Тажикстанда КВН командасынын жетекчиси 10 жылга камалышы мүмкүн

Хужанд шаардык соту КВН боюнча Тажикстан курама командасынын жетекчисин камакта калтыруу чечимин чыгарды. Мамлекеттик каражатты максатсыз колдонгон деп айыпталган Хайрулло Мирсаидовдун камактагы 72 сааттык мөөнөтү 8-декабрда аяктаган.

Согди облустук прокуратурасынан кабарлашкандай, Мирсаидовго карата «Ишенип берилген акчаны коротуу же өзүнө алуу», «Расалык, жердештик жана диний кастыкты козутуу», «Документтерди, мөөр, штамптарды жасалмалоо» жана «Жалган билдирүү» беренелери боюнча кылмыш иши козголду. Эгер ал күнөөлүү деп табылса, 10 жылга чейин эркинен ажыратылышы мүмкүн.

Маалыматка караганда, Хайрулло Мирсаидов 6-декабрда Согди облустук прокуратурасына чакырылып, ошол эле күнү камакка алынган. Учурда ал Хужанд тергөө абагында кармалууда.

Ал буга чейин жергиликтүү бийлик аны КВН командасы үчүн бөлүнгөн акчаны максатсыз пайдаланууга айыптап, алардын ортосунда жаңжал болуп жатканын кабарлаган. “Мен 8-ноябрда президент Рахмонго, баш прокурорго жана Согди облусунун башчысына кайрылып, жергиликтүү аткаминерлердин күнөөсүнөн улам команда туш болгон көйгөлөр тууралуу билдирүүгө аргасыз болдум”, – деген ал.

Мирсаидовдун айтымында, 2014-жылы Согди облусунун башчысынын демилгеси менен негизделген команда 10-ноябрда Москвага учуп кетиши керек болчу. «Ага Согди облусунун бийлиги каражат бөлүп бермек. Бирок биз акча алган жокпуз. Анткени облустун Жаштар иштери боюнча комитетинин жетекчилигинин арызы менен прокуратура биздин команданын ишмердүүлүгүн, анын ичинде бюджеттик каражаттын пайдаланылышын текшере баштады», – деди ал.

Хайрулло Мирсаидовдун айтымында, буга чейин комитет кызматкерлери андан КВН командасы үчүн бөлүнгөн бюджеттик акчадан 1000 доллар өлчөмүндө пара сурашкан. Комитеттен бул айыптоолорду четке кагышууда.

Булак: “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *