Рамзан Кадыров коргонуучу каражаттардын жетишсиздигине даттанган дарыгерлерди бошотууну талап кылды

Чеченстандын башчысы Рамзан Кадыров Гудермес шаарында вирустан коргонуучу каражаттардын жетишсиздигин айтып чыккан дарыгерлерди иштен алууну талап кылды. Бул тууралуу ал өкмөт жыйынында билдирди.

Кадыров: “Чагымчылдарды бошотуу керек. Бизде баары жетиштүү – жабдуулар, костюмдар, беткаптар, кислород, медикаменттер бар. Биз тескерисинче, башка аймактарга жардам бере алабыз”, – деген.

Буга чейин соцтармактарда тараган видеолордо коронавирус инфекциясына чалдыккан бейтаптар менен иштеп жаткан дарыгерлер жеке коргонуучу каражаттар жетишпей жатканына нааразы болушкан. Мындан соң оорукананын башкы дарыгери жана нааразы болгон медиктердин бири жумуштан бошотулган.

Мамлекеттик “Грозный” телеканалы Гудермес шаарындагы дарыгерлердин нааразылыгын “негизсиз дүрбөлөң”, ал эми акциянын катышуучуларын “чагымчылдар” деп атаган. Сюжетте бир кампа толо коргонуучу каражаттар көрсөтүлгөн. Кийинки күнү эле эки дарыгер жана үч медайым коргонуучу каражаттардын жетишсиздигин айтып чыгышканы үчүн кечирим суроого аргасыз болушкан. Мындан тышкары алар бир дарыгер вирустан өлгөнү жалган экенин да белгилешкен.

Соцтармактардын колдонуучулары медиктер бийликтин кысымы менен кечирим суроого аргасыз болгон деп эсептешүүдө.

Булак: “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *