Орусияда беш жаштагы тажикстандык кыздын өлүмү боюнча сот кайра башталат

Орусияда беш жаштагы тажикстандык кыз Хувайдо Тиллозоданы өлтүрүүгө айыпталгандардын соту 20-ноябрда кайра башталат. Бул тууралуу RFE/RL радиосунун тажик кызматына маркум кыздын атасы Абдусалом Саидов билдирди.

Анын айтымында, аларга Москва облустук соту айыпталуучу Александр Семин акыл-эси жайында деп табылганы, жакында сот кайра уланары тууралуу кабар берди.

Маалыматка караганда, айыпталуучу сотко жеткирилет. Тажикстандын Орусиядагы элчилиги бул иш боюнча сотко көз салууда.

Беш жаштагы Хувайдо 2018-жылы 22-июлда үйүнүн алдында ойноп жаткан маалда жоголгон. Анын сөөгү эртеси күнү Москва облусунун Серпухов шаарындагы темир жолдун жээгине ташталган спорттук баштыктан табылган. Соттук-медициналык экспертиза кыз зордукталып, андан кийин бычакталып өлтүрүлгөнүн аныктаган.

Кылмышка шектүү катары 28 жаштагы жергиликтүү тургун, кыздын ата-энесинин кошунасы Александр Семин кармалган. Ал Смоленск шаарындагы психиатриялык клиникага жаткырылган. Андан бери ар бир отурумдун алдында ооруканадан «Семин психикалык абалына байланыштуу сотко катыша албайт» деген маалымкат келип турган.

Булак: “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *