Menu

АКШ элчилиги

АКШ элчилиги адаттагыдай эле кыргыз элин Эгемендик күнү менен кыргыз тилинде куттуктады, а Россия элчилигичи?

Бүгүн, 31-августта АКШ элчилиги кыргыз элин Кыргыз Республикасынын Эгемендик күнү менен адаттагыдай эле кыргыз тилинде куттуктады.

“Достор, АКШ элчилигинин атынан сиздерди Кыргыз Республикасынын Эгемендүүлүк күнү менен куттуктайбыз! Бул өзгөчө күндүн урматына биз English Access студенттери менен Улуттук тарыхый музейге бардык. Биз турдан ырахат алып, Кыргыз Республикасын эгемендүүлүккө алып келген эр жүрөк инсандар жөнүндө билдик. Кыргыз Республикасы мындан ары да өсүп-өнүгө берсин!” деп айтылат куттуктоодо.

Ошол эле учурда орус өнөктөштөрүбүз (Орус элчилиги) кыргыз элин бир да жолу кыргыз тилинде куттуктап койбойт. Бул өнөктөштөрдүн тилине болгон кандай мамиле?

АКШ элчилиги декабрь айында катардагы визалык кызматтарды көрсөтүүнү кайрадан улантат

6-ноябрь, 2021-жыл – Бишкек – АКШ Элчилигинин Консулдук бөлүмү 2021-жылдын 1-декабрынан баштап визалардын бардык түрүнө байланыштуу визалык интервьюларга кезекке турууну ачат. Виза алууга кайрылгандардын жана кызматкерлердин ден соолугун жана коопсуздугун камсыз кылуу үчүн, кабыл алууну чектөө, социалдык аралыкты бекем сактоо жана беткап тагынуу протоколдору элчиликке келген бардык коноктор үчүн күчүндө болот.

«Кыргыз Республикасы менен Америка Кошмо Штаттарынын ортосундагы мамилелердин өзөгүн биздин элдердин ортосундагы байланыштар түзөт. Туризм жана бизнес үчүн, анын ичинде катардагы виза кызматтарын сунуштай алганыбызга абдан кубанычтабыз. Бул кызматтардын кайра жанданышы биздин жакын достугубуздун өөрчүшүн колдоого жардам берет жана биз декабрда өнөктөштүктүн 30 жылдыгын белгилей турган ыңгайлуу учурга туура келет», – деп белгиледи АКШнын Кыргыз Республикасындагы Элчилигинин Убактылуу ишенимдүү өкүлү Соната Коултер.

Визага кызыккан талапкерлер биздин веб-баракчадагы арыз талаптарын жана башка маалыматты карап чыгып, интервьюга бул жерден кезекке турса болот. Көңүл буруңуздар, дүйшөмбү күнү, 8-ноябрдан тарта АКШга кирүү үчүн саякатка коюлган талаптар өзгөрөт. Чет элдик саякатчылардан FDA тарабынан тастыкталган же уруксат берилген вакцина, же Дүйнөлүк Саламаттыкты сактоо Уюмунун өзгөчө кырдаалдарда колдонуу тизмесине киргизген вакцина менен COVIDге каршы эмдөөнүн далилин көрсөтүү талап кылынат. Учурдагы талаптар боюнча акыркы маалыматты CDCнин COVID-19 веб-сайтынан тапса болот.

АКШ элчилиги 2020-жылдын март айында Мамлекеттик департаменттин COVID-19 башталгандагы көрсөтмөлөрүнөн улам катардагы визалык интервьюларды токтоткон. Мамлекеттик департаменттин учурдагы көрсөтмөлөрү АКШ элчилигине COVID-19га каршы катуу коопсуздук чараларын сактоо менен визалык интервьюларды улантууга мүмкүндүк берет.

АКШ элчилиги жана жергиликтүү өнөктөштөр 11-кылымдагы Бурана мунарасын сактоо жана коргоо боюнча долбоордун башын ачууда

Бүгүн, 24-сентябрь АКШнын Кыргыз Республикасындагы элчилиги, тарыхый Бурана мунарасын консервациялоо боюнча долбоордун ачылыш аземин өткөрдү, ага Кыргыз Республикасынын Мамлекеттик катчысы Чолпонбек Абыкеев, Коосуздук кеңешинин катчысы Марат Иманкулов, Маданият, маалымат жана туризм министрлигинин, жергиликтүү бийлик органдарынын жана Бурана мунарасынын музей-комплексинин жетекчилери катышты.  “Кыргызстандагы 11-кылымдагы Бурана мунарасын антропогендик жана сейсмикалык коркунучтардан коргоо” долбоорунда АКШ элчилеринин маданий баалуулуктарды сактоо фондунан (AFCP) 200,000 доллардан ашуун көлөмдөгү каржылоо каралган.

АКШнын Кыргызстандагы элчилигинин убактылуу ишенимдүү өкүлү Соната Коултер иш-чарада сүйлөгөн сөзүндө кыргыз маданиятына болгон урмат-сыйды баса белгилеп: “Улуу Бурана мунарасы миң жыл бою кылым карытып турду жана биз ал дагы миң бекем турат деп үмүттөнөбүз. Бүгүн биз кыргыздын улуттук байлыгын сактоону колдоо үчүн Кыргыз-АКШ өнөктөштүгүн өнөктөштүк белгилеп жатабыз,” — деди. Иш-чара жергиликтүү демөөрчүлөрдүн, анын ичинде Шоро компаниясынын колдоосу менен өттү.

Директор Чолпон Турдалиева жетектеген Музейдик Демилгелер Коомдук Биримдиги Борбору бул долбоорду Кыргызстандын Маданият министрлиги, Эл аралык эстелик фондунун америкалык эксперттери жана Борбордук Азиядан келген жергиликтүү эксперттер менен биргеликте ишке ашырат. Адистер Бурана мунарасынын бузулган чатырын суу өткөрбөгөн материал менен калыбына келтирип, антисейсмикалык техниканын жардамы менен дубалдарын жер титирөөдөн коргойт. Долбоор ошондой эле Маданият министрлигинин жана Бурана мунарасынын музей-комплексинин кызматкерлери, кураторлор жана реставраторлор үчүн семинарларды жана мастер-класстарды камтыйт. Санарип медиа кампаниясы Бурана мунарасынын маданий эстелик катары маанисин жайылтып, көбүрөөк конокторду тартуу үчүн маалымат жайылтууну жогорулатат.

АКШнын Мамлекеттик департаменти 2001-жылы адамзаттын жалпы маданий мурасын белгилөө үчүн AFCPни түзгөн. AFCP аркылуу АКШнын Мамлекеттик департаменти жыл сайын дүйнө жүзү боюнча уникалдуу маданий мурастарды коргогон долбоорлорду каржылайт. AFCP каржылаган Кыргыз Республикасындагы буга чейинки долбоорлорго Өзгөн күмбөздөрүн сактоо, Кыргыз мамлекеттик тарых музейиндеги уникалдуу алтын коллекциясын калыбына келтирүү жана Жалал-Абад облусундагы 11-кылымдагы Шах-Фазил күмбөзүн сактоо кирет. Бурана мунарасын калыбына келтирүү гранты менен АКШ өкмөтү AFCP аркылуу Кыргыз Республикасындагы маданий жайларды сактоого 500,000 доллардан ашуун салым кошуп келет.

USAID жана "Ак-Жалга" Ысык-Көл облусунда сүт өндүрүшүн кеңейтүү жана жумуш орундарын түзүү максатында кызматташууда

Кыргыз Республикасы, Ысык-Көл облусу, Жети-Өгүз району – АКШнын Эл аралык өнүктүрүү боюнча агенттиги (USAID) жана жеке ишкер Жузумалиева Кулийпа Ысык-Көл облусунун Кызыл-Суу айылындагы сүттү кайра иштетүүчү “Ак-Жалга” ишканасын кеңейтүү үчүн өнөктөштүк түзүштү. Натыйжада, дагы 400 жергиликтүү фермерлер сүт тапшырууга мүмкүнчүлүк алып, жергиликтүүлөр үчүн 50 жаңы жумуш орундарын түзүшлүшү күтүлүүдө. Бул тууралу АКШнын Кыргызстандагы элчилигинин басма сөз кызматы билдирет.

USAIDдин “Конкуренттүү ишкана” долбоорунун колдоосу менен “Ак-Жалга” компаниясы өндүрүш процессин өркүндөтүп, өнүмдөрдүн ар түрдүүлүгүн кеңейте алды. Ал эритилген сырды өндүрүүгө жана упаковка үчүн жаңы жабдууларды алды. Жузумалиева Кулийпа өндүрүмдөрдүн эл аралык стандарттарга шайкеш келишин камсыз кылуу үчүн кошумча жабдууларга жана жаңы лабораторияга инвестиция кылды.

“Биз өз ишибизде тамак-аш азыктарынын коопсуздугуна жана клиенттер үчүн жогорку сапаттагы продукция чыгарууга өзгөчө көңүл бурабыз. Ал үчүн биз өндүрүш процессин тынымсыз өркүндөтүп, заманбап жабдууларды колдонууга аракет кылабыз” – дейт бизнес-айым Жузумалиева Кулийпа.

1994-жылы негизделген “Ак-Жалга” компаниясы Ысык-Көл облусундагы эң ири сүт иштетүүчү ишканалардын бири. Ал суткасына 100 тонна сүттү кайра иштете алат, бирок азырынча завод суткасына 50 тоннага жакын сүттү кайра иштетип жатат. Өндүрүмүнүн 70 пайызга чейин бөлүгү кошуна өлкөлөргө экспорттолот. Азыр жергиликтүү суроо-талап көбөйгөндүктөн, “Ак-Жалга” өз күчүн ири соода түйүндөрү менен иштөөгө да өзгөчө көңүл бөлүп жатат.

“Биз Кыргыз Республикасынын экономикалык өнүгүүсүнүн локомотиви болгон Жузумалиева Кулийпа сыяктуу ишкерлерди сыймыктануу менен колдойбуз. Айыл чарба өндүрүүчүлөрүнө өзгөчө көңүл буруу керек, анткени алар өлкөнүн азык-түлүк коопсуздугун камсыз кылууга да жардам бериште”, – дейт USAIDдин Кыргыз Республикасындагы өкүлчүлүгүнүн директорунун милдетин аткаруучу Кит Симмонс. “USAID өнөктөш ишканаларга грант түрүндө гана колдоо көрсөтөт, башкача айтканда, бул жардам акысыз берилет”.

Бүгүнкү күндө “Ак-Жалга” компаниясында 126 адам эмгектенет; 7 миң чакан фермалардан жана үй чарбаларынан сүт чогултулат. USAIDдин колдоосу менен өндүрүштү көбөйткөн “Ак-Жалга” кошумча 50 адамды ишке алып, дагы 400 жергиликтүү дыйкан үй-бүлөлөрдөн сүт чогултууну көздөп турат.

USAIDдин “Конкуренттүү ишкана” долбоору – бул бюджети 23 миллион АКШ долларын түзгөн беш жылдык демилге. Долбоор айыл чарба, тигүү, маалыматтык технологиялар, билим берүү, тамак-аш өнөр жайы жаатындагы чакан жана орто ишканаларга колдоо көрсөтүп, алардын өндүрүшүн жана сатуусун кеңейтүүгө жана Кыргызстанда жумуш орундарын түзүүгө көмөктөшөт. Долбоордун алкагында азыркы күнгө чейин өлкө боюнча 90 ишканага колдоо көрсөтүлүп жатат.

Меню