Menu

Кумтөр

"Кумтөр Голд Компани": 2022-жылы "Кумтөр Голд Компани" тарабынан 15 900 кг алтын өндүрүлгөн эмес, 17 305 кг алтын өндүрүлгөн

Каржы министрлигинин өкүлү айткан маалыматта бир катар так эместиктер бар Кыргыз Республикасынын Жогорку Кеңешинин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитетинин отурумунда Финансы министрлигинин мамлекеттик кирешелерди болжолдоо башкармалыгынын жетекчиси Алмазбек Кочкоров “Кумтөр Голд Компани”  жабык акционердик коомунун ишмердүүлүгү боюнча бир катар так эмес маалыматтарды берди.  

“Кумтөр Голд Компани” жабык акционердик коому 2022-жылдын жыйынтыгы боюнча ишинин жыйынтыктары тууралуу билдирет.  

Алсак, 2022-жылы “Кумтөр Голд Компани” тарабынан 15 900 кг алтын өндүрүлгөн эмес, 17 305 кг алтын өндүрүлгөн.  

2022-жылдын жыйынтыгы боюнча ишкана 986,5 млн АКШ доллары  өлчөмүндө киреше алган, ишкананын отчеттук мезгилдеги таза кирешеси  371,7 млн АКШ долларына жеткен, парламенттин отурумунда  билдирилгендей 385 млн АКШ долларына эмес. Өткөн жылы ишкананын  өлкөнүн бюджетине салыктар, Кыргыз Республикасынын Социалдык 

фондуна которуулар жана 2009-жылдагы кайра каралган инвестициялык  макулдашууда каралган башка милдеттүү төлөмдөр 387,7 млн АКШ долларын (32,2 млрд сом) эмес, 385 млн АКШ долларын түзгөн.  

Муну эске алуу менен, “Кумтөр Голд Компани” жабык акционердик коомунун ишинин жыйынтыктары жөнүндө бардык маалыматтар эркин  жана жеткиликтүү ишкананын расмий сайтында төмөнкү домендик дарек боюнча жайгаштырылган: www.kumtor.kg / “отчеттор” бөлүмү.

Кумтөр алтын казуучулары эми Тоголок алтын кенин өздөштүрүүнү башташты

Үстүбүздөгү жылдын 1-сентябрында тоо-кен геологдору, инженерлер, жол куруучулар жана экологдордон турган «Кумтөрдүн» адистери Ысык-Көл облусунун Жети-Өгүз районунда жайгашкан Тоголок кенине барып келишти. 

Компаниянын вице-президенти Кубанычбек Турудукожоев, Кумтөр кен жайынын директору Кубанычбек Молдобеков башында турган адистер Тоголок алтын кенине жана Жангарт аянтына барып, 1982-жылы жабылган жантайма кен жолунун (штольня) жана Тоголокко барчу жол инфраструктурасынын абалын иликтеп, аймакка топографиялык изилдөө жүргүзүштү.  

 Бул маалыматтардын баары жакынкы келечекте – жол салууда жана кеңейтүүдө, жаңы көпүрөлөрдү курууда керектелет. Жол инфраструктурасы даяр болгон соң, кийинки жылдан баштап Тоголок кенин өздөштүрүү, Жангарт аянтына геологиялык чалгындоо жүргүзүү сыяктуу негизги иштер башталмакчы. 

Тоголок кенине жетүү абдан татаал. Кенге сапар алган Кумтөрдүн адистери көздөгөн жерге 37 чакырым жетпей, Үч-Кошкон кыштагына түнөп алып, жолун улашкан. Себеби, андан ары жолдун эң таатал бөлүгү башталат. Бир канча ашууларды ашып, ак кар, көк муздуу кырлардан, кооптуу жарлардан, эңкейиштерден, шар аккан суулар менен жайык кечүүлөрдөн өтүп, анан Тоголок кенине жетүүгө болот. Баарынан да, аба-ырайы саат сайын өзгөрүп турган, деңиз деңгээлинен 4 миң метр бийиктикте бир канча саат жөө басуу оңойго турган жок. 

Бирок бул тоскоолдуктардан өткөн экспедиция өз максатына жетти. Пландалган баардык жумуштар жасалган соң, адистер эки күндүк, 400 чакырымдык катаал жолду басып өтүү менен Кумтөр кен жайына кайтып келишти.

Финансы министрлиги Тенгиз Бөлтүрүктүн 100 миң доллар айлыгына байланыштуу түшүндүрмө берди

Финансы министрлиги “Улуу көчмөндөр мурасы” улуттук холдингинин президенти Тенгиз Бөлтүрүктүн айлык акысына байланыштуу маалыматка түшүндүрмө берди.

Буга чейин Kaktus.media басылмасы Тенгиз Бөлтүрүк “Кумтөр Голд Компани” ишканасынын мурдагы тышкы башкаруучусу катары “Улуу көчмөндөр мурасы” улуттук холдингинен айына 45 миң доллар айлык алып турганын жазган. Мындан сырткары “Кумтөрдөгү” айлыгы 55 миң доллар экени, жалпысынан айына 100 миң доллар алып турганы жазылган. Аталган басылма бул тууралуу өз булактарына таянып жазган.

Финансы министрлиги мамлекет башчынын 2021-жылдын 29-январындагы “Тоо-кен казып алуу тармагын реформалоо маселелери жөнүндө” жарлыгы жана Министрлер кабинетинин бул реформаларды ишке ашыруу максатында ушул эле жылдын 10-декабрындагы токтому менен “Улуу көчмөндөрдүн мурасы” улуттук холдинги түзүлүп, Тенгиз Бөлтүрүк Аяпберген уулу анын президенти болуп дайындалганын, анын уставдык капиталын түзүү үчүн республикалык бюджеттен 3 400,0 млн сом бөлүнгөнүн кабарлады.
“Ушул күнгө чейин Тенгиз Бөлтүрүккө республикалык бюджеттен жана “Улуу көчмөндөр мурасынын” бюджетинен айлык акы берилген жок. Ар бир чыгашалар бухгалтердик отчёттор менен тастыкталган. Учурда Министрлер кабинетинин токтомуна ылайык “Улуу көчмөндөрдүн мурасы” улуттук холдинг компаниясын жоюу иштери жүрүп жатат. Финансы министрлиги каржы маселелеринде ачык-айкындуулук жана жоопкерчилик принциптерин карманып келет.”, – деп жазылган министрлик тараткан маалыматта.
Kaktus.media басылмасынын жазганына караганда, Эсеп палатасы текшерүү жүргүзүп, 2021-жылдын август айында Тенгиз Бөлтүрүккө “Кумтөр голд копанияден” айлык акысынын өлчөмүн 40 миң долларга чейин өзгөрткөнү, ошол эле учурда анын эмгек акысын жогорулатуу чечимине эч кандай далилдүү документтери жок экенин аныктаган. 2021-жылдын май айынан 2022-жылдын февраль айына чейин Бөлтүрүктүн сый акысынын жалпы суммасы 473,2 миң долларды түзгөн. 2021-жылдын 21-декабрында Бөлтүрүк өзүнө 55 миң доллар өлчөмүндө сый акы белгилеген.
Өлкөнүн Эсеп палатасы “Кумтөр Голд Компанини” Бөлтүрүк жетектеп турган убакыт боюнча жүз барактан турган отчётун жарыялаган. Анда кызматкерлердин эс алуусунан баштап кайрымдуулукка чейин коротулган эсепсиз миллиондор, жетекчилердин сый акысы камтылган ишкананын каржылык ишмердиги ийне-жибине чейин эсептеп жазылган.
Аудиторлор 2022-жылдын май айларында Бөлтүрүк төрт баласынын жана жубайынын Канадага авиабилетин төлөп бергенин жазышкан. Ага 1 миллион 45 миң сом короп, бул боюнча отчёт берилген эмес.
Эң чоң чыгымдардын бири “Кумтөр Голд Компани” жаңы кеңсеге көчкөндө алынган эмерекке кеткен. Кеңсе эмерегин сатып алып, ташып келүү жана орнотуу үчүн дээрлик 180 миллион сом коротулган.
Башкы прокуратура 2022-жылы 13-сентябрда “Кумтөрдөгү” коррупцияга байланыштуу Тенгиз Бөлтүрүктү, “Кумтөрдүн” ошол кездеги жабдуу боюнча адиси Айша-Гүл Фронтбек кызы Жаналиеваны, каржы башкармалыгынын директору Рыспек Токтогуловду кармаган. Ишкананын мурдагы аткаруучу директору Канат Курмановго издөө жарыяланып, быйыл 14-январда “Манас” эл аралык аэропортунан кармалып, Бишкектеги №1 тергөө абагына (СИЗО-1) камалган.
Башкы прокуратура үй камагына чыккан “Кумтөр Голд Компани” ишканасынын мурдагы тышкы башкаруучусу Тенгиз Бөлтүрүк мамлекетке келтирилген зыянды төлөп бергенин билдирген. Бөлтүрүк прокуратуранын өтүнүчү менен 30-апрелде үй камагына чыгарылганын Октябрь райондук соту билдирген.

Сот коррупцияга айыпталган экс-министр Динара Кутманованын абактагы мөөнөтүн узартты

Мурдагы жаратылыш ресурстары, экология жана техникалык көзөмөл министри Динара Кутманованын абактагы мөөнөтү 9-октябрга чейин узартылды. Анын бөгөт чарасы 7-августта Бишкектин Биринчи май райондук сотунда каралды.

Атайын кызмат 25-июлда Динара Кутманова министрликтеги бир катар коррупциялык фактыларда “башкы уюштуруучу жана шыктандыруучу болгону аныкталып” кармалганын кабарлаган. Ал кармалгандан кийин бөгөт чарасы Биринчи май райондук сотунда каралып, 8-августка чейин камакка алуу чечими чыккан.

УКМКнын маалыматы боюнча, Динара Кутманова министр болуп турганда мамлекеттин акчасын мыйзамсыз чыгарып кетүү боюнча кеңири коррупциялык схема уюштурган. Экс-министр мыйзамсыз коррупциялык иштерге кол алдындагы кызматкерлерди эле эмес, өзүнүн жакындарын, уулун, сиңдисин, үй кызматкерин, уулунун досун жана башкаларды тартуу менен жаратылышты жана экологияны коргоо тармагы үчүн жасалма долбоорлорду каржылоого арыз берүүнү уюштурган деп айыпталууда.

Үч жыл ичинде министрликке болжол менен 969 миллион 568 миң сом бөлүнгөнү, анын 180 миллиону бул министрликтеги муктаждыктар үчүн мамлекеттик сатып алууларга жумшалганы айтылды. Ал эми жаратылышты коргоо жана сактоо боюнча 110 долбоордун алкагында жеке жана юридикалык жактарга 789 миллион 568 миң сом берилген.

УКМКнын ырасташынча, жалпысынан бул кылмыш ишинин алкагында тогуз адамга айып тагылган. Алардын ичинен Кутманованын уулуна эл аралык издөө жарыяланып, Түркияда кармалган соң депортациялоо чаралары көрүлүүдө.

20-июлда өкмөттүн жыйынында УКМКнын төрагасы Камчыбек Ташиев Динара Кутманованы Кумтөрдүн акчасына байланыштуу айыптаган. Мындан көп өтпөй атайын кызмат Жаратылышты өнүктүрүү фондунун кызмат адамдары коррупцияга аралашкан фактылар иликтенип жатканын билдирген.

Динара Кутманова буга чейин айтылган дооматтардын баарын четке каккан.

Ал министр болуп 2021-жылы 13-октябрда дайындалган. Ага чейин 2020-жылы ноябрдан баштап Курчап турган чөйрөнү коргоо жана токой чарбасы мамлекеттик агенттигинин директору болуп турган. Кийин бул мекеме жоюлуп, министрлик болуп түзүлгөн.

"Кумтөр" киреше азайганы тууралуу маалыматты четке какты

“Кумтөр” ишканасы кирешеси азайганы тууралуу маалыматтарды четке какты. Компания тараткан билдирүүдө соңку жарым жылда пайда менен чыкканы жазылган.

“Акыркы убакыттарда айрым Жалпыга маалымдоо каражаттары Кумтөр кени тууралуу туура эмес, чындыкка дал келбеген, такталбаган, бир тараптуу маалыматтарды маал-маалы менен таратып жатат. Алар “Кумтөр” ишканасы “2023-жылы мамлекетке пайда алып келбей, тескерисинче артка кетти” дешүүдө. “Кумтөр Голд Компани” бир да кадам артка кеткен жок деп ишенимдүү жана жоопкерчиликтүү түрдө айта алат. Быйыл алты айда 101,2 миллион доллар таза кирише таап, бир жылдын ичинде үлүштүк кирешесинин көлөмүн (дивиденд) 140 миллион долларга жеткирди. “Кумтөрдүн” 28 жылдык тарыхында мамлекет болгону 100 миллион доллардай гана дивиденд алган”,-деп жазылган маалыматта.

Өткөн айда ишкананын башчысы Алмаз Барктабасов жарым жылда баасы 341 миллион доллардан ашкан 5,5 тоннага жакын алтын өндүрүлгөнүн билдирген. Буга чейин быйыл компанияга 14 тонна алтын чыгаруу планы коюлганы айтылган.

Экономика жана коммерция министрлиги быйылкы жарым жылдыкта Кумтөр кенинде негизги металлдарды өндүрүүнүн көлөмү кыскарганын, кендин курамында алтындын көлөмү азыраак чыгып жатканын билдирген.

Кыргыз өкмөтү Кумтөр кенине тышкы башкаруу киргизген 2021-жылы 14,6 тонна алтын алынган. Мунун 4-5 тоннасын кенге ага чейин ээлик кылган канадалык “Центерра Голд” компаниясы чыгарып кетсе, 10 тоннасы Кыргызстандын өзүндө калган. Кыргыз бийлиги мындан 323 миллион доллар киреше тапканын маалымдаган. Натыйжада мамлекетке 13,6 миллиард сом салык төгүлгөн.

2022-жылы 17,3 тонна алтын өндүрүлүп, план 200 килограммга ашыкча аткарылган. Компания мындан 986,5 миллион доллар киреше тапкан. Натыйжада ишкана мамлекетке 32,1 млрд. сом салык жана милдеттүү төлөмдөрдү төккөн.

Динара Кутманова 9-августка чейин камакка алынды

Мурдагы жаратылыш ресурстары, экология жана техникалык көзөмөл министри Динара Кутманова 9-августка чейин Улуттук коопсуздук боюнча мамлекеттик комитеттин (УКМК) тергөө абагына камакка алынды.

Мындай чечимди 24-июлда Бишкектин Биринчи май райондук соту чыгарганын аталган соттун басма сөз кызматы билдирди.

Атайын кызмат 25-июлда Динара Кутманова министрликтеги бир катар коррупциялык фактыларда “башкы уюштуруучу жана шыктандыруучу болгону аныкталып” кармалганын кабарлаган.

Мекеменин маалыматы боюнча, Кутманова министр болуп турганда мамлекеттин акчасын мыйзамсыз чыгарып кетүү боюнча кеңири коррупциялык схема уюштурган. Экс-министр мыйзамсыз коррупциялык иштерге кол алдындагы кызматкерлерди эле эмес, өзүнүн жакындарын, уулун, сиңдисин, үй кызматкерин, уулунун досун жана башкаларды тартуу менен жаратылышты жана экологияны коргоо тармагы үчүн жасалма долбоорлорду каржылоого арыз берүүнү уюштурган деп айыпталууда.

Үч жыл ичинде министрликке болжол менен 969 миллион 568 миң сом бөлүнгөнү, анын 180 миллиону бул министрликтеги муктаждыктар үчүн мамлекеттик сатып алууларга жумшалганы айтылды. Ал эми жаратылышты коргоо жана сактоо боюнча 110 долбоордун алкагында жеке жана юридикалык жактарга 789 миллион 568 миң сом берилген.

УКМКнын ырасташынча, жалпысынан бул кылмыш ишинин алкагында тогуз адамга айып тагылган, алардын ичинен Кутманованын уулуна эл аралык издөө жарыяланган жана ал Түркияда кармалып, депортациялоо чаралары көрүлүүдө.

20-июлда өкмөттүн жыйынында УКМКнын төрагасы Камчыбек Ташиев Динара Кутманованы Кумтөрдүн акчасына байланыштуу айыптаган. Мындан көп өтпөй атайын кызмат Жаратылышты өнүктүрүү фондунун кызмат адамдары коррупцияга аралашкан фактылар иликтенип жатканын билдирген.

Динара Кутманова буга чейин айтылган дооматтардын баарын четке каккан.

Ал министр болуп 2021-жылы 13-октябрда дайындалган. Ага чейин 2020-жылы ноябрдан баштап Курчап турган чөйрөнү коргоо жана токой чарбасы мамлекеттик агенттиктин директору болуп турган. Кийин бул мекеме жоюлуп, министрлик болуп түзүлгөн.

Генпрокуратура: Тенгиз Бөлтүрүктүн тобу "Кумтөрдөн" уурдалган 1 млрд сомдун 845 млн сомун казынага төлөп беришип, үй камагына чыгарылды

“Кумтөр Голд Компани” ишканасынын мурдагы тышкы башкаруучусу Тенгиз Бөлтүрүккө коррупция беренеси менен иш козголуп, тергөөнүн жүрүшү менен мамлекетке  1 млрд. 146 млн. 449 мин 161 сом зыян келтирилгендиги аныкталган.

Учурда келтирилген зыяндын 80% жакыны, тактап айтканда 844 млн. 512 мин 858 сому Т.Бөлтүрүк жана аны менен бирге кармалган айыпкерлерден өндүрүлүп, мамлекеттин казынасына кайтарылды.
Башкы прокуратуранын Тергөө башкармалыгына  Т.Бөлтүрүктүн жактоочулары тарабынан айыпкерди абактан үй камагына бошотуу тууралуу өтүнүч келип түшкөн.
Жогорудагыларды эске алуу менен Бишкек шаарынын Октябрь райондук соту тарабынан Т.Бөлтүрүктүн бөгөт коюу чарасы үй-камагына өзгөртүлдү.
Азыркы учурда кылмыш иши боюнча тергөө аракеттери жана келтирилген зыяндын калган суммасын өндүрүүгө багытталган тийиштүү иш-чаралары жүргүзүлүүдө.

Улуттук банкта 46,7 тонна алтын сакталып турат

Улуттук банктын карамагында 46,7 тонна алтын бар. Бул тууралуу 28-февралдагы маалымат жыйынында мекеменин атайын өкүлү Аида Карабаева билдирди.

Ал бул 2021-жылдан бери казылып алынган жана өндүрүлгөн алтын экенин, аларды Улуттук банк сатып алганын белгиледи.

Карабаеванын айтымында, Улуттук банктын эл аралык алтын-валюта резервиндеги 16 тонна алтыны 87,3 млрд сомго барабар. Мындан тышкары запастагы алтын 138,5 млрд сомго тете.

Министрлер кабинетинин төрагасы Акылбек Жапаров “Кабар” агенттигине берген интервьюсунда Кумтөр кени Кыргызстанга өткөн эки жылдан бери 45 тонна алтын жана 8 тонна күмүш чогулганын, алар Улуттук банкта сакталуу экенин айткан.

Убактылуу депутаттык комиссиянын мүчөлөрү жана Министрлер Кабинетинин башчысы Акылбек Жапаров Кумтөр кенине барышты

«Кумтөр Голд Компани» жабык акционердик коомунун Кыргыз Республикасынын менчигине өткөндөн берки ишин, алтындын казып алынышын жана сатылышын иликтөө боюнча убактылуу депутаттык комиссиянын мүчөлөрү Кыргыз Республикасынын Министрлер Кабинетинин Төрагасы Акылбек Жапаров менен биргеликте Ысык-Көл облусундагы Кумтөр кенине барды.

Иш сапардын жүрүшүндө алар негизги карьердин, Петров көлүнүн, калдык сактоочу жайлардын абалы менен таанышып, ошондой эле алтынды бөлүп алуу фабрикасында болушту.

Эл өкүлдөрүнө ишканада жүргүзүлүп жаткан иштер, өндүрүштөгү абалды реалдуу убакыт режиминде көзөмөлдөөчү жана алтынды өндүрүүнүн технологиялык чынжырчасынан уурдоо жана алтынды кенден тышкары уруксаатсыз алып чыгуу мүмкүнчүлүгүн жокко чыгарган коопсуздук жана көзөмөл системасы тууралуу маалымат берилди.

«Алтындын ар бир граммы көзөмөлдө», – деп белгиледи ишкананын жетекчилиги.

2022-жылы алтынды бөлүп чыгаруучу фабрика 17,3 тонна алтын өндүргөн. 2023-жылы 14 тонна алтын өндүрүү планы коюлган.

Акылбек Жапаров 2022-жылдагы үч маанилүү окуяны атады

Министрлер кабинетинин төрагасы Акылбек Жапаров “Кабар” маалымат агенттигине курган маегинде өткөн жылдагы маанилүү үч окуя катары Кумтөрдүн мамлекетке алынышын, Кемпир-Абад жана Баткендеги чек ара маселелерин атады.

Ал Кумтөрдүн толугу менен мамлекетке өтүшү экономикалык эле эмес, руханий жактан да утуш болгонун, муну “элдин мүлкүн басып алган тышкы душманды гана эмес, ички душманды да – өз коркуусу, өз күчүнө ишенбөөчүлүк менен жеңүү” деп баалаган.

Кемпир-Абад боюнча да туура чечим кабыл алынганын, бул маселени шылтоо кылып, бийликке келүүнү көздөгөндөр болгонун айткан.

“Баткен аскердик конфликт катары эл, мамлекет үчүн чоң жана чыгашалуу сыноо болду. Биз андан татыктуу өттүк. Жабыркагандарга жардам берүү үчүн мамлекет керектүү каражаттарды табууга жетишти”, – деди Акылбек Жапаров Баткен тууралуу айтып жатып.

Ал былтыр бюджеттин кирешеси көбөйгөнүн, куралдуу күчтөрдү күчтөндүрүү иштерин жана айлык, пенсиялардын жогорулаганын өкмөттүн жетишкендиги катары белгилеген.

  • Канадалык “Центерра Голд” компаниясы менен бирге башкарып келген кенди Кыргызстан өз карамагына 2021-жылдын май айында алып, 2022-жылдын апрелинде “Кумтөр Голд Компанинин” 100% акциясы Кыргызстанга өткөн. Кыргызстан менен “Центерра Голд” доо арыздардан баш тартуу жана ортодогу талаш маселелерди чечүү боюнча келишимге жетишкен. Ага ылайык, Кыргызстан “Центерра Голдго” акциялардын 26 пайызын өткөрүп берип, бардык экологиялык жана каржылык доодон баш тарткан.
  • Президент Садыр Жапаров 29-ноябрда кыргыз-өзбек чек арасын тактоо жана Кемпир-Абад суу сактагычын чогуу пайдалануу тууралуу эки мыйзамга кол койгон. Суу сактагычтын жеринин берилишине каршы чыккан 20дан ашуун адам ушу тушта “төңкөрүш жасоого аракеттенген” деген жүйө менен камакта отурат.
  • Былтыр 14-17-сентябрда кыргыз-тажик чек арасындагы масштабдуу жаңжал ондогон адамдын өмүрүн алган. Эки тарап бири-бирин “агрессияга” айыптаган окуядан Кыргызстан бери дегенде 63 жаранынан айрылып, жараат алгандардын расмий эсеби 200гө жакындады. Тажикстандын Тышкы иштер министрлиги чек арада 41 жараны каза тапканын билдирди. “Озоди” радиосу өз булактарына таянып, 83 кишинин тизмесин жарыялады. Эки тараптан тең кагылышуудан каза тапкандар арасында балдар бар
Меню