Батыш өлкөлөрү Орусияны украин суучулдарын бошотууга чакырды

Батыш өлкөлөрү Керч кысыгындагы окуяда Киевди колдоп, Орусияны украин кемелери менен суучулдарын тез арада бошотууга чакырышты.

АКШнын мамлекеттик катчысы Майк Помпео өлкө Орусиянын бул агрессивдүү кадамын айыптай турганын билдирди. «Кошмо Штаттар бул агрессивдүү кадамды айыптайт. Орусияны Украинанын аймактык бүтүндүгүн эл аралык деңгээлде таанылган чек аралардын негизинде сыйлоого жана кармалган украин кемелери менен суучулдарын бошотууга чакырабыз. Эки тарап тең сабырдуулук кылып, эл аралык милдеттенмелерин аткарышы керек. Эки өлкөнүн президенттери абалды жөнгө салууга түздөн-түз катышууга тийиш», — деди Помпео.

АКШнын БУУдагы туруктуу өкүлү Никки Хейли деңиздеги окуяны «Украинанын суверенитетин бузуу» деп атады. Ал Кошмо Штаттар украин элинин орусиялык агрессияга каршы аракеттерин колдоосун уланта турганын кошумчалады.

Улуу Британиянын БУУдагы өкүлүнүн орун басары Жонатан Аллен Орусия Украинага каршы акыркы аракеттери менен Батышка чакырык таштаганын билдирди. «Орусия Крымдын мыйзамсыз аннекциясын бекемдеп, Азов деңизин аннексиялоону каалап жатат. Москва эл аралык коомчулук буга унчукпай макул болуп, аны жаңы реалдуулук катары кабыл алат деп үмүттөнүп жатат окшойт. Жок, биз кабыл албайбыз. Орусиянын жаңы реалдуулуктарды түзүү аркылуу тарыхты кайра жазуусуна жол бербеш керек», — деди Аллен.

Күн мурун украин парламенти «Орусия агрессиясынын» алдында алсызыраак болгон бир катар аймактарда аскердик абал киргизүү тууралуу Порошенконун сунушун колдогон. Аскердик абал 28-ноябрда башталып, 30 күнгө созулат.

Булак: “Борбор Азия жанылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *