Menu

Саидакмат Артыков

Тажикстандын абактарында 13 кыргызстандык жаза өтөп жатат

Баш прокурор Курманкул Зулушев 6-апрелде парламенттеги отчетунда Тажикстандын абактарында кармалып турган Кыргызстандын жарандары тууралуу маалымат берди.

Анын айтымында, тажик абактарында 13 кыргызстандык жазасын өтөп жатат, алардын экөө өмүр бою эркинен ажыратылгандар.

Абакта отургандардын маселеси жакын арада пландалып жаткан Тажикстандын баш прокурору менен жолугушууда талкууланышы мүмкүн.

Коңшу мамлекетте камакта отурган жарандардын маселесин депутат Шайырбек Ташиев көтөрдү. Ал тажик укук коргоо органдары кармап кеткен Баткен облусунун тургуну Саидакмат Артыков кыйноого кабылганын, аны “тыңчылыкка” айыптап, өмүр бою соттошконун, кийин ал жаза 18 жыл абак мөөнөтүнө алмашканын айтты. Аны экстрадициялоо мүмкүнчүлүгүн башкы прокурордон сурады.

Зулушев Саидакмат Артыковдун тагдырынан кабардар экенин маалымдады.

Артыков былтыр сентябрда Тажикстандын күч кызматтары тарабынан “чек араны мыйзамсыз кесип өттү” деген кине менен кармалган.

Жакындары аны бошотууга жардам берүүнү өтүнүп акцияга чыгышкан, бийликке кайрылышкан.

Тажикстан тараптан буга байланыштуу расмий комментарий боло элек.

Өткөн жылы сентябрда тажик күч кызматтары чек аралаш аймактан төрт кыргызстандык жаранды кармап кетишкен, алар сүйлөшүүлөрдөн кийин бошотулган.

Акыйкатчынын Тажикстанда абакта отурган кыргыз жараны боюнча катына жооп келе элек

Кыргызстандын Акыйкатчысынын кеңсеси Тажикстанда абакта отурган кыргыз жараны боюнча тажик тарапка жолдогон катына жооп келе элек. Бул тууралуу 17-ноябрда Акыйкатчынын басма сөз кызматы билдирди.

Маалыматка караганда, расмий кат Тышкы иштер министрлигине жана Тажикстандын Омбудсменине 11-ноябрда жөнөтүлгөн, азырынча жооп боло элек.

Тажикстандын Жийделик айылында жашаган Кыргызстандын жараны Сайдахмет Артиков (Саидакмат Артыков) эки ай мурда кармалган. Жакындары аны бошотууга көмөктөшүүнү өтүнүп кыргыз бийлигине кайрылган жана ал абакта кыйноо көрүп, ооруканага жатып чыкканына кабатырлыгын билдирген. 44 жаштагы Артыков ушул жылдын 16-сентябрында “чек арадан мыйзамсыз өттү” деген кине менен кармалып, Тажикстандын Кожент шаарындагы тергөө абагына камакка алынган.

12-ноябрда Бишкекте Артыковду бошотууну суранып акцияга чыккандар менен жолугушууга Министрлер кабинетинин төрагасынын орун басары Эдил Байсалов чыгып, маселени тийиштүү органдарга жеткирип, кыргыз жарандарын чыгарууга көмөктөшөрүн айткан.

Меню