Казакстанда орусиялык журналист Соловьевдун келишине каршы болушууда

Социалдык түйүндөрдө белгилүү орусиялык тележурналист Владимир Соловьевдун Казакстанда өтө турган мастер-класстары жарнамаланууда. Анын сүйлөшүүлөрдү өткөрүү боюнча тренингдери менен Алматыга апрелдин башында келери күтүлүүдө. Бирок айрым интернет колдонуучулар Соловьевдун «кремлчил пропагандалык билдирүүлөрүнөн» кооптонушуп, анын өлкөгө келишине каршылыгын билдирип жатышат.

Казакстандык журналист жана укук коргоочу Сергей Дуванов «өлкөгө Кремлдин алдыңкы пропагандачысынын келишине жана анын эл алдында сүйлөөсүнө мүмкүндүк түзүп берүү — бул казакстандыктардын «жикчилдик» маанайдагы бөлүгүн колдоого багытталган олуттуу пропагандалык акция деп эсептейт.

Саясат таануучу Расул Жумалы Владимир Соловьев «орус дүйнөсүнүн» жактоочусу, зомбулук көрсөткөн советтик жетекчилерди жана Орусиянын Украинага чабуул коюусун актоо маселелерин көтөрүп келген активист журналист катары белгилүү экенин белгиледи. «Менимче, анын «мастер-класстары» – бул жөн гана шылтоо. Кандай болгон күндө да ал Орусиянын империялык саясаты тууралуу маселени козгоп өтөт. Көптөгөн өлкөлөрдө бул сыяктуу адамдарды нон-грата персонасы деп жарыялап, өлкөгө кирүүсүнө тыюу салышат. Анын Алматы менен Астананын мыкты дарсканаларында сүйлөөсүнө мүмкүндүк түзүп берип жаткандардын кандай максаттарды көздөгөнү түшүнүксүз», – деди ал.

Владимир Соловьев айрым казакстандыктар анын өлкөгө келүүсүнө каршылык билдирип жаткандыктарын билет. Орусиялык журналист informburo.kz сайтына курган маегинде Казакстанга болчу сапарын токтотуу тууралуу ойлобогонун билдирди.Ал ага каршы болуп жаткан адамдарды «психикалык жактан оорулуу» деп сыпаттап, «социалдык түйүндөрдө жазып жаткан жүздөгөн колдонуучулар түрдүү аккаунттар менен кирип жаткан 10 гана адам» деген божомолун айтты.

«Менде өлкөнүн ички иштерине кийлигишүү оюм жок. Мени кантип сүйлөшүүлөрдү өткөрүү керектиги жана оратордук чеберчилик боюнча сабак өтүп бер деп чакырышты. Ошондуктан эгер кимдир бирөө бул сапарымды саясатташтырууга аракет кылып жаткан болсо, анда алардын артында бир аз акча турат, кимдир бирөөаларды түртмөлөп жатат, алардын артында бейөкмөт уюмдарга тиешеси бар адамдар турушат», – деди Владимир Соловьев.

Булак: Борбор Азия жанылыктар кызматы

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *