АКШнын федералдык апелляциялык соту да президент Дональд Трамптын указын токтотту

АКШнын федералдык апелляциялык соту президент Трамптын жети мусулман өлкөсүнүн жарандарынын Кошмо Штаттарга кирүүсүнө үч айга тыюу салган жарылыгынын күчүн калыбына келтирүүдөн баш тартты. Калифорниядагы аймактык апелляциялык соттун мүчөлөрү төмөнкү баскычтагы соттун чечимин күчүндө калтырууну бир добуштан колдошту.

«Администрация бизден аткаруу бийлигинин иммиграция жана улуттук коопсуздук маселериндеги артыкчылык укуктарын сыйлоону гана талап кылган эмес. Алар аткаруу бийлигинин улуттук коопсуздукка байланышкан иммиграциялык чечимдери Конституцияга туура келет-келбейт деп текшерилбөөгө тийиш экенин талап кылышты», – деп айтылат сот чечиминде.

Сотто Акүй Иран, Ирак, Сирия, Ливия, Сомали, Судан жана Йемен жарандарын теракт жасоо ыктымалдыгы жогору адамдардын тизмесине киргизүүдө кандай маалыматтарга таянгандыгы боюнча суроолор көп болду.

Президент Трамп калифорниялык соттордун чечимин кескин сынга алды. Ал Твиттердеги баракчасына соттук териштирүүлөр уланарын жана анда өлкөнүн улуттук коопсуздугунун тагдыры чечилип жатканын жазды.

Эми Башкы прокуратура аймактык соттун чечими боюнча Жогорку сотко кайрыла алат. Адатта иммиграция жана улуттук коопсуздук маселелерине тиешелүү болгон иштерде Жогорку сот аткаруу бийлиги тарапты колдоп келген. Анткен менен бүгүнкү күндө өлкөнүн эң жогорку соттук баскычынын курамы толук курала элек. Анын коллегиясынын төрт мүчөсү либералдык, дагы башка төртөө консервативдик көз караштарды карманышат. Эгер судьялардын добуштары тең болуп калса, анда аймактык соттун чечими күчүндө калат.

Булак: “Борбор Азия жаңылыктар кызматы

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *