Тажикстанда адамдарды ИМ тобуна азгырууга шектелген жаран кыйноого кабылганын билдирди

Тажикстанда адамдарды «Ислам мамлекети» экстремисттик тобунун катарына азгырууга шектелип кармалган жарандын көрсөтмө берүүгө мажбурлангандыгы тууралуу арызы каралууда. Адвокаттардын билдиришинче, 29 жаштагы Жовидон Хакимов кармалгандан кийин аны суракка алган полиция кызматкерлери ырайымсыздык менен сабашкан.

«Сотто Хакимов полиция бөлүмүндөгү сурак маалында аны сабашып, мурдун сындырышканын айтты», — деди анын адвокаты Мухаббат Усмонова. Айтымында, полициячылар Хакимовду ток менен да кыйнашкан.

Дүйшөмбү сотунда көрсөтмө берген бир нече полиция кызматкери Хакимовдун айткандарын четке кагышты. Усмонованын айтымында, сот Хакимовду медициналык текшерүүдөн өткөрүү тууралуу адвокаттардын өтүнүчүн канаатандырган жок.

Хакимов Тажикстандын бир нече жаранын «Ислам мамлекети» тобунун катарында Ирак менен Сириядагы согуштарга катышууга азгырган деп айыпталууда. Прокурорлор ал ИМ жоочуларынын катарында Иракта согушуп жүргөн агасы жана кошунасы менен дайыма телефон аркылуу сүйлөшүп турганын билдиришкен. Болжол менен анын агасы Ирактагы салгылашуулардын биринде каза болгон.

Булак: “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *