Түркмөнстанда газ, суу электр кубаты үчүн эсептегичтерди орнотуу талап кылынууда

Түркмөнстан президенти социалдык жеңилдиктерди жойгондон кийин өлкөнүн булуң-бурчунда жергиликтүү бийлик өкүлдөрү жашоочуларды үймө-үй кыдырып, өткөн жылга газ, суу, электр кубаты үчүн төлөмдөрдү талап кыла баштады. Мындан тышкары атайын эсептегичтерди орнотуу көрсөтмөсү берилүүдө.

Жергиликтүү медиа кабарлагандай, көп кабаттуу үйлөрдүн кире беришине “урматтуу президенттин жарлыгын аткарып, газ, электр кубаты жана суу үчүн эсептегичтерди орноткула” деген билдирүүлөрдү чаптап кетишүүдө.

Буга чейин “Азаттыктын” түркмөн кызматы облустарда бир нече айдан бери мажбурлап эсептегичтерди орнотуу өнөктүгү жүрүп жатканын билдирген. Маселен, Балканабат шаарында бюджеттик мекемелердин кызматкерлеринен үйлөрүнө суу үчүн эсептегичтерди орноткондугун тастыктаган маалымкат талап кылышууда.

Социалдык жеңилдиктерди жоюу боюнча президент Гурбангулы Бердымухамедовдун билдирүүсүнөн кийин өткөн аптадан тарта үстүбүздөгү жарым жыл үчүн коммуналдык төлөмдөрдү талап кылышууда.

1993-жылдан бери ар бир түркмөн жараны күнүнө 35 киловатт/саат электр энергияны, 50 метр куб көгүлтүр отту жана 250 литр сууну акысыз алып келген. Маркум президент Сапармурад Ниязовдун буйругунда мындай жеңилдиктер 2030-жылга чейин уланат деп белгиленген эле.

Булак: “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *