Ташкентте ШКУга мүчө өлкөлөрдүн атайын кызмат өкүлдөрү жолугушууда

Ташкентте Шанхай кызматташтык уюмуна мүчө өлкөлөрдүн атайын кызмат өкүлдөрү терроризм жана экстремизмге каршы күрөшүү боюнча биргелешкен аракеттерди көрүү маселесин талкуулашат.

ТАСС агенттигинин маалыматына караганда, ШКУнун аймактык антитеррористтик түзүмүнүн 30-мартта Ташкентте ачылган жыйынында 2017-2018-жылдарга карата түзүлгөн иш-чаралардын планы жана коркунучтарга каршылык көрсөтүү боюнча биргелешкен аракеттер талкууланат. Ага Казакстан, Кытай, Кыргызстан, Орусия, Тажикстан жана Өзбекстандын атайын кызматтарынын делегациялары катышат.

Жыйындын жүрүшүндө ШКУнун жаңы мүчөлөрү — Индия жана Пакистан менен өз ара аракеттешүү маселеси да көтөрүлөт.

Андан сырткары интернетти террористтик, сепаратисттик жана экстремисттик максаттарда пайдалануу фактыларын аныктоо боюнча биргелешкен антитеррористтик машыгууларды жана атайын кызматтардын чек ара операцияларын өткөрүү мүмкүндүктөрү талкууланып, ШКУ өлкөлөрүнүн «Шериктештик-2016» биргелешкен машыгууларынын жыйынтыктары чыгарылат.

Булак: “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *