Быйылкы жылдын планын аткара албай, анан эмки жылдын 51 млрд сомдук планын кантип аткарасыңар?

Бүгүн, 14-октябрда Жогорку Кеңештин агрардык саясат боюнча комитетинде Кыргыз Республикасынын 2020-жылга карата республикалык бүджетинин мыйзам долбоору каралууда.

Комитеттин төрагасы Нурбек Алимбеков (“Кыргызстан”): “2020-жылы кандай киреше алайын деп жатасыңар?” деген суроону кабыргасынан койду. Каржы министринин орун басары Алмаз Азимов: “”2020-жылдагы республикалык бүджет мамлекеттик инвестициялардын гранттарын эске алганда 163 млрд 710,4 млн сом же ИДПнын 24,5%ын түзөт. 2019-жылга бекитилген бүджеттен 7,9%га көп болот же 11 млрд 948 млн сомду түзөт”, – деди. Депутат Салык жана Бажы кызматтарынын киреше планын сурады.

Мамлекеттик бажы кызматынын жетекчиси Алтынбек Торутаев 2020-жылга карата 51,7 млрд сом планы коюлганын, ал быйылкыга салыштырмалуу 3,4 млрд сомго көптүк кылаарын айтты. Ошондо өсүү темпи 106,4 %ды түзүшү кажет.

“Эгерде 2019-жылдын планын аткарууга жетишпей жатсаңар, бул планды кантип аткарасыңар?” – деп зекиди А.Алимбеков.

“2019-жылдын 10 айынын жыйынтыгына ылайык, 4 млрд сомго жетпей жатабыз. Товардын келиши кескин кыскарып кетти”, – деп жооп берди бажы башчысы.

Булак: KyrgyzToday.kg

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *