Бийлик ГЭСтерди куруп берет деген «Liglass traiding” компаниясынын базар баасы $130 гана доллар турат

Америкада жашап иштеген жердешибиз Айбек Хакимов бүгүн, 18-сентябрда өзүнүн социалдык тармактагы баракчаларынын биринде жаңы пост жазды:

“Жакында эле массалык маалымат каражаттарынан Кыргызстандагы гидроэлектростанцияларды курууга тартылган Чехиялык “Liglass traiding” компаниясы боюнча ызы-чуу салган маалыматтарды байкаган болчум. Анда бул компаниянын каржылык ресурстарынын жетиштүү экенине шектенүүлөр көп болгон.

Буга кызыгып, мен “Liglass traiding” компаниясын D&B Hoover (www.hoovers.com) компаниялардын рейтингин иликтеп турчу сервис аркылуу текшерип көрүүнү чечтим. D&B Hoovers – бул бүткүл дүйнө боюнча компаниялар тууралу кеңири маалыматтарды топтогон ири маалымат базасы бар сервис. АКШда D&B Hoover сервиси клиенттердин чама-чаркын, төлөө жөндөмдүүлүгүн текшерип чечим кабыл алууда же жаңы клиенттерди издөөдө кеңири пайдаланылат.

D&B Hoover сервиси берген маалымат боюнча “Liglass traiding” компаниясы 2003-жылы уюшулуп, штатында 3 кызматкери болгон. Бир жылдык кызмат көрсөтүүсү  $15120 долларды түзсө чыгашасы $48750 долларга жеткен. Эгер бүгүн ээлери  “Liglass traiding” компаниясын сатабыз дешсе, анын базар баасы $130 гана доллар турат. Көрсөтүлгөн сандар өздөрү эле айтып турбайбы (тиркемеси бар).

“Liglass traiding” компаниясы ГЭСтерди куруу боюнча өзүнө алган милдеттенмелерди аткаруунун бир гана жолу бар – бул үчүн ал чын эле ГЭСтерди курууда тажрыйбасы бар, акчалуу компанияны табышы керек. Бирок мындай учурда  “Liglass traiding” компаниясы ортомчу гана компания болуп калат. Демек ортомчу аралашса анда ГЭСтерди куруунун чыгымы гана көбөйөт.

Кыргызстандын өкмөтүнө келечекте мына ушундай ыңгайсыз абалдарга кабылбаш үчүн D&B Hoover сервисине жазылууну сунуш кылат элем. Бир жылдык баасы  $6000 турат, бирок андан алынган маалыматтар ошого тете, өлкөнүн репутациясы да маанилүү эмеспи”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *