Кеңешбек Дүйшөбаев, УКМКнын мурдагы төрагасы: “Атамбаев коомчулукту алагды кылуу максатында тыңшоочу аппаратты ойлоп тапты”

Эки-үч күн мурун КСДПнын саясий кеңеши маалымат жыйын өткөрүп, экс-президент Алмазбек Атамбаевдин бөлмөсүнөн тыңшоочу аппарат табылганын айтышып, ал тургай аны көрсөтүп да беришти. Алар: «Бул аппараттар УКМКнын кызматкерлери тарабынан атайын жасалган», — дешет. Ал эми атайын кызмат маалыматты төгүндөп, «бул — КСДПнын кезектеги пиары», — деп баалады. Экс-президент Атамбаевдин бөлмөсүнө тыңшоочу аппарат коюлганы чын болсо, анда ал эмнеге багытталган? УКМК мындай аракетке кандай баа бериши керек? Бул жана башка суроолорго жооп алуу үчүн УКМКнын мурунку төрагасы Кеңешбек Дүйшөбаев менен «Марал ФМ» радиосу түз эфирге маек курган экен. Ошол эфирдин өзөктүү жерлерин сиздерге сунуштайбыз.

—Негизи тыңшоочу аппарат кандай учурда коюлат? Ага кимдер уруксат берет?

—Тыңшоочу аппарат атайын кылмыштын алкагында, оперативдик иш-чаралар көрүлуп жатканда, соттун санкциясы менен коюлат. Алсак, кылмышкерди тактоодо, тастыктоодо, күнөөсүн мойнуна алдыртууда ушул тактика колдонулат. УКМК тыңшоочу аппаратты ушундай негизде коюуга укугу бар.

—Жалпы ЖМКларда «Атамбаевдин иш бөлмөсүнөн тыңшоочу аппарат табылды» деген видео тарап жатат. Ушундай болушу мүмкүнбү? Далилдөөгө болобу? Сизди ынандыра алдыбы? Оюңуз кандай?

—Мен видеону да көрдүм, кабарлардын бардыгын окудум. Менин оюмча, УКМКнын такыр тиешеси жок. Себеби, бүгүнкү күндө Атамбаевдин жана анын тегерегиндеги адамдардын сүйлөшүп жаткан сөздөрүн тыңшап кереги жок. Анткени, алардын баары «соодасы бүткөн» саясатчылар. Аталган кызматтын мындан башка толтура иштери бар. Ошондуктан, мен муну жөн гана чагымчылдык деп эсептейм. Болбогон жерден ойлонуп табылган иш-аракет.

—Балким, экс-президент бийликке карата негизги оппонент болуп чыга келгени үчүн УКМК тыңшоого алып жүрбөсүн?..

—Атамбаевдин үстүнөн козголгон иш жок. Ал жөнүндө террорист же экстремист деген кабарлар да жок. Ошондуктан, анын артынан аңдыганга эч бир себеп жок. Мен бул ишти башка нерселер менен байланыштыргым келип жатат. Учурда Батукаевдин иши чуулгандуу болуп, коомчулукта абдан чоң резонанс жаратып жатат. Ушул сыяктуу орчундуу окуялар Атамбаевдин учурунда аягына чыкпай жабылып, жашырылып, билинбей калган. Бүгүнкү күндө тергөө жүрүп, мурунку бийликтин башында жүргөндөрдүн түздөн-түз байланышы бар экени ачыкка чыгып жатат. Ошондуктан, Атамбаев жана анын тегерегинде жүргөн адамдар коомчулукту алагды кылып, көңүлдөрүн ушул сыяктуу башка нерселерге бургусу келип жатат. Мындан улам, алар элге жабырлануучу катары көрүнгүлөрү келип, ушул тактиканы тандап алышты деп ойлойм. Ошон учүн буга көңүл буруунун да, ызы-чуу кылуунун да кажети жок.

Булак: «Мантыш»

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *