Menu

Жо Байден

Сентябрда Нью-Йоркто АКШ менен Борбор Азия лидерлеринин саммити өтөт

АКШ президенти Жо Байден Борбор Азия мамлекеттеринин башчыларынын катышуусунда саммит өткөрүүнү пландоодо.

18-августта Forbes АКШ президенти Жо Байдендин Өзбекстандын президенти Шавкат Мирзиёевге жолдогон катынын текстин жарыялады.

АКШ президенти Жо Байден өз катында Өзбекстандын президенти Шавкат Мирзиёвди сентябрдын аягында Нью-Йоркто БУУнун Башкы ассамблеясынын сессиясынын ачылышы учурунда өтө турган “Борбор Азия-АКШ” (С5+1) форматындагы биринчи саммитке чакырган.

Gazeta.uz басылмасынын Өзбекстан өкмөтүндөгү өз булагы мындай саммит чындап эле пландалып жатканын жана ал АКШнын демилгеси экенин ырастады.

Жо Байдендин катында АКШ менен Борбор Азия өлкөлөрүнүн президенттеринин жолугушуусу 19 же 20-сентябрга белгиленгени айтылат.

“Мен БУУнун Башкы Ассамблеясынын сессиясын чыдамсыздык менен күтүп жатам. Анда биз элибиздин жашоосундагы эң маанилүү маселелер боюнча прогресске жетишебиз. 19-20-сентябрдагы “C5+1” форматындагы расмий жолугушууда сиз мага жана биздин кесиптештерибизге кошулуп, коопсуздук, экономика жана экология чөйрөсүндөгү жалпы максаттарга жетүү үчүн биргелешип иштөөнү кантип уланта аларыбызды талкуулайбыз деп үмүттөнөм”, – деп жазган Жо Байден.

АКШ Украинага заманбап абадан коргонуу каражаттарын берет

Вашингтон Киевге заманбап абадан коргонуу каражаттарын берет. Бул тууралуу АКШнын президенти Жо Байден украин президенти Владимир Зеленский менен сүйлөшкөндө билдиргенин Ак үй кабарлады.

Байден Орусиянын дүйшөмбү күнү украин шаарларына жасаган ракеталык соккуларын айыптап, Киевге өзүн-өзү коргоо үчүн зарыл болгон каражаттарды берүүнү улантууну убадалады. Мындан тышкары АКШ президенти Украинанын аймагындагы аракеттери үчүн Орусияны жоопкерчиликке тартууга өнөктөштөрү менен бирге аракеттерди көрүп жатканын кошумчалады.

Зеленский Байден менен сүйлөшүүсүн жемиштүү деп атап, негизги тема Украинага абадан коргонуу каражаттарын жеткирүү болгонун ырастады. “Азыр бул биздин коргонуу тармагындагы кызматташтыгыбыздын негизги приоритети болуп эсептелет”, – деп жазды Зеленский Телеграм-каналына.

Орусия Украинага кол салгандан бери АКШ Киевге коопсуздук жаатында жалпысынан 17 миллиард долларлык жардам берип, Москвага каршы көптөгөн санкцияларды киргизди.

G7 өлкөлөрү өнүгүп келе жаткан мамлекеттерге 1 млрд. доза вакцина бөлүп беришет

Жекшемби күнү Улуу Британияда аяктаган «Чоң жетинин» (G7) саммитинде көтөрүлгөн негизги темалардын бири коронавируска каршы күрөшүү болду.

Уюмга мүчө өлкөлөрдүн лидерлери өнүгүп келе жаткан мамлекеттерди кеминде 1 миллиард доза вакцина менен камсыз кылууну убадалашты. Алардын жарымын АКШ, дагы 100 миллионун Улуу Британия бере турганы айтылды.

Мындан тышкары лидерлер өнүгүп келе жаткан өлкөлөрдөгү инфраструктуралык объектилердин курулушуна колдоо көрсөтүү боюнча макулдашты. Бул демилгени АКШ Кытайдын ушундай эле программасына атаандаш катары сунуштаган. Бээжин буга жооп кылып, «аз өлкөлөрдүн тобу глобалдык чечимдерди таңуулабашы керектигин» билдирди.

АКШнын президенти Жо Байдендин «Чоң жетиге» мүчө өлкөлөрдүн лидерлери, анын ичинде Германиянын канцлери Ангела Меркель менен жекеме-жеке сүйлөшүүсүндө Орусия тараптан келип жаткан коркунучтарга каршы туруу жана Москва менен кызматташуунун жолдорун издөө темасы жөнүндө да сөз болду.

Кошмо Штаттардын президенти Европага сапарынын алкагында 15-июнда Брюсселге барып, НАТО менен ЕБдин саммиттерине катышат. 16-июнда Байден Женева шаарында Орусиянын президенти Владимир Путин менен жолугат.

Булак: “Борбор Азия жаңылыктар кызматы”

Меню