Дүйнөнүн 197 өлкөсүндөгү жарандык коомдун жана жарандык укуктардын абалын баалаган CIVICUS эл аралык уюму Тажикстанды “жабык” өлкө деп тапты.
Уюмдун 16-мартта жарыяланган баяндамасында Тажикстан менен бир катарга Түркмөнстан, Кытай, Сирия, ошондой эле Африка жана Азия континентиндеги бир катар өлкөлөр жайгашкан.
CIVICUS Тажикстан жабык өлкөлөрдүн катарына Тоолуу-Бадахшан автоном облусундагы митингдерди күч менен таркатканы үчүн киргизилгенин билдирүүдө. Баяндаманын авторлору укук коргоо органдарынын аймактагы “атайын операциясы” маалында жарандарга карата ашыкча күч колдонулуп, негизсиз кармоолор, кыйноолор жана адам өлтүрүүлөр болгонун жазышкан. Мындан тышкары бул өлкөдө көпчүлүк коркуп жашай турганы, жарандар өз пикирин айтканы жана тынч митингдерге чыкканы үчүн камакка алынары белгиленген.
“Көз карандысыз журналисттер, жарандык активисттер, адвокаттар жана укук коргоочулар куугунтукталып жатат. Мындай шартта бийликтин оппоненттеринин үнү барган сайын азаюуда”, – деп жазылган баяндамада.
Азырынча тажик бийлиги CIVICUS уюмунун бул баяндамасы боюнча комментарий бере элек.
2022-жылы май айында Хорогдун тургундары нааразылык акциясына чыккан. Алар милициянын 2021-жылдын ноябрындагы операциясы учурунда каза болгон жергиликтүү тургун Гулбиддин Зиёбековдун өлүмүнө күнөөлүүлөрдү жазалоону талап кылышкан. Бийлик чогулгандарды “уюшкан кылмыштуу топ” деп атап, аларды таратуу үчүн кошумча күч жөнөткөн. Жолдо Рушан районунун жашоочулары укук коргоо кызматкерлеринин жолун торошкон. ИИМ тургундар күч түзүм кызматкерлерине кол салганын айтып, “антитеррористтик операция” баштаганын билдирген. Анын жыйынтыгында 34 киши өлүп, ондогон адам кармалганы кабарланган.