Орусия менен Түркия «Түрк агымы» газ кууру боюнча келишимге кол коюшту

Орусия менен Түркия «Түрк агымы» газ кууру долбоору боюнча макулдашууга келишти. ТАСС агенттигинин билдиришинче, документке Владимир Путин менен Режеп Тайып Эрдогандын сүйлөшүүлөрүнүн жыйынтыгы менен эки өлкөнүн энергетика министрлери кол коюшту.

Буга чейин «Газпром» компаниясынын башчысы Алексей Миллер макулдашууда Кара деңиздин түбү аркылуу магистралдык түтүктүн эки куурун куруу каралганын билдирген. Миллердин айтымында, алар 2019-жылдын декабрына карата салынып бүтүшү керек.

2014-жылы газ куурунун үчүнчү энергопакетке шайкеш келиши керектигин билдирген ЕБдин талаптарынан улам Орусия «Түштүк агымды» куруудан баш тартып, альтернативдүү долбоорду — «Түрк агымын» ишке ашырууну баштаган. Бирок эки тараптуу мамилелердин суушуна байланыштуу долбоор боюнча сүйлөшүүлөр убактылуу токтогон. Алакалардын кайра жанданышы менен долбоор боюнча иштер башталды.

Ошондой эле Орусия Түркиядан жемиштерди алып кирүүгө киргизилген чектөөлөрдү жарым-жартылай алууну чечти. Алгачкылардан болуп орус базарында түрктөрдүн цитрус жемиштери, шабдаалы, кара өрүктөрү пайда болот. Бул тууралуу ТАССка Россельхознадзордун жетекчисинин жардамчысы Алексей Алексеенко билдирген.

Бүгүн Орусия президенти Владимир Путин орусиялык базарга түрк айыл чарба товарларынын тобун өткөрө турганын билдирди.

Булак:  “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *