Menu

Өзбекстан-Ооганстан

Ташкентте Борбордук жана Түштүк Азия аймактарынын өз ара байланышына арналган эл аралык конференция өтөт

Ташкентте 15-16-июль күндөрү “Борбордук жана Түштүк Азия: аймактык өз ара байланыш. Чакырыктар жана мүмкүнчүлүктөр” деп аталган эл аралык конференция өтөт. Бул тууралуу Өзбекстан президентинин басма сөз кызматы кабарлады.

Маалыматка караганда, конференция Өзбекстандын мамлекет башчысы Шавкат Мирзиёевдин демилгеси менен уюштурулууда. Анын негизги максаты — Борбордук жана Түштүк Азия өлкөлөрүнүн ортосундагы тарыхый достук байланыштарды, ишенимдүү жана ынак коңшулук мамилелерди бекемдөө.

Иш-чарага Өзбекстан менен Ооганстандын президенттери, Пакистандын премьер-министри, Борбордук жана Түштүк Азия өлкөлөрүнүн тышкы иштер министрлери, жогорку кызматтагы өкүлдөрү, алдыңкы эл аралык жана аймактык уюмдардын, дүйнөлүк каржы институттары менен компаниялардын, изилдөөчү жана аналитикалык борборлордун өкүлдөрү катышат деп күтүлүүдө.

Алар аймактык байланыштарды мындан ары өнүктүрүүнүн алкагында соода-экономикалык, транспорттук-коммуникациялык жана маданий-гуманитардык кызматташтыкты өнүктүрүүгө багытталган демилгелерди ишке ашыруу мүмкүнчүлүктөрүн талкуулашат.

Булак: “Борбор Азия жаңылыктар кызматы”

Өзбекстандын чек арасынан мыйзамсыз өткөн дагы 47 ооган жараны мекенине кайтарылды

27-июнда Ооганстандын 44 кишиден турган чек ара жана элдик кошуун аскери Өзбекстандын Шортепа уездинде мамлекеттик чек араны бузуп кирген.

Андан бир күн мурун, 26-июнда ушул эле аймак аркылуу коңшу өлкөнүн күч түзүмдөрүнүн үч өкүлү өткөнү белгилүү болгон.

Бардык жарандар Ооганстанга кайтарылды. Өзбекстан ТИМи бул сыяктуу өлкө аймагына мыйзамсыз өтүү аракеттерине катуу бөгөт коюла турганын эскертти.

Өзбек дипломаттары Ооганстандагы кырдаалдын курчушуна тынчсызданып, жаатташкан тараптарды күч колдонуудан оолак болууга чакырды.

23-июнда да 53 ооган чек ара кызматкери жана жергиликтүү кошуундун аскерлери курал-жарактары менен Өзбекстандын аймагындагы Шортепа уездине киришкени кабарланган. Тиешелүү тергөө процедуралары көрүлгөндөн кийин алар мекенине кайтарылган.

Булак: “Борбор Азия жаңылыктар кызматы”

Меню