Түркияда сойкулук менен алектенген кыргызстандыктар кармалды

Түркиянын курорттук Бодрум шаарында сойкулук шеги менен 6 аял кармалды, алардын арасында үчөө Кыргызстан, экөө Орусия, бирөө Түркмөнстан жарандары. Алар менен кошо ортомчулук кызмат көрсөтөт делген Түркиянын эки атуулу колго түштү.

Бодрум полициясынын өкүлдөрү шаарга бир ай мурун эс алуу үчүн келип сойкулук менен алектенген аялдарга эки апта бою байкоо жүргүзүшкөн.

Полиция аялдардын бири медайым, экинчиси компьютер боюнча адис, дагы бири туризм агенти кесибине ээ экенин билдирди.

Тарип сакчылары тиешелүү маалыматтарды чогулткандан кийин эки аялды автоунаада сексуалдык кызмат көрсөтүп жаткан маалда кармашкан. Дагы экөө жарандык кийимчен полиция өкүлдөрү менен жолугушуу учурунда колго түшкөн. Калган аялдар Гумбет районунда жайгашкан мейманканада кармалышкан.

29 жаштагы орусиялык аял полиция департаментинде берген көрсөтмөсүндө аларды сойкулукка эч ким мажбурлабаганын, өз каалоолору менен бул ишке барышканын билдирди. “Биз өтө кымбат мейманканада эс алдык, мындан улам акчаларыбыз тез эле түгөнүп калды. Бизге Бодрум абдан жакты. Андан соң мейманканаларда иш издедик, бирок ылайыктуу жумуш тапкан жокпуз. Анан эки эркек менен таанышып, сойкулук менен алектене баштадык. Тапкан кирешенин теңин ортомчуларга бердик. Эки жума ичинде эле 50 миң лира же 14 миң АКШ долларын таптык”,-деди ал.

Кармалган аялдар Мугла шаарынын полиция департаментинин миграция бөлүмүнө жеткирилди, эми аларды депортация күтүп турат.

Булак: Каганат

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *