“Апрель” телеканалынын сот иши башталат

“Апрель” телеканалынын жетекчиси Дмитрий Ложниковго Октябрь райондук сотунан сот жараянына чакыруу кагазы келген. Бул маалыматты чакыруу кагазынын сүрөтүн кошо жайгаштырып, журналист “Фейсбуктагы” баракчасына жазды. Журналисттин “Азаттыкка” билдиргени боюнча, соттук териштирүү 30-январда башталат.

-Өткөн жумада да чакыруу келген, – деди ал. – Бирок биздин адвокаттар бошобой каларын айтып, сотту жылдырууну өтүнүшкөн эле. Эми “30-январда болот” деп чакыруу келди. Бизди Медиа Полиси институту сотто коргойт, алардын өкүлү менен жолугуп, сүйлөшкөнбүз. 10-январда саясатчылар Ахматбек Келдибековдун, Азимбек Бекназаровдун жана Кеңешбек Дүйшөбаевдин экс-президент Алмазбек Атамбаев менен “Апрель” телеканалына койгон доо арызы толукталып кайра сотко тапшырылган.

Жогорку Кеңештин экс-спикери Ахматбек Келдибеков, Убактылуу өкмөттүн мүчөлөрү Азимбек Бекназаров менен Кеңешбек Дүйшөбаев экс-президент Алмазбек Атамбаевдин “Апрель” телеканалында 10-декабрда чыккан маегине байланыштуу 26-декабрда мурдагы президент менен аталган каналдын редактору Дмитрий Ложниковго каршы Октябрь райондук сотуна кайрылышкан.

Жогорку сот алардын доо арызын толуктоо үчүн 9-январда артка кайтарган.

Алар “телеканалдагы маегинде экс-президент ар-намысыбызга шек келтирди” деп, мурдагы президент менен телеканалдан жалпы жонунан 18 млн. сом өндүрүп берүүнү соттон өтүнүп жатышат.

Булак: «Багыт»

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *