Кокон педагогикалык институтунун кыздар жатаканасына жашыруун камера орноткон үч кызматкер менен проректор Ойбек Бозоров кызматтан алынды. Бул тууралуу Өзбекстандын билим берүү министрлиги билдирди.
Маалыматта проректор менен иштен алынган кызматкерлер жашыруун камера орнотууга түздөн-түз катышып, кызмат абалынан кыянат пайдаланганы айтылат.
“Министрлик адамдардын жеке өмүрүнө кийлигишкен мындай аракеттерди кескин айыптайт. Бул аракет кыздардын ар-намысына шек келтирүү катары бааланат. Адамдын жеке жашоосунун жана эркиндигинин кол тийбестигин бузууга эч кимдин укугу жок”, – деп айтылат билдирүүдө.
Өзбекстандын билим берүү министрлиги камерага түшүп калган кыздар кандайдыр бир кысымга кабылбастан окууларын улантарын белгиледи.
Мурдараак жатакананын бөлмөсүнөн жашыруун камера таап алган кыздар ички иштер органдарына кайрылган. Бул үчүн кыздарды окуу жайдын жетекчилиги тилдегени айтылган.
Укук коргоо органдары окуяны иликтөөнү улантууда.