Украиналык хакерлер АКШ демократтарына жасалган чабуул боюнча көрсөтмө беришти

Украиналык хакерлер былтыр АКШнын Демократиялык партиясына киберчабуул жасалганын моюнга алышты.

The New York Times гезити билдиргендей, украиналык программист демократтардын серверин бузуу ишинде биринчи күбө катары өттү. Ал америкалык бийликке кайсы маалыматтарды бергени азырынча белгисиз.

Хакер Profexer аты менен иштеп келген. Тергөөнүн маалыматы боюнча ал шайлоо кампаниясы тушунда Демократиялык партиянын серверлерине киберчабуул жасоо үчүн зыяндуу программа жазып чыгып, бирок өзү колдонгон эмес. The New York Times кабарлагандай, программист учурда Украинада. Америка бийлиги аны АКШга өткөрүп берүүнү талап кылган жок. Себеби хакер программасын кандай максатта колдонуларын билгени тууралуу далилдери жок.

АКШнын атайын кызматы Демократиялык партиянын серверлерин Fancy Bear тобу бузду деп эсептейт. Январда АКШнын чалгындоо коомчулугу Орусия президенти Владимир Путин хакердик чабуулдарды жасоо боюнча жеке көрсөтмө бергенин билдирген. Путин мындай жол менен президенттик жарышта Дональд Трамптын жеңишке жетүүсүнө көмөк көрсөтүүнү көздөгөн.

Москва АКШдагы шайлоо кампаниясына кийлигишпегенин билдирүүдө.

Булак: “Борбор Азия жаңылыктар кызматы”

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *