Түркмөнстанда бюджеттик мекемелерде иштегендер жапырт түрдө талаа иштерине чыгарылууда

Түркмөнстандын Лебап облусунун бийлиги мамлекеттик мекемелерди кызматкерлерин талаа иштерине жөнөтүп турууга милдеттендирди. Бул тууралуу «Эркин Европанын» түркмөн кызматынын аймактык кабарчысы билдирди.

Анын айтымында, учурда аймакта пахтаны чеканкалоо — сабактарынын башын үзүү өнөктүгү башталды. Бул өсүмдүктүн бийиктеп өсүүсүн токтотуп, мөмө байлашын тездетет.

«Бул өнөктүк үчүн мамлекеттик мекемелерде иштеген ар бир кызматкерден 20 манаттан акча чогултулуп жатат. Мындан тышкары пахта сабактарынын баштарын үзүү мезгили аяктаганга чейин ар бир мекеме кезек менен 5-6дан кызматкерин талаага жиберип турууга милдеттендирилди», — деп билдирди кабарчы.

Түркмөнстанда айдоо жерлер мамлекеттин менчигинде. Быйыл өлкө бийлиги 550 миң гектар жерден 1 миллион 50 миң тонна пахта жыйноо пландалып жатканын билдирген.

Эл аралык уюмдар пахта терүү маалында балдардын эмгегин пайдалангандыгы жана адамдарды мажбурлап иштеткендиги үчүн түркмөн бийлигин байма-бай сындап келишет.

Булак: “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *