Казак өндүрүүчүлөрү кант импортунун чектелишине кабатыр болушууда

Казакстандык кондитерлер ассоциациясы менен Алкоголсуз ичимдиктер ассоциациясы ЕАЭБ аймагында кантты уюмдан тышкаркы өлкөлөрдөн импорттоого тыюу салуу идеасына каршы чыгышты.

Казакстан кондитерлер ассоциациясынын вице-президенти Ерлан Ахметовдун билдиришинче, Орусия менен Беларустун ири кант өндүрүүчлөрү ЕАЭБ аймагында кант импортуна тыюу салуу сунушу менен чыгууга ниеттенишүүдө. Бул демилге 25-октябрда Ереванда өтө турган ЕАЭБ өлкөлөрүнүн өкмөт башчыларынын жыйынында көтөрүлөт.

Казакстандык өндүрүүчүлөр эгер бул сунуш колдоо тапса, анда чет өлкөдөн импорттолгон кантка 30-40 пайыз көлөмгө чейин бажы салыгы салынарын, канттан жасалган өнүмдөр, анын ичинде кондитердик азыктар менен суусундуктардын баасы да ушундай өлчөмдө кымбатташы мүмкүн экенин айтышууда.

Казакстандык өндүрүүчүлөр учурда ЕАЭБ келишими боюнча тыштан кантты бажы салыгы жок импорттошот.

Ассоциация өкүлдөрү эгер казакстандык өндүрүүчүлөр кантты ЕАЭБге мүчө өлкөлөрдөн гана сатып алса, Орусия менен Беларустун кант өндүрүүчүлөрү өз алдынча баа саясатын аныктап калышат деп кооптонушууда.

Булак: “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *