жылга чейин соттолот

Орусияда жарым-жартылай аскердик мобилизация башталгандан кийин Өзбекстандын Башкы прокуратурасы өзбек мигранттарына чет өлкөлүк армиянын катарында согушка катышуу үчүн 10 жылга чейин эркинен ажыратуу жазасы бар экенин эскертти.

Мекеменин билдирүүсүндө Өзбекстандын Кылмыш кодексинин 154-беренесинин биринчи бөлүмүндө согуштук аракеттерге катышуу үчүн жалдангандарга беш жылдан 10 жылга чейин эркинен ажыратуу жазасы каралганы белгиленген.

Аталган беренеде башка мамлекеттердин армиясында, коопсуздук кызматтарында, полициясында, аскердик юстициясында же башка органдарында кызмат өтөгөн Өзбекстандын жараны 300 базалык эсептик көрсөткүч өлчөмүндө айып пул төлөп же үч жыл коомдук жумуштарды аткарууга милдеттендириле турганы жазылган. Эгер жаран аталган чет өлкөлүк түзүмдөргө жалданма болсо беш жылга чейин эркинен ажыратылат.

“Мындан улам чет өлкөлөрдө жашаган өзбек жарандарын куралдуу күчтөрдүн катарына кошулбоого, аскердик аракеттерге катышпоого чакырабыз. Мындай аракеттер үчүн кылмыш жоопкерчилиги каралган”, – деп жазылган Башкы прокуратуранын билдирүүсүндө.

21-сентябрь күнү эртең менен Орусиянын президенти Владимир Путин өлкөдө жарым-жартылай мобилизация жарыяланганын билдирген. Путиндин артынан эле мамлекеттик медиаларга маек курган Орусиянын коргоо министри Сергей Шойгу мобилизациянын алкагында 300 миңдей адам аскерге тартыларын айтты. Министр армияга негизинен запастагылар жана аскердик кызматтан өткөндөр чакырыларын, алар кошумча даярдыктан өткөрүлөрүн кошумчалады.

20-сентябрда Мамлекеттик дума өлкөнүн Кылмыш-жаза кодексин “мобилизация”, “аскердик абал”, “аскердик мезгил” деген түшүнүктөр менен толуктап, дезертирлердин жазасын катуулата турган, өз ыктыяры менен туткунга түшкөндөргө, талап-тоноочулукка баргандарга жана коргонуу тармагындагы мамлекеттик буйрукту аткаруудан баш тарткандарга жаза мөөнөттөрүн аныктаган. Анда бул мобилизацияга даярдык катары сыпатталган.

Орусия Украинага кол салгандан бери көптөгөн аскердик эксперттер Владимир Путин армиянын алдына койгон максаттарга кошумча мобилизациясыз жетүү мүмкүн эмес экенин айтып келишкен. Кремль буга чейин бир нече жолу жалпы мобилизация жарыяланбай турганын билдирген.

Өзбекстан 8 жылда уран казууну эки эсе көбөйтүүнү пландоодо

Өзбекстан 2030-жылга карата жылына 7100 тонна уран өндүрүүнү пландап жатат.

Ушул тапта Өзбекстан жылына 3,5 миң тонна уран казып алууда.

Уран казууну көбөйтүү үчүн наркы 460 миллион долларлык 20 инвестициялык долбоорду ишке ашыруу чечими кабыл алынды.

Дүйнөлүк өзөктүк ассоциациянын (WNA) маалыматына караганда, Өзбекстан уран казуу боюнча дүйнөдө бешинчи орунда турат.

Өзбекстандын өзүндө уран кайра иштетилбейт, толугу менен экспорттолот. Өзбекстанда урандын 132 тонна запасы бар, бул дүйнөлүк камдыктын 2% түзөт. Урандын запасы боюнча Өзбекстан 11-орунда турат.

Уран казуу боюнча 2021-жылы Казакстан биринчи, Австралия экинчи, Намибия үчүнчү, Канада төртүнчү орунду алган.

Өзбекстанда чет өлкөдөгү замандаштарды колдоо үчүн "Ватандошлар" фонду түзүлдү

Өзбекстан президенти Шавкат Мирзиёев 11-августта “Ватандошлар” коомдук фондун түзүү тууралуу жарлыкка кол койду.

Расмий маалыматка караганда, кордун максаты – “чет өлкөдө турган мекендештерди тарыхый мекенинин айланасында бириктирүү, алардын жүрөгүндө өлкөгө болгон сыймык сезимди бекемдөө, улуттук өзгөчөлүктү сактоо, замандаштарды жана алар түзгөн коомдук бирикмелерди колдоо”.

Фонддун негизги иш багыттары аныкталган: коомдук кор чет өлкөдө жашаган замандаштар жана алар түзгөн бирикмелер менен өнөктөштүктө иш алып барат; алардын укуктары менен эркиндиктерин коргоого көмөктөшөт; чет өлкөдө оор жагдайда калган жарандарга материалдык жана социалдык колдоо көрсөтөт; өзбек тилин, маданиятын жана салт-санаасын өнүктүрүүгө багытталган иштерди колдойт; чет өлкөлөрдө өзбек улуттук борборлорун түзүүгө көмөктөшөт.

Фондду түзүүгө өкмөттүн резервдик корунан 5 млрд сум (470 миң доллар) бөлүндү.

Маалыматка караганда, фонд 100дөн ашык өлкөдө жашаган 10 миллиондой өзбекстандыкка жана алар түзгөн 170тен ашуун маданий борборлорго көмөк көрсөтөт.

Өзбекстан Баткендин Самаркандек айылына жаңы мектеп салып берет

Өзбекстан Баткен облусунун Самаркандек айылындагы жатак мектептин ордуна жаңы мектеп салып берет. Бул тууралуу Баткен облустук администрациясы кабарлады.

Маалыматка караганда, өкмөттүн облустагы ыйгарым укуктуу өкүлү Абдикарим Алимбаев, Баткен районунун акими Учкунбек Жоробаев Өзбекстандын Фергана облусунун башчысы Хайрулло Базаров баштаган делегация менен жолугушкан.

Жетекчилер эки тараптуу алаканы арттырууну макулдашкан.

Жолугушуу учурунда Өзбекстандын Фергана облусунун жетекчилери 70 жылдык тарыхы бар, эскилиги жетип турган гимназиянын имаратын заманбап мектеп катары салып берүүнү убадалаган.

23-апрелде Кыргызстан, Өзбекстан жана Тажикстандын чектеш облустарынын башчылары Ферганада жолугушуп, үч мамлекеттин ишкерлеринин бизнес-форуму өткөн.

Ага Кыргызстандан Баткен облусунун мурдагы башчысы Өмүрбек Суваналиев, Тажикстандын Согд облусунун аткаруу бийлигинин төрагасы Ражобий Ахмодзода, Өзбекстандын Фергана дубанынын губернатору Хайрулло Бозоров баштаган делегация катышкан.

Сүйлөшүүлөрдө экономикалык кызматташтык талкууланганы айтылган.

Меню